عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته…
رح تفهمو الموضوع اذا قريتو للاخر واعذروني اني كاتبة بالعامية بس والله من العصبية…
ما قريتو غلط ولا انا كتبت العنوان غلط ورجااااءً ما تفهموني غلط…
(هاذ الجزء الثاني من موضوعي انا اسرائيلية اللي برضو كتبتو وانا متعصبنة واللي بضحك بالموضوع انو نفس الشغلة هي اللي خلتني اعصب! وهي موضوع البنت السعودية اللي اخذت الهوية الاسرائيلية بعد ما تزوجت ” اسرائيلي”. موضوعي الاول كتبتو قبل سنة تقريبا بعد ما نشرو هاذ المقال بالمنتدى ولاني شفت 100000 رد على الموضوع والكل بقول انو البنت تزوجت يهودي!! ورجع الموضوع على الساحة قبل يومين ورجت عصبت لانو نفس الشي الكل عم بقول انو الشاب يهودي اما الحقيقة هي انو عربي مسلم من ناس اسمهن عرب الـ 48 وانا منهن!! اذا بدكو تقولولي يهودية تفضلو بس اقرو الموضوع للاخر وبعدها قررو…)
اولا اسمنا فلسطينيي الـ48 – عرب الـ48 – عرب الداخل – العرب داخل الخط الاخضر- وطبعا اكره تسمية علينا..” عرب اسرائيل”.. 😐 ..
احنا اكثر من مليون ونص عربي ( مسلمين مسيحيين ودروز) حاملين للهوية
الزرقاء(الاسرئيلية) وهي السبب ببقائنا داخل اراضينا ولولاها بطلعونا من ارضنا
” بشكل قانوني” وساعتها بتتصادر الارض ومندور ببلاد الله الواسعة على محل يلمنا..
ما تفكرو انو احنا مبسوطين بانو منحمل الهوية الاسرائيلية..بالعكس انا امنيتي اني اكبها
اليوم قبل بكرا اما شو اعمل يعني يا اما بتخلى عن الهوية يا اما بتمسك بارضي (يعني شوفو
المفارقة..بقائي بفلسطين مربوط بهويتي الاسرائيلية 😆 🙂 ) واحنا رغم كل اللي منعاني منو
من العنصرية بس صامدين ورافضين نتخلى عن اراضينا واذا تخلينا عن الهوية الزرقاء
معناها انو منتخلى عن ارضنا ومنطلع منها ومن بيوتنا ومنخليهن لليهود وهاذ هو بالزبط
اللي بدهن اياه مننا..انو نحل عنهن ونترك اراضينا…
احنا بالنسبة لليهود منشكل خطر لانو عايشين بقلب “دولتهن” وبينهن( هاي بالنسبة
الهن اما بالنسبة النا فهن اللي عايشين بيننا مش العكس) ولانو منشكل خطر ديموغرافي
وهن بعتبرونا “قنبلة موقوتة” وانو عم نستنا اللوقت المناسب! عشان هيك عم بحاولو
يطلعونا من اراضينا بأي طريقة!
عرب الـ48 انظلمو من الكل يهود وعرب…العالم العربي مش عاجبو انو احنا متمسكين
بارضنا وبدهن ايانا نطلع لانو حسب رأيهن اذا ظلينا “بين اليهود” رح نصير مثلهن..
لهذول بقول انو احنا عايشين “بين اليهود” من 61 سنة تقريبا ومع هيك ما تغيرنا
بعدنا منحكي عربي وبعدها البنات متحجبة وبعدو الاذان بنرفع في المساجد..
كثير عرب ظلمونا بس لمجرد انهن بعرفوش بوجودنا اصلا واذا في ناس بتعرف فكثير
منهن بفكرونا خنا وطننا ورضينا نعيش باسرائيل واللي بضحك انو في منهن بقولو انو
احنا ضحينا بكل شي مشان الهوية الاسرائيلية(!!) وفي ناس والحمد لله بتعرف الحقيقة..
اما ظلم اليهود فهاذ شي ثاني تماما ومش طبيعي…
بما انهن بعتبرونا خطر عليهن فتعالو شوفو نظراتهن النا وتعالو شوفو وعيشو حلاوة
التمييز العنصري وتعالو شوفو نظراتهن اذا شافو بنت محجبة احتقار مع قرف مع ابصر
شو..مع هيك فهن شفقة منهن علينا معطيننا حسب قوانينهن حرية العقيدة والدين بس
احنا طبعا يا دوب شايفين اشي منها هاي الحرية..
وغير عن وضعنا الاقتصادي 👿 ما شاء الله نصنا تحت خط الفقر! ومع هيك معليش
عايشين شو علينا..
بما انو اليهود عندهن خدمة اجبارية بالجيش معناها الواحد منهن مش رح يفوت على
الجامعة قبل الـ2021 وبما انهن ما بدهن العرب يفوتو على الجامعات قبل اليهود عملو
قانون مطبق بمعظم الجامعات على معظم المواضيع وهو تحديد الجيل يعني معظم المواضيع
الطالب العربي عشان يقدر يفوتها بدو يقعد سنة او سنتين بالبيت لانو بقدرش يفوت دغري
بعد التخرج من الثانوية..وهاذ السبب اني السنة قاعدة بالبيت…
وغير عن هيك…جامعات عربية مفش كلها جامعات اسرائيلية وبرضو الكليات قلة قليلة
كليات عربية والمواضيع اللي فيها مش هلقد..عشان هيك على الاغلب بالنهاية رح نروح
على معهد يهودي وطبعا مطلوب انو نحكي بالعبري بطلاقة ( وهاي مش بس بالجامعات
برضو بالشغل وغيرو مطلوب منا نحكي بالعبري باعتبار انها اللغة الاولى) وطبعا الكليات
والجامعات مختلطة عرب ويهود شباب وبنات…
الاختلاط بين العرب واليهود اشي مفروض علينا ومجبورين عليه بس طبعا مش دايما..
في قرى ومدن وبلدات عربية وفيهاش ولا نص يهودي(مثل بلدي) بس في حوالينا
مستوطنات يهودية بس طبعا لا منعرفهن ولا بعرفونا..وفي مدن وبلدات مختلطة اللي
السكان العرب ذايقين الامرين فيها مثل عكا,حيفا, يافا…مثلا في حي كامل بحيفا مهدد
باخلاء سكانه لانو في حقير يهودي طلعلهن ابصر من وين وهو مش من حيفا بقول انو
الارض اللي الحي مبني عليها ملكه وانو السكان لازم يدفعولو ايجار البيوت اللي ساكنينها
مع انو في عائلات ساكنة هناك من اكثر من 40 سنة وبعمرهن ما شافو خلقتو لهاذ
الحقير..وفي حي بعكا كل مدة بطلعلهن كم حقير يهودي وبروحو بشتكو للشرطة انو صوت
الآذان مزعجهن! وطبعا الشرطة في خدمة الشعب..
بس حسب رأيي اكثر اشياء احنا مظلومين فيها هي: 1. منقدرش نتواصل مع اهلنا بقطاع
غزة والضفة بحرية لانو برأيهن هيك احنا منتواصل مع العدو! 2.منقدرش نحمل سلاح
ونجاهد لانو اذا واحد عمل هيك واحد بس راحت على المليون ونص..
السفر بين فلسطين وفلسطين يعني بين اراضينا للضفة والقطاع..للقطاع شبه مستحيل
خاصة بعد الحرب الاخيرة اما للضفة فحسب المعابر المفتوحة..
للدول الاجنبية طبعا كلها مسموح اما الدول العربية بس مصر والاردن مسموح وعادي
اما الباقي فيا اما مستحيل يا اما بطلوع الروح..
بالنسبة للحج والعمرة طبعا لازم يعقدو كل شي لازم بالاول نروح للاردن نوخذ جواز سفر
اردني مؤقت وبعدين على السعودية..
خلصنا من اليهود وقرفهن اجا دورنا احنا…
عرب الـ48 بالاغلبية العظمى مسلمين مع اقلية مسيحية ودرزية..المسلمين والمسيحيين
معفيين من الخدمة العسكرية غير اذا في حدا حابب يبيع وطنو وضميرو وشرفو بروح
بخدم بكامل ارادتو 😆 hy:وطبعا بتصير كرامتو واحترامو ممسوحين بالارض بيناتنا..
الدروز شبابهن مجبورن على الخدمة مثلهن مثل شباب اليهود بس الحمد لله في منهن
اللي برفضو الخدمة (والعدد في تزايد) والرافضين بواجهو السجن 😥 ..
احنا الحمد لله بكل طوائفنا ودياناتنا عايشين سوا عادي ومنقول انو الدم اللي ماشي
بعروقنا فلسطيني وهاذ هو الاهم ومكفينا لنظل سوا..
بالموضوع الاول في بنت سألتني بتقلي انو لما انت فلسطينية وبتفتخري هاذ مش مبين
عليكي لانك تخليتي عن هويتك..بقلها وبقول للي براسو هاذ الحكي اني ما تخليت عن الهوية
الفلسطينية لاني اصلا بعرفش شكلها وانا خلقت بدونها ومسكوني ورقة سموها هوية
اسرائيلية عليها صورتي بحجابي ومكتوب جنبها بالعبري:”اسرائيلية”!! ..
وبقلك انو الهوية مجرد حبر على ورق وما بتمثلني ومهما قالو اني اسرائيلية ما بهمني
لاني بعرف دمي فلسطيني وقلبي فلسطيني وان شاء الله عن قريب رح احمل هوية فلسطينية
وكل فلسطين رح يكون اسمها فلسطين واسم اسرائيل رح ينمحى عن الخارطة!
بعتذر على الاطالة…بس كونو عارفين انو كلو هاذ بس غيض من فيض وبس رؤوس
اقلام من يومياتنا…
بتمنى الصورة تكون توضحت..واذا في سؤال او تساؤل تفضلو انا بالخدمة..
في امان الله…فلسطينية وافتخر.. 😉
