عالم البنات النسائي كل ما يخص المرأة العربية من ازياء وجمال والحياة الزوجية والمطبخ
لأحلى بنات أن حبتهم من قلبي و أحبوني أهديكم هذه الأبيات
لكل بنت رجعة من الغربة تشوف مصر
واتمنى تعجبكم
( منقول )
..::: جايلك يا مصر :::..
في كل مرة …
بحبك
في كل مرة …
زي كل عاشق ولهان
بأعد الأيام عشان أقابلك
في كل مرة …
بأشتاق والاشتياق
بيزيد في قربك
في كل مرة …
بنتقابل ونتواعد ونتعانق ونفترق
تدوبي في قلبي
وأدوب في قلبك
في كل مرة …
كنت أتمنى تطول الضمة
في صدرك
وقبل ما أشبع
ييجي الفراق
يبعدني عنك
في كل مرة …
أبقى زي طفل خدوه من أمه
ينادي عليها وتنادي عليه
والدموع متحجرة في العيون
والقلوب متسمره في الإيدين
وتطول المسافات
ويختفي الندا
ويموت الصدى …
بس المرة دي …
طعم اللقا غير
طعم الحياة غير
مش عارف لما أشوفك
قلبي حيرفرف في السما
كأنه طير
ولا حألاقي نفسي غريب وسط أغراب
صحيح الوشوش نفس الوشوش
لكن القلوب …
ما فيهاش نفس الخير
والأرض …
اللي ياما سقاها اليم
اللي أطعمت 80 مليون فم
اتبدرت دم .. وشربت هم
وطرحت سم
مش عارف بكرة إيه حيحصل
لما أقابلك …
راح أبكي لما أشوفك جريحة ؟
ولا حأبكي على الصورة القبيحة
هو أنا ايه اللي جابني ؟؟
غير حبك وحنيني اليكي
واحساسي بنبضك وخوفي عليكي
مش عارف أقول ايه ؟
أقول ياريتني ما كنت حبيتك ؟
وكنت أعيش زي غيري
العمر واخدني والغريب ناهبني
ولا أحس بعشق ولا بهزيمة اشتياق واحتيار
ولا يبقى بيني وبين الحنين تار
يطاردني في الليل وفي النهار
وانا بأجري وراكي ميت مشوار
وأرجع وأقول …
متهونيش عليا يا مصر
مهما بعدت عنك أنا منك
ومهما بعدتي عني إنتي في العين نني
ومهما ألف ومهما أدور …
حتفضلي إنتي الشجرة
وحأفضل أنا العصفور
ساعات وأكون بين أحضانك
انتظريني …
صدقيني مش محتاج دفا
أنا جاي عشان أمدك بالوفا
….
….
أستودعكم الله الذي لا تضيع ودائعه
