الكل يتسائل
ليش السيارات الخليجية من الوكالة أرخص من الوارد
بالطبع هناك بعض الأسباب اللي ماتخفى على الكل وهي
الوكالة الحصرية
اتذكر قبل فتره شفنا مقال بالجريدة عن الهندي وكيل عيش السنارة اللي تحدى مجلس الوزراء وقال انه بيرفع سعر العيش بدل لا ينقصه وعقب الزوبعة الإعلامية اللي صارت الريال سوا اللي براسه ومحد قدر يوقفه عند حده وبعض تجار العيوش والجمعيات حاولت انها تاخذ الوكالة من الهند ولكن المصدر نفسه رفض وقال انا اتعامل مع شخص واحد بس ومابا اتعامل مع شخص ثاني واهنيه الوكيل الحصري لعيش السنارة استغل هالنقطة وتحدى الكل ومحد قدر يوقفه عند حده
وفي اسباب ثانيه بعد
اي شخص يبا يسوي مشروع لازم يسوي جدوى اقتصادية تشمل رواتب الموظفين والكهربا والماي والدعاية والإيجار وشغلات ثانيه وتختلف الجدوى الاقتصادية اذا بسويها بالإمارات عن اي دولة خليجيه ثانيه وهالامور راح تترتب على سعر اي شغله ابا اكون وكيلها بالإمارات ومنها تجارة السيارات
بعطيكم مثال حسب خبرتي في شركات السيارات وفي شركة الطاير بالتحديد
الشركة تدفع مبالغ كبيره للإيجار في مختلف إمارات الدولة مع دعايه وتدريب ورواتب موظفين وكهربا وماي ورعايه وخلافه ولهالسبب نحصل سعر السيارة بالإمارات اغلى من سعر السياره بالسعودية كمثال لأن بالسعودية الإيجارات والحياة ارخص بكثير من الإمارات ولهالسبب استغل تجار السيارات والمعارض هالنقطه لأنهم ماراح يدفعون مصاريف كبيره للدعايه والإعلان ورواتب كبيره وصيانه للسيارات ولهالسبب يستوردون السيارات من برا ويبيعونها ارخص من الوكيل وبهالحاله المتضرر الأساسي هو الوكيل وبالنهاية تم الغاء الضمان على جميع سيارات الرنج روفر المستورة من الخارج بموافقة المكتب الإقليمي
اعطيكم مثال ثاني
تختلف اسعار سيارات التويوتا بالإمارات عن سلطنة عمان والفرق تقريبا ما بين 5 الى 15 الف على حسب نوع السيارة والمواصفات ولهالسبب بعض المواطنين ياخذون السيارات من عمان واهنيه الوكيل بالدولة انضر من هالحركه ومنع دخول اي سيارة تويوتا وارد اي دولة للورشه عنده ولما عرف الوكيل بعمان هالنقطة فتح شركة بالإمارات تحت مسمى دانا تريد حتى يصلح السيارات وارد عمان بالامارات
اذا بفتح مطعم شاي كرك في ابوظبي ومحل صغير لازم احسب تكلفة الإيجار ورواتب الهنود وقيمة الشاي والابريج الحليان والغاز ومصاريف وزارة العمل والتأمين الصحي وكله راح ينحسب على سعر الكرك ولهالسبب في ابوظبي شاي الكرك بدرهم وفي بعض مناطق الدولة بنص
اتمنى تعذرون وكالات السيارات اذا رفعت اسعارها شوي بس بالنهاية اتمنى ان الكل يكون راضي من سيارته مع ان إرضاء الناس غاية لا تدرك
والسموحه من الكل
اخوكم
ابو شوق
كان في غلط في الموضوع وكنت اقصد ان الوارد ارخص من الخليجي
تعددت الاسباب بالنهاية الكل يطمح للجوده والضمان والسعر الجيد
الف شكر على المشاركة بالموضوع
كنت اتمنى اني احصل تعقيب من كتاباتك الشخصية وما تنقل لي مقاله وحتى اذا نقلت ياليت تكتب بأنك نقلتها من الموقع الفلاني حفاظا للحقوق الأدبية
شفت كلامك موجود بهذه المقاله مع تعديل بسيط
غلاء الأسعار.. التلاعب ،الاحتكار ،التضخم والارتباط بالدولار
لما تكتب شي من كتاباتك برد على تعقيبك
والسموحه
أظن الغلا عام البلاد…. والكل يشتكي منه وسعر سيارة ب 150 الف أو أقل ما تيب سيارة كشخه شرات قبل….
لا ألوم وكيل ولا غيره… أسعار السيارة حتى برى البلاد ضو… كيف …. ؟؟؟ كنت بشتري مرسيدس من ألمانيا من المصنع طلع ما يفرق عن الوكيل في بوظبي بالإضافه الى عربون للشخص اللي بيخلصها وجمارك المينا … وأنته ماشي أحسبها
وبعدين ماشي ضمان سيرفس… وليش هالسدعه يود مينونك لأيك أين منه
الوكيل مختلف وضعه عن الموزع أو معارض السيارات شرات اللي في العوير أو غيرها من الامارات … ما أريد أدافع عن حد بس الوكيل يلزم ببيع حصه معينه في السوق من قبل المكتب الأقليمي للوكاله اللي يمثلها… وهوه و شطارته … يعني يبغي يبيع
أجارات المعارض مرتفعه و رواتب و سكن وتأمين للموظفين …. في البريمي كم يدفعون سكن لموظفيهم كم أجار المعرض …!!!! ومع هذا سعر الأستيشن مرتفع كم ألف يفرق بس مش هالشي الوايد وهوه يكسب مع الفروقات الثانيه….
والسيارة نفسها ( أقصد الأستيشن ) كم سعرها !!!! جدا مبالغ فيه بس الوكيل ما يحط سعرها السعر من الشركة الأم…..
أنا عندي أخذ من البلاد ولا أتم حاط أيدي وأتريا منه من حد يطرشي شي من برع …. وحاط أيدي على قلبي وأخرتها …. ما يندرى…
والله يعيننا و يعينكم
السلام عليكم ورحمة الله وبركاته
أنا مع الأخ روح الرميثات وكلامه سليم
وبالنسبه لتجار أو بالاحرى وكلاء السيارات كان ممكن اذا ما انخفضت الاسعار ممكن يكون فيه تنافس بشكل ثاني عالعموم كلام اخونا دار زايد سليم بالنسبه لغلاء الايجارات والعماله
والله انه نحن أحسن شعب عايش فالعالم ومع هذا مانشكر ودوم نتذمر الي يبا يعرف قيمة بلاده يسير ييلسله شهر خارجها وبيحس بالفرق
أدام الله عز بلادنا بحكومتها الرشيده وأدام نعمته علينا باذنه
بخصوووص انه الوارد اغلى من الخليجي
بقولك ليش لو تلاحظ الوراد مواصفااااته اكثر
يعني كورولا الخليجي اتيك جير تماتيك وفتحه
وحساسات خلفيه
ام الوارد اتيك الاضافاات مثبت سرعه
+ تحكم من السكان + abs
+ الشكل فمريكااا يكون ايدد من الخليج
شوف الكرلا الي منزلينهااا عندناا كانت اول تنزل
بأمريكاااا وشوف التيمااا من 2004 تنزل بشكل
غيير واحينه قرروا يصدرون الشكل الجدييد للخليج
ال اف جي نزل فأمريكااا بعديين نزلوووه عندنااا
بعديين معلومه يمكن ماتعرفهااا البدي الياباني لأمريكااااا اثقل من البدي الخليجي
وبعطيك مثااال بطل مدقااار خليجي استيشن ووزنه وبطل مدقار استيشن وارد ووزنه
وبتشوف انه الوارد اثقل من الخليجي واذا مامصدق جرب