آداب التسوق..عقب اللي شفته

مساكم الله بالخير…اليوم يايه يا جماعة الخير اكتب هالموضوع من عقب اللي شفته..

اعرف موضوعي ما بيجدم و لا بيأخر في شي..بس سبحان الله يمكن في ناس يغيرون اسلوبهم عقب ما يسمعون قصة الطرف الاخر

الطرف الاول في الموضوع هو المشتري او المتسوق … و عقب خبراتي في مجال البيع و مشاركتي في معارض وايد..اكتشفت ان مجموعه كبيره من الناس يفتقرون لادب التسوق ..بالمقابل في مجموعه ماشاء الله عليهم ادب و اخلاق و قمة التعامل الراقي

المهم انا ما بييبلكم شي من برع ..انا برمس عن تجاربي الشخصيه و انتو سمعو السالفه

بتكلم كالطرف الثاني في القضيه..يعني البائع او التاجر اللي يعرض السلعه

و ما اتكلم عن تجارة المنتديات..انا اتكلم عن تجارة الوجه بوجه..خلو المنتديات وقت ثاني هاي روحها يبالها مجلدات لووول

اول شي الاحظه ان العديد ما يسلمون حتى..و لا يقولون مرحبا..يزخون الشي اللي يبونه و يقولووون كم هذا؟؟ اقول السعر..يفرونه على الطاوله و يسيرون << لاحظو يفرونه ما يحطونه..و لا نسمع كلمة شكر

ثاني شي أي تاجر في محل او في معرض يكون مصفف البضاعه بشكل حلو و مرتب..حد من الزباين الله يهديهم يديهم تلعب..ما يخلون شي ما يجلبونه فوق تحت..انزين خذت الغرض تشوفه..رده شرات ما كان..او على الاقل رده مكانه..في دقيقه وحده المكان ينجلب خرابه عقب الترتيب و طبعا ما يشترون شي و لا حتى يسألون عن السعر..يعني ما عندهم نية شراء..ما فهمت هالحركه شو مقصدها..بس تخريب يعني؟

احيانا معروض على الطاوله تسترات جدام و خلفهم البضاعه نفسهم..انشغل شوي ويا الزباين..اصد و الا القى مجموعه ثانيه سارو فجوو البضايع و جربو منهم…انزين التستر موجود جدام ..و اللي ورا ملزق؟ ليش تفتحون الملزق و هو باين عليه يديد..و التستر جدام عيونكم..او على الاقل تتريون دقيقه لين ما البائع يخلص او تسألونه عن التستر اذا مب متأكيد..و دوم التستر مكتوب عليه تستر..و الا لازم يجربون اليديد يشوفون يمكن حاطين تستر تقليد و الا شي…ترا هذا هو نفسه هاااك

و نقطه مهمه جدا الا و هي المكاسر و بقولكم عن موقف صار جدامي …اليوم وحده خبرتني سالفه شبيهه..و انا تذكرت هالموقف مع انه من فتره … السالفه يطولي بعماركم اني كنت في معرض …و حرمه تكاسر البائع..لين هنيه كل شي عادي..قالتله انزين حط..حطاه في كيس..شلت الكيس و فتحت بوكها و فرت له على الطاوله مبلغ اقل و قالت له بسك و سارت..البائع يزقرها و هي و لا على البال مروحه…والله العظيم ان البائع خشمه احمر و حسيت الدموع في عينه…طبعا انا ما قدرت اتابع الموقف لاني تأثرت وايد..هذا شكله مجرد بائع يعني مب راع المحل ..و هو مسؤول عن البضاعه و الدسكاونت مب في يديه..اخر اليوم يوم راع المحل بيحاسبه شو بيقول؟

بالله عليكم هاي ما تعتبر سرقه..انا اشوفها سرقه

و وايد من الناس يكاسرون لدرجة تبخيس البضاعه..ليش؟؟
لا تنسون قوله تعالى : { ولا تبخسوا الناس أشياءهم ولا تفسدوا في الأرض بعد إصلاحها ذلكم خير لكم إن كنتم مؤمنين } .

و وصلنا لنقطة التبخيس..وايد زباين يبخسون في بضاعة التاجر…تعرفون كيف التاجر اييب البضاعه..
اذا اييبها من البلاد و مثلا من سوق الجمله…ماشي باركنات هناك ..اقرب باركنك احيده كان بعشر مادري كم صار بعد زيادة الاسعار و هو اصلا بعيد …يعني تتقطع ريله من المشي..و ينزل و يدعم الهنود و البتان و تعرفون الارصفه و الشوارع شقا وصخه من البان و التفافيل…سار يشتري و الاسعار نار و راد بالبضاعه و الحمالي ما ياخذ اقل عن 15 درهم ..و حسبو السيره و الرده…و انتو تاخذون البضاعه في مكان نظيف و راقي و مكيف

و اذا البضاعه من برع البلاد…ساير راد على الصراف..رسايل ما توقف ويا الشركه …و عقبها شركة التوصيل..و عقبها الشحن..و سير خلص معاملاتك و اوراقك..رسوم هنيه و رسوم هناك ..من غير نسبة الجمارك على البضاعه

ماشي ايي بالساهل ترا و المسأله مب سهله شرات ما تتصورون…حد من الزباين يعق كلمة شرات ما يسوى هالجيمه..و الا الله و اكبر عليكم …المفروض قبل ما الزبون يقول هالكلام يفكر شقا وصلت هالبضاعه و انحطت جدامه و وصللها بسهوله ..على الاقل يفكر في مجهود التاجر اللي واقف جدامه طول اليوم على ريوله و مستحمل الكلمه من هنيه و الكلمه من هنيه …و لا تنسون التكاليف…تكاليف المحل تكاليف البائع و السيره و الرده و ما خفي كان اعظم

التاجر سوى ها كله عشان يوفر بضاعه حلوه متميزه تناسب الناس…و عشان يسترزق الله بعد

نقطه اخيره احب اتكلم عنها هي مقولة الزبائن المشهوره: المحل الثاني يبيع ارخص

فرق السعر في المحلات و بين التجار له عوامل عديده
1. اذا التاجر يشتري بالكرتون يظهر عليه ارخص بواااااايد عن يوم يشتري بالدرزن..فيقدر يرخص بدون ما يعرض نفسه للخساره
2. لا تنسون الواسطات..خصوصا في المعارض..يعني واحد مسكين ما عنده واسطه دافع 20 الف على المحل..عادي واحد ثاني ياخذه ببلاش و الا بخمس الاف.
3. اسعار محلات الجمله نفسها تختلف…احيانا محل قريب و سهل وصوله بس اسعاره نار..و محل بعيييد و مخشوش و صعب الوصول اسعاره قليله…ترا ها بعد يعتمد على اجارت محلاتهم
4. اذا البضاعه من برع الامارات..اسعار الشحن تخنلف..اذا الشحن في اسبوع اغلى ..و اذا في شهر ارخص..و من غير التاكس على البضاعه و من غير الجمارك.

احيانا حد من التجار يبيع بضاعه من تايلاند سعرها هناك ب 60 او 40 درهم…هو يا هنيه و حطاها ب 160 درهم…اي حد من الزباين يقووول ولخيبه زايد 100 على السعر الاصلي والله في تايلاند الا على 60

بالله عليكم هاي رمسه تنقال؟؟ الزبون اللي شايف ارخص في تايلاند..يتفضل يحجز تذكره و يحجز فندق و يسوي ويزه.و يسير تايلاند يشتري عليه الرب حافظ

تعبت من الكتابه و لو اني ابا ارمس زياده و افضفض

و لا تنسون هاللي يبيعون اوادم لهم احاسيس و مشاعر … مره كنت ويا ربيعتي في محل و عقب ما حاسبت قلت للي تبيع ثانكيووو فيري مااااتش…جان تقول ربيعتي..انتي وايد تسويلهم سالفه!!

هيه بسويلهم سالفه…انا انسانه اقدر غيري و اقدر الخدمه اللي يقدمونها لي و اقل شي اسويه اني اشكرها و ابتسملها..تراها واقفه طول اليوم هالوقفه…كلمة الشكر ما بتنقص من قدري شي

بس في النهايه احب اقول ترا كلمة شكرا ما تكلف شي و شرات ما قال رسولنا الكريم عن أبي هريرة رضي الله عنه مرفوعا { لا يشكر الله من لا يشكر الناس } إسناد صحيح رواه أحمد وأبو داود والترمذي

و مشكورين على حسن القراءه