عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
طلعت فى دماغى من يومين اعمل قطايف
لفلفت فى النت عشان الاقى وصفه مناسبه طبعا لقيت وصفات باللبن البودرة ووصفات باللبن الحليب ووصفات تانيه بحاجات كتير
لكن لما جيت فكرت الناس العاديه اللى بتعملها عشان تبيعها فى رمضان بتعملها عشان تكسب واكيد مش هتحط لا لبن بودرة ولا حليب هيعملوها بشكل بسيط وموفر عشان يكسبوا
وبتبقى طعمها يجنن
عشان كده عملتها بابسط طريقه وطلعت مظبوطه من اول مرة
المهم
المقادير:-
2 و14 كوب دقيق
2 كوب ماء
1 ملعقه كبيرة خميرة
1 ملعقه صغيرة بيكنج بودر
1 ملعقه كبيرة سكر
رشة ملح
الطريقة
حطى الخميرة على السكر وسبيها شويه
انخلى الدقيق والبيكنج بودر والملح
وحطى عليه الخميرة والسكر وضيفى عليه الماء الفاتر شويه شويه واعجنى
استمرى في العجن وهتلاقيها عجينه لينه وسايبه زى عجينه البقلاوة واعجنى لحد لما مش تلزق وتسيب ايدك
سبيها تخمر في مكان دافىء لمده ساعه
جهزى طاسه تيفال وسخنيها
وقلبى العجينه وجهزى فنجان قهوة كمقدار وصبى العجينه فى الطاسه وافرديها على شكل دائرة
على نار متوسطه
هتلاقيها بتعمل فقاقيع دليل على انها خمرت سبيها على النار لحد لما تلاقي وشها مش بقي بيلمع وتلاقي الظهر احمر
اوعى تقلبيها على الوش التانى سوى وش واحد
وبكده تبقي استوت
وده المقدار اللى عملته
جهزى الحشو اللى يعجبك وحمرى
انا جهزت الحشوة بتاعتى
الحشو
بلح عجوة
زبيب
جوز هند
سودانى مفروم
سكر
حشيت القطايف وحمرتها فى الزيت
ولما احمرت خرجتها وسقيتها بالشربات البارد
لو المقدار طلع كتير ممكن تخزنيها فى الفريزر
بس لازم تخزنيها محشيه وتطلعيها على القلى علطول انما مينفعش تخزنيها كده وتطلعيها تحشيها
ده مقدار حشيته وحطيته فى علبه تلاقه وخزنته فى الفريزر
بالف هنا وشفا
