عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلام عليكم ورحمة الله وبركاتة
مدخل
قال صلوات الله وسلامه عليه: {كلكم راعٍ وكلكم مسئول عن رعيته }.
أخواتي حبيباتي
أبغى أتكلم اليوم بعدما طفح عندي الكيل
ووصلت معي من تصرفات بعض الأمهات مع أطفالها
ماأقول انو انا ملك ولا انو ماعندي اشياء خطأ
بالعكس كلنا مخطئين ومقصرين خاصة بحق من استأمننا الله عليهم أطفالنا
يعني جمعت كم سلوك قاهرني بالأصح رافعلي ضغطي ونبغى نناقشهم
واللي عندها أي اضافات على الرحب والسعة
أنا حاوردلكم مواقف شاهدتها وأبغى نناقشها مع بعض
نبدأ
الموقف الأول
يتجمعوا عندي أخواتي في البيت معاهم بناتهم الصغار
بنات أخواتي عادي يلبسوا قصير بس بحدود الأدب يعني
عزمت جارتي على جمعة أخواتي
جات ومعاها بنتينها الكبيره بثالث ابتدائي والثانيه بالروضه
لما مشوا أخواتي من عندي جلسنا نسولف أنا وجارتي
قالت الله يهديهم أخواتك ا ش دا اللبس على بناتهم
مرا قصير وحرام وكيذا
قلت أنا :
مو للدرجة اللي تقوليها قصير اوكي بس البنات لسه صغار
قالت انا والله ماألبس بناتي قصير الا اذا تحته سروال أو هيلاهوب
وأحاول ماأشتري قصير بالمره
لو مرا مرا عجبني الموديل أشتري لبنتي أم 6 سنوات مقاس 12 سنه !!!!
المهم مشينا الموضوع
بعدين كلموني أخواتي قالوا يابنت كلمي جارتك تنتبه على بناتها
قلت أشبهم !!
قالوا انو لما كانوا مع الصغار بالحوش يطلبوهم يفسخوا عشان يشوفوا عورتهم
ويطلبوهم انو يلمسولهم وزي كيذا
أناا ماااااصدقت ولا استوعبت و قلت أكيد أخواتي وسوسوا ولا شي
دقيت عالحرمه قلتلها ترسل البنت الكبيره
ولما جات قلتلها
اش لعبتوا في الحوش
قامت البنت تكركبت مرا وانهبلت وبكت
قلت لعبتوا لعب بطال ترى ربي شافكم ؟؟
قالت ياخاله والله كل بنات فصلي زي كيذا ودايما يروحوا الحمامات مع بعض في الصرفه
ياالله ثاااااالث ابتداااائي !!!!
والله انو شيء مبكي بجددد
قعدت تكلمت معها وانو لما آدم وحواء بدت سوءاتهم انو كان عقاب من الله
وانو اللي تطلع عورته يعني انو هذا عقاب وكيذا
انتهى الموقف
التعليق
اللي انا أبغى أقوله انو جارتي الله يهديها ماعندها توعيه لأولادها
لاتقولوا يمكن موعيتهم أنا أقولكم أنو مو من دا الموقف حكمت عليها
من مواقف كثيره ثانيه
انو بس ماخذه منصب القائد في البيت بس تأمر بدون ما تقعد مع أولادها وتسمع منهم وتنصحهم
ما جا ببالها انو السروال ع قولتها ممكن انو يتفسخ
أنا ماأدعو أنو يتعروا أطفالنا
لاأنا أقول لاااازم يكون فيه توعيه
أقعدوا مع أطفالكم ناقشوا اش يصير بتجمعاتكم
مع اهلكم مع جيرانكم مع صاحبات المدرسه
والله يحفظهم ويستر عليهم
الموقف الثاني
جارتي الثانيه
يدق بابهم كل صباح عاملهم السوداني عشان يدوه الفطور
وتطلعله بنت بخامس ابتدائي يوميا !!
وتقعد عالباب تهرج معااه
كلمت أمها قلتلها يااختي كل صبح أشوف البنت تهرج مع العامل ع الباب
انتو حوالينهم يعني ترى ما تثقي اش عنده مجرد كلمه منه تلوث أفكار بنتك
قالت لاايااختي تراه دين
أوكي دين أنا ماقلت في أخلاقه شي
بس الشيطان حريييص ويجري من ابن آدم مجرى الدم
!!!
التعليق
اش الموانه دي بين السوداني والبنت
وأمها اش تفكر ساعتها لما بنتها تتأخر ع الباب ليش ما تناديها
وتقفل الباب وتقصر الشر
يعني لو كان في لازمه وشششي ضروري ليش ما الأم تكلم العامل بنفسها أو الأب يكلمه
حتى والله مجرد شعور انو أحد ينظر لبنتك نظره وحشه شي لحاله يقهر
…..
…
.
الموقف الثالث
يوم من الأيام كان ضغطي منخفض ومو قادره اشيل راسي من الفراش
يجي ولد الجيران يدق الباب
والله العظيم ياجماعه يدق من الساعه 9 الى الساعه 11
ولما أقوم ألقى الولد مو موجود
بالأخير
شلت المفتاح وقفلت ع نفسي برا الشقه أوهمه أنو أنا رجعت أنام
شويه يطلع الدرج ولما شافني رجع هرب
ناديته واستحى وجا
قلت ليش تدق زي كيذا
قال انو أمه ارسلته مااذكر والله اش كانت تبغى
ياحبيبي أمك حالفه انو لو ما تجيب دا الشي حتساويلك شي ولا تضربك
قال لا
قلت طيب أمك ما نادتك ولا سألت عنك من يوم ماأنت طلعت من عندها
قال لا
قلت أوكي روح عند أمك وقول لها خالتو تقول علميني آداب الاستئذان
العجيب اليوم الثاني نفس الهرجه !!
التعليق
ياجارتي يا حبيبتي لماتبغي شي نسقي معي عالجوال اذا مرا ماعندك وقت تتكلمي مع ولدك وتعلميه آداب الاستئذان
يعني شي مو بأهمية أنو تطلع الولد من البيت ساعتين بدون ما تسأل
لكن مجرد إهمال
الموقف الرابع
رحت الحديقة النسائيه وأنا ماشيه أدور ع صاحبتي متفقه نلتقي أنا وهيا
مريت من جنب مجموعتين بنات الله أعلم انهم رابع ابتدائبي أو خامس ماتديهم أكثر
طبعا الشلتين في بينهم مشكله وقاعدين يتضاربوا
شويا أسمع وحده منهم تقول :
انقلعي يا ……… لو ما كنتي ………. ماكنتي لابسه بنطلون ضيق كيذا !!!!
كلام فضييييع ياناس والله انصدمت وانقهرت انو البنات بدا الانحطاط والجرأه
بعدين مو مفكرين في أي أحد من الحريم اللي يتفرجوا أو اللي يمروا
تعليقي
معقول مجموعتين بنات صغااار والبنات كثييير ولا وحده من أمهاتهم موجوده !!
اش الثقه العمياء دي
أجزم أنو لو وحده من الأمهات سمعت السب ما حترضى بالكلام اللي سمعته وتتركهم
بتقولولي ليه ما كلمتيهم
لأني مو فايقه مشاكل وناس بالسلوك دا مااقدر معاهم أبداا
حاجة تانيه ليه ماخذين جوهم انو يسبوا دا السب بدون احترام لأنفسهم ولا احترام للبشريه اللي يشوفوهم
واللعن مااااااااشي سوقه
حتى بالمزح يلعنوا
وجهلنا انو لما سئل الرسول صلى الله عليه وسلم :
من هم السقارين؟؟
قال :
نشء يكونون في آخر الزمان تكون تحيتهم بينهم إذا تلاقوا التلاعن
وفي حديث أبي الدرداء قال:
سمعت رسول الله صلى الله عليه وسلم يقول :
لا يكون اللعانون شفعاء ولا شهداء
الموقف الخامس
كنت أنا وزوجة أخوية وبنتها في انتظار المستشفى
جات بنت ورمت منديل عالأرض
قالت بنت أخويه بصوت مسموع
ياماما البنت دي مو مؤدبه ترمي ع الأرض
البنت سمعت واستحت وجت بترفع المنديل عن الأرض
قامت أمها تزعق عليها
ياوسسسخه اتررررركي
طبعا الأم شافت كل شي وسمعت وتعرف انو بنتها اللي راميه المنديل
التعليق
ماأدري اش أعلق بصراحه !!!!!
بس أنو دُهشت
الموقف السادس
ناس دايما يجو عندي في بيتي
لما يطلعوا يكون بيتي خلااااص دمااااار ششاااامل
الأرضيات والكنبات والأسطح والمرايا والفازات وكلو أبو أم الدنيا حاااايسه
طبعا تفكروا أمهم ساااكته
لااااا كل ماأحد منهم يخرب شي تطلع الأم ورقه وقلم وتقول فلاااان
كتبتلك اكس
قلت أنا بعدما طفح الكيل وانتهى وقت المجامله
قلت اش هرجة اكسكم دا
قالت انو اللي يتجمع عنده كل يوم 5 اكسات
مايروح الملاهي آخر الأسبوع
!!!!
وكملت
بس ترى أبوهم حنيّن يرحمهم حتى لو عندهم كل الورقه اكسات يوديهم
قلتلها
ياعيني عليكي انتي وابوهم يعني عيالكم فهموكم غلط وصاروا يتفننوا في تجميع الاكس
التعليق
من أمن العقوبة
أسااااااء الأدب
انتهى الموضوع
مشاركاتكم وآراءكم وتعليقاتكم
