معآنآتي (تكيس بالمبايض + نزيف ) افيدوني تكفون نفسيتي محبطه!

آنا متزوجه من اربع سنوات وعمري 24 سنه وعندي بنت ولله الحمد عمرها ثلاث سنوات ..

بعد ولادتي ببنتي استخدمت حبوب مانع للحمل واستمريت عليها لمده سنتين من عمر بنتي

وتركتها كنت ناويه ارتاح منها ومن اعراضها .. 😆

المهم من بعد ماتركتها هنا بدت المشاكل معاي انا كانت دورتي منتظمه معاي وبعد تركي للحبوب بدت اللخبطه عندي والدوره صارت تطول معاي ..

رحت لدكتوره وسويت تحاليل واشعه وتبين لي من كلام الدكتوره اني آعاني من تكيس بالمبايض ..
وانها هي الي ملخبطه علي الدوره ومسويه لي هالمشاكل كلها منها ظهور شعر بكثره رغم انه ماكان عندي بالوجه الا طبيعي ..

بديت مع الدكتوره بالعلاج وقالت لي الطريقه الاولى هي اني استخدم حبوب توقف الدم اولا عشان تنتظم الدوره وعطتني حبوب اسمها duphaston ديفاستون كرتونين واستمر عليها واعطتني ابرتين بالعضل يومين
وتوقف الدم .. وجتني الدوره الشهر الي بعده وماطولت وكانت الدكتوره صارفه لي حبوب اسمها metfor
اعتقد انه علاج تنظيم السكر وقالت لي استمر عليه لانه علاج لتكيس المبايض مع حبوب منع للحمل اسمها
diane35 وقالت لي اكلها باليوم الخامس من الدوره وبعد الدوره هذي ماتوقف تجي الدوره الثانيه تجيني
اليوم الثاني من الدوره اعطيك حبوب منشطه للمبايض ..

انا بعد ماجتني الدوره اليوم الخامس اكلت حبوب منع الحمل مثل ماطلبت مني الدكتوره والمفروض من الطبيعي والمعتاد انه يتوقف الدم لكن هنا معاناتي الفعليه
الدم استمر 25 يوم بدون توقف ياكثير ياشوي يافاتح ياغامق وعلى هالحاله ..
هنا انا رحت للدكتوره مره ثانيه وعلمتها بالي صاير وانه الدم ماتوقف علي ومستمر قالت لي لازم نوقف الدم قالت لي يمكن بطانه الرحم سميكه المهم وعطتني حبوب ثانيه غير الي كتبتها لي قبل اسمها primolut برضو كرتونتين الكرتون الاول ثلاث مرات باليوم والكرتون الثاني مرتين باليوم
وعطتني بعد حبوب اسمها dicynone 500 مكتوب عليها ضد النزف وقالت استمري عليها اسبوع وتعالي لي
بعدها مراجعه مر اسبوع ..

ورحت لها اليوووووووم والنتيجه عدم توقف الدم دخلت عليها وقلت لها ان الدم ماتوقف
قالت لي مو معقوله وانه يعتبر هذا نزيف لانه فوق 30 يوم قلت لها طيب والحل قالت ماعندي لك حل
الحل اني اسوي لك تحويل عالمستشفى الي انتي تابعه لها (العسكري) وكتبت لي تحويل ..
وقلت لها ارجع لك ثاني قالت انا سويت الي علي وهذا اخر شيء عندي انتي ماتوقف عندك الدم !
سألتها طيب وتكيس المبايض وعلاجه قالت مااقدر اعالجك من تكيس المبايض الا بعد ماتنتظم دورتك 💡

وطلعت من عندها وانا كلي حيره وحزن وضيقة خلق 😥
مب عارفه وش اسوي وهل العسكري بيقولون لي نفس الكلام او لا ؟؟ ومحتاره اروح او لا ؟؟
مابي اتحطمممم زياده ..

لما وصلت للبيت شفت ان الدم خف عن قبل خفيف بس للحين ماادري وش اسوي
..

يعد ماعرفتوا قصتي الي مرت بنفس معاناتي مع النزيف وتكيس المبايض تقولي وش سوت ؟؟
وهل التكيس يمنع الحمل كثير ؟ وعلاجه صعب او سهل ..
والنزيف الي مرت بنفس وضعي وش شربت وش كلت وش سووووت بليز علموني ؟
والي عندها خبره .. بليز افيدوني محتاجه لكم بعد الله بعد ماخاب ضني بدكتورتي 😆 🙄
والي تعرف دكتوره زينه بالرياض تعرف لهالامور ونفسها طيبه واخلاقها كويسه واهم شي شاطره تقولي
ان شاء الله تفيدني بعد الله ..
الي تعرف شيء طبي او شعبي للتكيس اوللنزيف تفديني لاتبخلون علي بلييييييز ؟؟
وهل النزيف من اسباب التكيس ..

انتظركم وكلي امل بأنكم بتفيدوني بأذن الله تعالى ..
والي ماعندها خبره تفيدني برفع موضوعي لو بدعوه حلوه منها ..