السلام عليكم ورحمة الله
أتمنى من الاخوان المتزوجين الاجابة على هذا السؤال .. واتمنى من الاخوة المشرفين بعدم حذف الموضوع نظراً لأهميته الشخصية ..
هل من الممكن انه الرجل المتزوج يحب وحده ثانية غير زوجته ؟
وشو الاسباب الي تخلي واحد متزوج يحب وحده ثانيه غير زوجته ؟
وبرايكم شو الافضل يكون للطرفين .. الزوجه تسكت .. تواجه او تخليه يتزوج الي يحبها .؟؟
والزوج يواجه زوجته بحبه لوحده غيرها .. وشو الافضل يتزوج الي يحبها .. او لا ؟؟
والطرف الثالث الي هي البنت .. هل تقبل هذا الزواج او لا ؟؟
أتمنى الجدية في الردود .. ولكم جزيل الشكر ..
حلو انه يبني عايله كبيره بس اهم شي انه ما يقصر وياهم بشي
السلام عليكم
اختي الريال احيانا ممكن يفكر انه يبني عايلة كبيرة يعني يكون عنده حرمتين وثلاث ويكون عنده عيال ويبا يبني عايلة كبيرة …
السلام عليكم ورحمة الله وبركاته
بسم الله الرحمن الرحيم
او شي حبيت اشكرج على طرح ها الموضوع الي يمكن من خلاله يستفيد منه شريحه كبيره من الناس سواء كانوا ريايل او حريم متزوجين او لا
وادري الموضوع يخص المتزوجين مثل ما تفضلتي ولكني حابه اقول رايي من خلال ما اشوفه من حولي
اول شي الاسباب كثيره الي تخلي الريال يشوف وحده غير زوجته او انه الزوجة تفكر بشخص غير زوجها
منها انعدام الثقة والصراحه
التقصير في بعض الامور سواء كانت زوجية او شخصية او امور ثانية
الاهمال في الامور البسيطه
حب التغير
زيادة المال
الفراغ العاطفي
وغيرها من الاسباب
الغالية الريال اكيد يوم فكر انه يعرس حط في باله الاستقرار النفسي والمعنوني والجسدي وقال بالحلال ابغي اجمع كل شي مع انه كان بامكانه يبقى بدون عرس وبيحصل كل شي يباه وتعرفين انه البنات وايدين والله يكرم الاعضاء من هاي النوعيات
يعني لو يبغي يرتاح جسدينا بيحصل يبغي وحده ادلعه وتهتم فيه بيرمس بنات وبيحصل الي يباه دلع وظهرات وغيره
بس دامه قال بعرس معناته انه يبغي الحلال وهنيه الصح
في بداية كل زواج بيحصل الدلع وغيره بس مع الوقت يتغير كل شي حولهم بالتدريج بعد انجاب العيال والشغل وغيره من الامور الي كلنا نعرفها يعني نادر تشوفين حرمه وريال عايشين كانهم توهم متزوجين بسبب انشغالهم بظروف الحياة والي تلعب دور رئيسي في كل علاقة زوجية كانت او غيرها
هنيه ايي دور الطرفين علشان ما يوصلون لهاي المرحله من الملل الزوجي وهو بالتغير في حياتهم ورتينهم اليومي او بالاصح تجديد زواجهم من كل النواحي نقول مثلا يسافرون لقضاء شهر عسل او انهم ياخذون اجازه من كل شي ويبقون بروحهم او مع عيالهم
حتى ما يحسون بالملل صحيح انه الوقت كله يكون ضدهم بس واجب عليهم انهم يفكرون في الطرف الثاني ويخصصون بعض من وقتهم لهم
بقولج امثله صار ت جدامي او سمعت عنها من احد افراد عايلتي
1- وحده دوم ضرابه ويا ريلها على اتفه الاشياء مع انهم متزوجين عن حب وقناعه وكان زواجهم مثالي بس بعدها بدت الامور تتغير
البنت تمت تهمل ريلها وتفكر بالظهرات وغيرها من الامور وهو في شغله وربعه وعيالهم في وادي يعني العايله الكريمة كل فرد منهم في وادي
ومخلين البيت شرات الفندق
2- ريال وحرمته كل الي يستوي في بيتهم اهلهم يعرفون به وحتى ربعهم سواء مشاكلهم وزعلهم وغيرها من الاشياء يعني حياتهم الزوجية صارت شرات الجريدة كل حد ايي يقراها .
3- زوج مخلي كل وقت للدوام على باله هم حرمته وعياله بس البيزات ومب مقصر وياهم في الحالة المادية مقصر وياهم في العاطفة والاهتمال وواجبه كزوج وأب والامور الثاني يعني نادر ما ايلس وياهم في البيت على غدا او مناسبه كله مشغول.
4- حرمه على بالها هم ريلها الاكل وتربية العيال مما ادى الى اهمال نفسها في لبسها ودلعها لريالها يعني اكل وعيال ورقاد روتين يومي.
وامثله وايد بس قلت بقول شي بسيط منهم
الحين الي يخلي الطرفين يفكرون بطرف ثالث هو
ان احد الاطراف يكون فقد الطرف الثاني يعني ما صار يحبه او يدلعه شرات قبل مما ادى إلى تكون نقص داخلي وفقد شي كان متعود عليه يمكن الطرف الثاني ما كان يقصد ها الشي بسبب انشغاله بامور الحياة ويمكن لاسباب ثانية ادت ألى تكون هاالفراغ بينهم
انعدام الثقة بين الطرفين والغيرة القاتله تودي الى تدمير الحياة الزوجية وتفكير الطرف الثاني بطرف ثالث علشان يحس بالثقة والحب والشي الي محتاجه ولا محصله مع الطرف الاول
المشاكل اليوميية الي بسبب وبدون سبب جدام الناس مما يودي الى تشتت الحياة الزوجية
اهمال الطرف في نفسه وعدم اعطاء نفسه حق من الراحه والدلع سواء باللبس او تغير الشكل او الراحة او الاهتمام بابسط شي
الحين لو انا كنت متزوجه بامكاني اخلي ريلي يشوفني انا بس او ينظر لغيري كيف بيكون هذا
بقولج
اول شي واجب على الحرمة انه تسويه هو ان اي شي يصير بينها وبين زوجها ما تخلي غيرهم يعرف بلي يستوي بينهم حتى لو كانوا ساكنيين في بيت بروحهم او مع اهله يعني يخلون غرفة النوم تحفظ اسرارهم ومن يظهرون من الغرفة يخلون كل شي داخلها ولا يظهرونها لبرع لانه لو ظهر بتتولد المشاكل ورى بعض واجب عليهم انه محد يعرف اذا كانوا اليوم زعلانيين او راضين واجب انهم يكونون على طبيعتهم جدام الناس ومن يدخلون عالمهم الخاص الي هو الغرفة هناك يقدرون يزعلون ويرضون بكيفهم.
الثقة والصراحه بين الزوجين واجبه يعني لو شفتي شي عليه لا تسيرين وتقولين انا شفتك وغيره لا شوفي انتي كيف تعاملينه شو الي قصرتي فيه وخلى ريلج يشوف غيرج حاولي تصلحين نفسج بنفسج بعدها قوليله بالكلام الحلو زوجي الغالي انا شو قصرت وياك انت راضي عني بس بالطيب مب بالزعل والعصبية او انا شفتك ويا فلانه او علانه او انت ترمس هاي او هاي لانه بهاي الطريقة بتخسرينه صدق ادري بتكونيين من داخلج تفورين من الغيرة والقهر بس خلي عقلج وقلبج معاج وفكري قبل ما تسوين اي خطوه وهنيه ايي دور الحرمه الشاطره الي بامكانها تخليه وياها او يسير عند غيرها
حاولي تجددين من نفسج بين فترة وفترة ولا تبقين على شكل واحد ترى الريال يحب يشوف حرمته متميزه عن غيرها باناقتها ودلعها حاولي بين فترة وفترة تكونيين بلوك يديد سوي الاشياء الي يحبها دلعيه وخلي يحس بانه كل شي في حياتج
شاركينه في شغله يعني قوليله تعال اشتغل اليوم في البيت وانا بكون وياك يعني وفري له الجو المناسب وتمي قدميله الاكل والشرب مع بعض من الكلام الحلو وصدقيني لو سويتي ها الشي بيعرف قيمته عندج ومنها بتعرفين قيمتج عنده
لا تتذمرين من كل شي ولا تقارنيين ريلج بزوج اربيعتج او حد من اهلج خليه هو يكون غير عنهم
كوني له الاخت والام والصديقة وكل شي
حاولي قد ما تقدرين تكسبينه ترى الريال يوم يفكر يسير لغيرج بيكون شاف شي في غيرج ولا حصله عندج هنيه لازم تشوفين نفسج وتيلسين تراجعين تصارفاتج وشكلج ابدي من نفسج من فوق لتحت شوفي كيف انتي تعاملينه شو تسوين يوم ايي كيف حياتج وياه
اكتبي في ورقة شو السبليات الي تشوفينها في ريلج والايجابيات وحتى الزوج يكتب ها الشي ويحاولون يقللون من السلبيات في الطرف الثاني ويحولون السلبيات لايجابيات
جددوا زواجكم خذوا عيالكم وخلهم يحسون بقدر حبكم
اختاروا يوم في الشهر لو امكن يكون يوم لكم تسون الاشياء الي تحبونها
أو اعطوا بعض يوم اجازه يعني الريال في ها اليوم يسوي الي يباه ويسير الاماكن الي يباها والحرمه نفس الشي علشان في نهاية اليوم تردون مشتاقين لبعض
مثل ما هو عليه حق عليج ترى لنفسه عليه حق وربعه لهم حق واهله لهم حق بعد
اذكروا ربكم لو حسيتوا بظلم او قهر او الشيطان وسوس عليكم
والله انه كل شي بيدنا نحنا سواء كنا حريم او ريايل
يا نخلي الي حولنا لنا وحدنا او نخليهم يشوفون غيرنا
والسموحة على التطويل اختي بس شدني الموضوع وقلت برد برد بسيط عليه
والله يوفقج انتي وكل المتزوجين وعقبال الباقين
تقبلي تقديري واحترامي
اختج
بنت الامارات
[اخي العزيز هناك اسباب تؤدي الى الزواج الثاني من وجهة نظري من واقع تجربة:
1- اذاكان الزواج الاول غير متكافىء.
2- ظروف قاهرة بسببها الزوج يتغيب لفترات طويلة عن زوجتة .
3- الزواج الاول ليس باختيار الزوج والزوجة تكشف العيوب بعد الزواج ولايتم التفاهم .
اما بشأن الزواج الثاني ارى من وجهة نظري يتم بطريقه سرية لفتره ومن ثم يتم وضع الزوجه امام الامر الواقع على ان يكون الزوج قادر على تحقيق العدل والمسواه وعدم التقصير على الزوجه الاولى .
اما الاسباب الاخرى الخاصة بالمضاهر فهي مضاهر كذابة تكشف على حقيقتها بعد الاقتراب والاقتران .
ولكي يتم الزواج الثاني لابد هناك ميزة تتميز بها الزوجة الثانية غير موجوده في الاولى
ياخي اول شي الله يهنيك بحياتك وما شاء الله
الصــراحه استبعدت ان يكون في ريال بها التفكير السليم ولاااا أناني،،،،،،،
وياريت لو كل واحد ….يمكن كل واحد صعبه لو البعض فكـــــر ها التفكير كان ما حصل التفكك الاسري
الي حاصل الحين .
لا الابو عارف شي عن عياله ولا الام عارفه والنتيجه ضياع في ضياع
وبالاخير جيل معقد ومشاكله مالها اول ولا تالي
والله يكثــــــــر من امثالك …..