الكل يتسائل
ليش السيارات الخليجية من الوكالة أرخص من الوارد
بالطبع هناك بعض الأسباب اللي ماتخفى على الكل وهي
الوكالة الحصرية
اتذكر قبل فتره شفنا مقال بالجريدة عن الهندي وكيل عيش السنارة اللي تحدى مجلس الوزراء وقال انه بيرفع سعر العيش بدل لا ينقصه وعقب الزوبعة الإعلامية اللي صارت الريال سوا اللي براسه ومحد قدر يوقفه عند حده وبعض تجار العيوش والجمعيات حاولت انها تاخذ الوكالة من الهند ولكن المصدر نفسه رفض وقال انا اتعامل مع شخص واحد بس ومابا اتعامل مع شخص ثاني واهنيه الوكيل الحصري لعيش السنارة استغل هالنقطة وتحدى الكل ومحد قدر يوقفه عند حده
وفي اسباب ثانيه بعد
اي شخص يبا يسوي مشروع لازم يسوي جدوى اقتصادية تشمل رواتب الموظفين والكهربا والماي والدعاية والإيجار وشغلات ثانيه وتختلف الجدوى الاقتصادية اذا بسويها بالإمارات عن اي دولة خليجيه ثانيه وهالامور راح تترتب على سعر اي شغله ابا اكون وكيلها بالإمارات ومنها تجارة السيارات
بعطيكم مثال حسب خبرتي في شركات السيارات وفي شركة الطاير بالتحديد
الشركة تدفع مبالغ كبيره للإيجار في مختلف إمارات الدولة مع دعايه وتدريب ورواتب موظفين وكهربا وماي ورعايه وخلافه ولهالسبب نحصل سعر السيارة بالإمارات اغلى من سعر السياره بالسعودية كمثال لأن بالسعودية الإيجارات والحياة ارخص بكثير من الإمارات ولهالسبب استغل تجار السيارات والمعارض هالنقطه لأنهم ماراح يدفعون مصاريف كبيره للدعايه والإعلان ورواتب كبيره وصيانه للسيارات ولهالسبب يستوردون السيارات من برا ويبيعونها ارخص من الوكيل وبهالحاله المتضرر الأساسي هو الوكيل وبالنهاية تم الغاء الضمان على جميع سيارات الرنج روفر المستورة من الخارج بموافقة المكتب الإقليمي
اعطيكم مثال ثاني
تختلف اسعار سيارات التويوتا بالإمارات عن سلطنة عمان والفرق تقريبا ما بين 5 الى 15 الف على حسب نوع السيارة والمواصفات ولهالسبب بعض المواطنين ياخذون السيارات من عمان واهنيه الوكيل بالدولة انضر من هالحركه ومنع دخول اي سيارة تويوتا وارد اي دولة للورشه عنده ولما عرف الوكيل بعمان هالنقطة فتح شركة بالإمارات تحت مسمى دانا تريد حتى يصلح السيارات وارد عمان بالامارات
اذا بفتح مطعم شاي كرك في ابوظبي ومحل صغير لازم احسب تكلفة الإيجار ورواتب الهنود وقيمة الشاي والابريج الحليان والغاز ومصاريف وزارة العمل والتأمين الصحي وكله راح ينحسب على سعر الكرك ولهالسبب في ابوظبي شاي الكرك بدرهم وفي بعض مناطق الدولة بنص 
اتمنى تعذرون وكالات السيارات اذا رفعت اسعارها شوي بس بالنهاية اتمنى ان الكل يكون راضي من سيارته مع ان إرضاء الناس غاية لا تدرك
والسموحه من الكل
اخوكم
ابو شوق
اولا اشكرك اخوي على موضوعك المهم والكل يتسائل عنه لكن بدون جواب مباشر او صريح ..
سألت نفسك يوم ليش دولة الامارات سياراتها او سلعها و منتجاتها اغلى من باقي الدول الخليجيه او بالاحرى تتنافس مع العالمية الآن ؟؟!!!
ليش دوم نجد من يدافع عن التجار بمثل هذه التقارير ولانجد من يدافع عن معاناة المستهلكين… نعم حتى في أوروبا الأغذية أغلى من الامارات ( لكن مدخول الأوروبي باليورو..ومدخول الاماراتي بالدرهم المربوط بالدولار )
أخوي خلنا ننكلم بشكل عام وبما انك صاحب دخل محدود انسى انك تشتغل في الوكالة واحسبها معاي .. الاساسيات للغلاء في الامارات اسبابها ومع احترامي لكل التجار :
غلاء الأسعار.. التلاعب ،الاحتكار ،التضخم والارتباط بالدولار
من الواضح أن هناك عوامل داخلية وأخرى خارجية متداخلة لها تأثيراتها المباشرة وغير المباشرة على ما يشهده السوق الاماراتي من ارتفاع حاد في الأسعار، اثر إلى حد كبير على دخول ومستوى المعيشة والحياة للغالبية الساحقة من المواطنين، وتحديدا ذوي الدخل الثابت و المحدود، وشرائح واسعة من الطبقة الوسطى (مب الهوامير طبعا) حيث شمل الغلاء وارتفاع الأسعار كافة السلع الاساسية، مثل المواد الغذائية بكافة أنواعها، ومواد التشييد والبناء، إضافة إلى أسعار العقار والإيجارات، إلى جانب السلع الاستهلاكية والكمالية الأخرى.
ومع تضارب التصريحات حول مسببات ذلك الارتفاع، وردها في البداية إلى عوامل خارجية، ثم ما رشح مؤخرا من تصريحات وانتقادات التي تفيد إلى أن هناك عوامل داخلية، تتمثل في التلاعب والاحتكار من قبل بعض التجار و الوكلاء والموزعين للمواد والسلع الأساسية، مثل المواد الغذائية (الخضروات واللحوم والأرز والتمور والعصائر والمعلبات بكافة انواعها) والعلف الحيواني، ومواد البناء (السباكة والكهرباء والاسمنت) والرعاية الطبية، و وسائط النقل، وغيرها، والتي يفاقمها استمرار ارتفاع تكلفة الخدمات (كهرباء، هاتف، مياه) إضافة إلى العوامل والمسببات الأخرى، التي تتمثل في التضخم، وانخفاض العملة الاماراتية نتيجة ارتباطها بالدولار، حيث سجل معدل الأسعار أعلى مستوياته في غضون السبع سنوات الماضية، كما ارتفع التضخم إلى قرابة 4%. والتضخم كما هو معروف يعني زيادة مستمرة في الأسعار نتيجة الاختلال ما بين العرض والطلب، ووجود كمية واسعة من الأموال التي تتجاوز القدرة على تثميرها واستيعابها في الاقتصاد الوطني على الوجه الأمثل، وهنا نشير إلى ارتفاع الإنفاق الحكومي والطلب الكلي،
اجعلوا السوق حر بالكامل وليس محتكر جزئياً أو كلياً. كل صاحب دخل وان ارتفع يتضايق من أي زيادة صاروخية غير مبررة… الزيادات المقبولة 2% 3% وليس 40او50% .
لا والمشكلة يقولون شي لجنة مسواية للي يرفعون الاسعار ويقومون بمخالفتهم !!! وهم بنفسهم يرفعون الاسعار .. ارتفعت المعاشات والخساير زادت ..
والسموووحه
اخوكم
`·.¸¸.·´´¯`··._.· روح الرميثات `·.¸¸.·´´¯`··._.·`
..:: وش نبي بـ دار من بعدك يا زايد … الدار من بعدك ماهي بمرغوبه ::..
اخوي
بخصوص امريكا وعلى حسب ما سمعت بأن مصاريف الدعاية والإعلان ارخص بكثير من عندنا وحتى رواتب الموظفين اقل في نفس الوقت غالبية معارض السيارات عباره عن موزعين وليسوا وكلاء ولهالسبب ما عندهم خدمة تدريب موظفين على المنتج وخلافه وفي نفس الوقت لما تصدر السيارة خارج امريكا ماراح يكون عليها ضرائب لأن إستخدامها بيكون خارج امريكا وبعد لا ننسى النقطة اللي ذكرتها في بداية الموضوع في امريكا ماعندهم وكيل لسيارة معينه .. عندهم موزعين ولهالسبب غالبية الموزعين ماعندهم خدمة الصيانة وهالامور وبعد الإيجار ارخص من عندنا
تصدق بأني قريب في مجلة متخصصه بأن دولة الإمارات العربية المتحدة صارت في الTOP TEN من اغلى دول العالم بالإيجار ؟
اعرف معرض من المعارض في امارة ابوظبي إيجاره 4 مليون درهم
تخيل انك تدفع هالمبلغ على إيجار محلك وشوف بكم بتبيع بضاعتك
اتمنى من الاعضاء اللي عندهم خبره بالسوق الأمريكي ينوروني اذا كانت معلوماتي غلط
والسموحه
اخوي كلامك صحيح و على العين والراس,,,
بس عندي سؤال ليش السيارات في امريكا ارخص من الخليجي مع انهم عندهم tax يقص الظهر و دعايه و اجار وماي و موظفين و خدمة عملاء احسن من الي عندنا بمليون مرةو يمكن تصرف اكثر من وكالاتناا بالدوله!!!
سبحان الله
السموحه منك اخوي بس كانت غلطه مطبعية
السيارات الخليجية اغلى من الوارد
واتمنى هالغلطه المطبعية ما تأثر على تعليقك القادم على الموضوع
الكل يتسائل
ليش السيارات الخليجية من الوكالة أرخص من الوارد
بالطبع هناك بعض الأسباب اللي ماتخفى على الكل وهي
العنوان صح بس شو صار في مقدمة الموضوع؟