عالم البنات النسائي كل ما يخص المرأة العربية من ازياء وجمال والحياة الزوجية والمطبخ
حياكم الله …
اليوم سلمكم الله نبي نتحجى عن مجمع المارينا مول والمارينا كرسنت ((بالكويت))… طبعا يحتوي المجمع على عدة محلات … منها نيكست.. بودي شوب .. ومحل مال ديكور ومادري شنو … وفافافوم هذا مال ميك اب وعطورات … فيرجن وغيس وفرينش كوليكشن ومحل كله يبيع شغلات ورديه مصففهم بالفاترينا… بدال مايسحب البنات ساحب الشباب الله يغربل بليسه ومخليهم بس يتنحون جدام هالمحل وفي بعد محلات احذيه مااذكر منها ولااسم ولاأحد يسألني عن الاسامي لأني ادخل المحل من غير ماعرف اسمه زين مني عرفت اسامي اللي قبله .. ويحتوي المجمع على مطاعم حق البلعه بالدور الثاني … ويحتوي على دور سينما بعد … ويحتوي ايضا هالمجمع على عدة كافيهات وهذا المفروض اللي يسمونه جذي مجمع الكافيهات .. ووتر ليمون ستاربكس اللي تلاقيه بكل داعوس بل عليه ولونوتر وريشو الخ الخ … المهم نظام المجمع دائري يعني اللي بيتسوق يدش من مكان على ماتطق فره والا واصل حق نفس المكان اللي دشيت منه سبحان الله شلون ماتدري ياربي شفتوا شلون؟؟
هذا منظر خارجي للمارينا مول … والفتحات اللي تحت هذي مواقف المجمع …
وهذا الصوب الثاني للمجمع من بره … ويظهر من الخارج فيرجن … طبعا دايما تلاقون زحمه عند المدخل الرئيسي للمجمع بتعرفون ليش ؟؟ لأنه اكو ناس وايد اتحب المظاهر ويوقفون جدام المجمع عشان والله السواقين ملوت المجمع ياخذون السياره ويصفطونها .. حتى لو المجمع فاضي تخيلواهم يوقفون جدّام الباب حق الترزز … ومن هالنوعيات شبابنا الله يهديهم اللي حاط بغترته طن نشا ماتتحرك من على راسه … خو البنات معذورين كيفهم عاد يمكن مالها خلق او شي مني مناك او لعدة اسباب لايجب على الواحد ذكرها بس انت ريال شكبرك اشعرضك عيزان تمشي بالمواقف اللي تحت؟؟ لاوبالاخير لما يخلص فرارته قعد على الغنفات اللي عند الباب ناطر السياره .. اي من عذر اريولك ماارتاحت من الفراره داخل المجمع يارايح فوق الجسر وماشي لي المارينا كرسنت وانت اللي راد واذا رد كملها فراره داخل المجمع .. انزين تكفى اشتر شي عن الحلال والحرام .. انزين مانبي منك شي وجبه بيج ماك وانت اللي راكب سيارتك
المهم تعالوا ندش داخل المجمع ونشوف شكو ماكووو
هذي انا سميتها ساحة الصفاة اللي بالوسط … اللي تبي تتهزأ اتمر بساحة الصفاة هذي اللي بالوسط وشوفوا شلون تتمصخر … اتلاقي الناس الفاضيه اللي ماعندها شغل بس قاعدين في هالكافيهات يخزخزون فيها والله تتقطع البنت من كثر الخز … خو شتبون خلوا خلق الله يلبسون اللي يبون ولاتطالعون؟؟ … بلا تخزز بخلق الله ياخي طلّه وحده وبعدين صد الا اتفصلها تفصيل ؟ ^_^
هذا منظر لساحة الصفاة من فوق … طبعا اللي فيه خير يروح حق هالمكان في عطلة نهاية الاسبوع والله مالكم مكان من الزحمه حشا الناس واقفه ماكو شغل … لا وتلاقي الواحد واقف ساعه ساعتين ماعنده مشكله ابد ابد عااااااااااادي عنده كله يهون في سبيل يقعد في احد الكافيهات 
طبعا هني دايم تلاقي عروض سيارات اشكال وانواع وهذا مادري شكو راز ويهه الظاهر عاجبه المكان … للعلم فقط يحيط بهذه الساحه كافيهات من كل صوب فمن جذي قاعدين نقول انه العالم تتيمع فيها ماعندهم شغل … انزين اكل بالعافيه واشرب اللي بتشربه وقوم شكو مرتز اربع ساعات؟؟؟ تكفى ماعندك شغل ؟ وهات يابلوتوث .. يالهوييييييييييي عاد هذا مصيبة الزمان هالبلوتوث الكل مشغلين البلوتوث وقاعدين واخرتها شنو؟؟ يعني ترى بيضبطون بعض … ترى لو اتركزون فيهم شوي ماتلاقونهم قاعدين يسولفون ياخز في بنات خلق الله او روسهم بالموبايلات مشغلين البلوتوث وطايحين له بحث وارسال .. بحث وارسال … طيح الله حظكم .. عاد اضحك على النكات … اللي تلاقي نكها الحوله واللي الولهان يعني ذابحه العشق واللي كاتب ماكو حب … يعني ترى انا اكسر الخاطر واعوير وازوير والمنكسر واللي مافيه خير الخ الخ الخ خلوها على الله بس … للعلم فقط اعرف ناس والله مايروحون المارينا الا عشان يقعدون بالكافيهات ويشغلون بلوتوث ويتحرشون … وتسأله تقوله ها فلان شعندك يقول ماكو والله ياي اتسوق وتعبت قلت اشرب لي قهوه .. بزززززززززز على البراد
وتلاقي عاد الناس عموما في هالمجمع بعد مايخلص من القعده بالكافيه يقوم يصعد فوق المطاعم عشان يبلع يقولك ارخص من اكل الكافيه يامال الفقر … بس يالله عوافي على قلوبكم
من الغريب والحلو في هالساحه سبحان الله … انه اكو شير طالع بوسط المجمع لااله الا الله … شفتوا شلون لي وين وصل العلم والتطور ؟؟؟ …
