صديقتي تقول لي الله يــ …….!!!!!

السلام عليكم حبيباتي الفرااشات فيه موضوع وماني قادره اكتمه بقلبي فحبيت افض فض لكم


هذا ياطويلات الاعمار انا متزوجه ولي جاره طيبه وحبوبه وفرفوشه وانا احبها وهي تموت فيني
تقولون كننا خوات واكثر..
المهم هالانسانه اميه مو متعلمه واكبر مني بواااااااااجد بس اعتبرها اخت لي كبيره
عذروبها انها من باب الميانه تقعد تسب
كـ ( الله يلعنك _ عمى بعينك _ وجع _ الله يقطع شكلك …. إلخ إلخ )
انا انسانه الحمد لله من بيئه متدينه ومحافظه بشكل جيد
وحتى لو ماكنت متدينه هالالفاظ قويه والله
الحمد لله انا مو اكبر اخواني بس بحياتي محد من اخواني قال انقلعي او عمى او وجع
فما بالكم باللعن وتعودت احترم الناس عشان يحترموني
اذكر في مره وحده زميله دراسه كنت اسولف لها وهي متحمسه
قالت كذااااابه قلت وليش اكذب ؟ والله ان كلامي صحيح
وانا مو اصغر عيالك عشان تقولين كذا حتى الصغار بطلوها هالكلمات
وقاطعتها والله وصرت لا لقيتها اكووون رسميه معاها الى ابعد حد


قصتي ان هالحرمه راعية اللعن
جات عندي يوم الخميس والمجلس عندي مليان وناس اول مره تشوفهم هي ماتعرفهم
سولفنا وتقهوينا قامت تسولف معي انا كنت معها في اول سالفتها بعدين انشغلت
مع وحده اصب لها قهوه قامت تناديني وتقول عمى قاعده اسولف لك وتطنشيني؟؟
قلت عمى يعمي ابليس انا اسمعك بأذني مو بعيوني
( ادري من ادب الحديث ان عيني لازم تكون معها بس انشغلت والله)
المهم انا انحرجت من الناس لانهم مايعرفون طبعها
وانا من زمان ودي تبطل هالميانه اللي من وراها سب
وكنت عندها قبل فتره وشفت ناس عندها اول مره اشوفهم
فكانت تسولف لهم عني وعن مقالبي قالت هذي ملعوونه عليها مقالب …
انا بصراحه ماطولت وطلعت وهذي مو اول مره دايم هي كذا بس هالموقفين اقرب شي
امس قاعده افكر اني اقول لها وافهمها ان هالشي يضايقني
وانه حراام اصلن وزي ما احترمك احترميني
فاليوم دقت علي وحده ورحت لها
لقيت صاحبة اللعن هناك قلت فرصه المهم سولفنا وقبل اطلع مسكتها على جنب
وقلت لها انتي والله زي اختي واعز بعد واحبك واحترمك وكامله والكامل الله
بس لي عليك ملاحظه لو تعدلينها تكونين اطلق وحده
وعتبانه عليك والله
قالت وشهو قلت اللعنيختي ابليس وهو ابليس الله ما امرنا نلعنه امرنا نتعوذ منه لان اللعن كلمه قويه
ويوم تقولين عمى قدام الناس احرجتيني والله
وكنت باخذ موقف منك وبقاطعك والله بس قلبي يحبك ومابي شي تافه يفرقنا
انا والله حتى خواتي اللي امون عليهم ويمونون علي ما اسمع منهم هالكلام
ولا اسمعهم هالكلام وبنتك هاللي توها في اول متوسط لو اقول لها عمى
والا الله يلعنك صدقيني بتكرهني لانه لفظ مو محبوب لا من كبار ولا من صغار
وانا ما اذكر اني قد تلفظت عليك بشي زي كذا ولو قلت ذكريني
وانصحيني ترى محد معصوم من الخطا
بس انا متأكده اني بحياتي ماقلت لك شي من هالكلام
سكتت وقالت عادي والله قلت انا لا مو عادي
وترى اذا انقطعت عنك فاعرفي انه بها السبب لو ينعاد سكتت
وانا رجعت بيتي وحسيتها طول الجلسه بس ساكته ووجهها متغير
بصراحه حزنت عليها وحسيت اني قسيت عليها بالكلام
مع اني قبل اطلع حضنتها وبستها وقلت لها سامحيني اذا كان ضايقتك
انا والله ما عاتبتك الا من غلاك
على قولة القايل عاتب اللي تحبه العتب من المحبه ابتسمت وقالت عادي
( مسكت على كلمت عادي وهذا اللي حسسني انها زعلت مني )
انا من رجعت وضميري يأنبني مدري اللي سويته صح او غلط
مع اني واثقه انه صح صعبه اكتم بقلبي وبعدين اكرهها وهي ماتدري ليه هالكره
وهل في كلامي شي يضايق
ولو كنتم مكاني وش بتسوون وودي اجيب لها هديه مع اني ماغلطت عليها
بس عشان تصفى نفسها من ناحيتي وش رايكم ؟؟؟