الكل يتسائل
ليش السيارات الخليجية من الوكالة أرخص من الوارد
بالطبع هناك بعض الأسباب اللي ماتخفى على الكل وهي
الوكالة الحصرية
اتذكر قبل فتره شفنا مقال بالجريدة عن الهندي وكيل عيش السنارة اللي تحدى مجلس الوزراء وقال انه بيرفع سعر العيش بدل لا ينقصه وعقب الزوبعة الإعلامية اللي صارت الريال سوا اللي براسه ومحد قدر يوقفه عند حده وبعض تجار العيوش والجمعيات حاولت انها تاخذ الوكالة من الهند ولكن المصدر نفسه رفض وقال انا اتعامل مع شخص واحد بس ومابا اتعامل مع شخص ثاني واهنيه الوكيل الحصري لعيش السنارة استغل هالنقطة وتحدى الكل ومحد قدر يوقفه عند حده
وفي اسباب ثانيه بعد
اي شخص يبا يسوي مشروع لازم يسوي جدوى اقتصادية تشمل رواتب الموظفين والكهربا والماي والدعاية والإيجار وشغلات ثانيه وتختلف الجدوى الاقتصادية اذا بسويها بالإمارات عن اي دولة خليجيه ثانيه وهالامور راح تترتب على سعر اي شغله ابا اكون وكيلها بالإمارات ومنها تجارة السيارات
بعطيكم مثال حسب خبرتي في شركات السيارات وفي شركة الطاير بالتحديد
الشركة تدفع مبالغ كبيره للإيجار في مختلف إمارات الدولة مع دعايه وتدريب ورواتب موظفين وكهربا وماي ورعايه وخلافه ولهالسبب نحصل سعر السيارة بالإمارات اغلى من سعر السياره بالسعودية كمثال لأن بالسعودية الإيجارات والحياة ارخص بكثير من الإمارات ولهالسبب استغل تجار السيارات والمعارض هالنقطه لأنهم ماراح يدفعون مصاريف كبيره للدعايه والإعلان ورواتب كبيره وصيانه للسيارات ولهالسبب يستوردون السيارات من برا ويبيعونها ارخص من الوكيل وبهالحاله المتضرر الأساسي هو الوكيل وبالنهاية تم الغاء الضمان على جميع سيارات الرنج روفر المستورة من الخارج بموافقة المكتب الإقليمي
اعطيكم مثال ثاني
تختلف اسعار سيارات التويوتا بالإمارات عن سلطنة عمان والفرق تقريبا ما بين 5 الى 15 الف على حسب نوع السيارة والمواصفات ولهالسبب بعض المواطنين ياخذون السيارات من عمان واهنيه الوكيل بالدولة انضر من هالحركه ومنع دخول اي سيارة تويوتا وارد اي دولة للورشه عنده ولما عرف الوكيل بعمان هالنقطة فتح شركة بالإمارات تحت مسمى دانا تريد حتى يصلح السيارات وارد عمان بالامارات
اذا بفتح مطعم شاي كرك في ابوظبي ومحل صغير لازم احسب تكلفة الإيجار ورواتب الهنود وقيمة الشاي والابريج الحليان والغاز ومصاريف وزارة العمل والتأمين الصحي وكله راح ينحسب على سعر الكرك ولهالسبب في ابوظبي شاي الكرك بدرهم وفي بعض مناطق الدولة بنص 
اتمنى تعذرون وكالات السيارات اذا رفعت اسعارها شوي بس بالنهاية اتمنى ان الكل يكون راضي من سيارته مع ان إرضاء الناس غاية لا تدرك
والسموحه من الكل
اخوكم
ابو شوق
الله يعطيكم العافيه على هذا الموضوع والاراء الحلوووه
الرنج روفر في بريطانيا اغلى بثلاث مرات من الامارات بسبة الضرايب
انا اظن السيارات الي في امريكا تصنع في امريكا فما يطلع عليه جمارك يعني مصانع التويوتا موجوده فامريكا والرنج روفر بعد
عطاك ربي خيره وكفاك شره ان شاء الله
السيارات معروف عالميا ان اسعارها تزيد سنويا ما بين 3 الى 5 % وهذا شي طبيعي لأن المصنع يرفع هالسعر على الوكلاء وطبيعي الوكاله تزيد من سعرها شوي
ولكن بعد ما تكلمت عن الوارد والخليجي وليش الخليجي اغلى من الوارد
انتظر تعقيبك
انا بقووولك شي يعني الوكاله سنويا ترفع الاسعار
والناس شرايه ليش لانه فيه تمويل من بنوووك اسلاميه و ربويه
لو لا البنك نص شعب الامارات راكب كرولا موديل 1990
سموووحه كني غلطت بس هذا الي حاصل ناس سمعت بس رواااتب بتزيد هوووووووووب سياره تفكير خاطئ
انا اول شي بسويه ادفع القرض الي علي واعيش براااتبي كااامل وموووتري العزيز ال اس 400 موديل 1998 يحليله يوصلني البيت و الدوام الفجيره / ابوظبي ولا بعد يستانس ما يحب الرقاد هههه تفوووووووووووووو اخاااف احسده