الكل يتسائل
ليش السيارات الخليجية من الوكالة أرخص من الوارد
بالطبع هناك بعض الأسباب اللي ماتخفى على الكل وهي
الوكالة الحصرية
اتذكر قبل فتره شفنا مقال بالجريدة عن الهندي وكيل عيش السنارة اللي تحدى مجلس الوزراء وقال انه بيرفع سعر العيش بدل لا ينقصه وعقب الزوبعة الإعلامية اللي صارت الريال سوا اللي براسه ومحد قدر يوقفه عند حده وبعض تجار العيوش والجمعيات حاولت انها تاخذ الوكالة من الهند ولكن المصدر نفسه رفض وقال انا اتعامل مع شخص واحد بس ومابا اتعامل مع شخص ثاني واهنيه الوكيل الحصري لعيش السنارة استغل هالنقطة وتحدى الكل ومحد قدر يوقفه عند حده
وفي اسباب ثانيه بعد
اي شخص يبا يسوي مشروع لازم يسوي جدوى اقتصادية تشمل رواتب الموظفين والكهربا والماي والدعاية والإيجار وشغلات ثانيه وتختلف الجدوى الاقتصادية اذا بسويها بالإمارات عن اي دولة خليجيه ثانيه وهالامور راح تترتب على سعر اي شغله ابا اكون وكيلها بالإمارات ومنها تجارة السيارات
بعطيكم مثال حسب خبرتي في شركات السيارات وفي شركة الطاير بالتحديد
الشركة تدفع مبالغ كبيره للإيجار في مختلف إمارات الدولة مع دعايه وتدريب ورواتب موظفين وكهربا وماي ورعايه وخلافه ولهالسبب نحصل سعر السيارة بالإمارات اغلى من سعر السياره بالسعودية كمثال لأن بالسعودية الإيجارات والحياة ارخص بكثير من الإمارات ولهالسبب استغل تجار السيارات والمعارض هالنقطه لأنهم ماراح يدفعون مصاريف كبيره للدعايه والإعلان ورواتب كبيره وصيانه للسيارات ولهالسبب يستوردون السيارات من برا ويبيعونها ارخص من الوكيل وبهالحاله المتضرر الأساسي هو الوكيل وبالنهاية تم الغاء الضمان على جميع سيارات الرنج روفر المستورة من الخارج بموافقة المكتب الإقليمي
اعطيكم مثال ثاني
تختلف اسعار سيارات التويوتا بالإمارات عن سلطنة عمان والفرق تقريبا ما بين 5 الى 15 الف على حسب نوع السيارة والمواصفات ولهالسبب بعض المواطنين ياخذون السيارات من عمان واهنيه الوكيل بالدولة انضر من هالحركه ومنع دخول اي سيارة تويوتا وارد اي دولة للورشه عنده ولما عرف الوكيل بعمان هالنقطة فتح شركة بالإمارات تحت مسمى دانا تريد حتى يصلح السيارات وارد عمان بالامارات
اذا بفتح مطعم شاي كرك في ابوظبي ومحل صغير لازم احسب تكلفة الإيجار ورواتب الهنود وقيمة الشاي والابريج الحليان والغاز ومصاريف وزارة العمل والتأمين الصحي وكله راح ينحسب على سعر الكرك ولهالسبب في ابوظبي شاي الكرك بدرهم وفي بعض مناطق الدولة بنص 
اتمنى تعذرون وكالات السيارات اذا رفعت اسعارها شوي بس بالنهاية اتمنى ان الكل يكون راضي من سيارته مع ان إرضاء الناس غاية لا تدرك
والسموحه من الكل
اخوكم
ابو شوق
اخوي دار زايد اشكرك على ها الموضوع واسمح لي بها المداخلة.
بالنسبة لرواتب موظفي امريكا فأنا ما أعتقد ان الهنود والفلبينيين اللي عندنا رواتبهم اعلى من الامريكان في امريكا … وإلا من باشر بنشوف العمالة الامريكية تارسة الوكالات الاماراتية. ايضا كل وكيل في امريكا عنده ورشة كاملة بأفضل الايدي العاملة. انت الظاهر اختلط عليك الموضوع بين الوكيل والمعرض. هم مثل الامارات. انا كنت في امريكا اشتريت سيارتي من الوكيل وكنت اشيك سيارتي عنده. وكان في المنطقة نفسها اكثر من 3 وكالات لنفس السيارة مجهزة بالورش.
ثانيا … بالنسبة لغلاء الايجارات في الامارات …. بس حبيت اسألك سؤال: هل بن حمودة وعلي واولاده والعتيبة والحبتور وغيرهم تعتقد وكالاتهم مبنية على ارض ايجار؟ أخوي هذه الاراضي ملكهم من 1900 وخشبة وتضاعف سعرها لعنان السماء بسبب الطفرة العقارية أخر كم سنة. يعني بالعكس هم استربحوا من الارض الله يهديك وايانا.
ثالثا: لماذا سعر مرسيدس زايد بنسبة تقريبا 45% عن امريكا بينما البي ام دبليو الفرق أقل لو تحسب معاها عقد الصيانة تحصل التكلفة تقريبا ما تفرق. ليش الرنج بسعر التراب في امريكا بينما في الامارات ما شاء الله غالي؟ الاجابة: تجارنا في الامارات يلعبون بالاسعار على مزاجهم وما عندهم مشاكل ايجارات او رواتب؟
رابعا: السبب الرئيسي لرخص الوارد هو ان المصانع موجودة في امريكا لهذه السيارات والتنافس، إذ تجد في المنطقة الواحدة اكثر من وكيل، فما بالك في عدد الوكلاء في كل ولاية وفي امريكا عامة !!! اما عندنا فالوكيل هو الوحيد وهو المتحكم وبالتالي يبيع بالسعر الخيالي.
تحياتي