السلام عليكم و رحمه الله وبركاته

طبعا الجميع لاحظ في الاونه الاخيره ان المرسيديس جي 55 زاد في الخليج و انه الطلب زاد عليه جديد كان او مستعمل ,,

والغريبه !!! ان الناس قاعده تشتريه و تجازف في فلوسه حتى لو كان ماشي وايد !!

معضم اعلانات الجي 55 المستعمل موديل 2007 و 2008 و 2009 ,, واغلبيه هالسيارات تكون ماشيه فوق ال 90 الف كم ,, والي يدهشني أكثر انه عليه طلب والبائع ما يسكت تلفونه من الاتصالات.

الي محيرني انه هذي السياره غير عمليه بمعنى:- انك يوم تشتريها اول شي لازم تبدل الجانبينات و سبيسرات وو طبعا شرط انك تركب ارايل كلداري ,, يعني بتكون مخسر لك اقل شي مال 30 الف درهم

اما عن استخدامه و خراباته ترا اذا كان عالضمان انته والخير ارباعه , بس ياويلك اذا طلع من الضمان .. واحد من الشباب عنده 2007 و ماعليه ضمان و اخترب عنده السوبر ,, على ماعتقد كلفه التصليح برع الوكاله 20 الف درهم .

غريبه هالسياره سعره دايما فالعلالي وتحافظ عليه اكثر من التويوتا و الكزس.

(( في شي في الجي 55 بصراحه كلنا نتفق عليه الا وهو شكله ومضهره الخارجي وهيبته الجذابه))

والسؤال الي حاب اسأله جميع الشباب ,, اذا عندك 500 الف كاش اي سياره بتشتري,, وشو السبب ؟؟؟

59 thoughts on “أذا عندك 500 الف درهم كاش ((شو نوع السياره الي بتشتريها وليش؟)) !!! موضوع للنقاش”

  1. السلام عليكم ورحمة الله وبركاته

    عزيزي … كاش از كنج .. بما معناه ان :

    انت عندك كاش .. وتقدر تسوي الي تباه فيه ..

    نصيحه .. خذ موتر حشيم ب 300 الف على البنك اقصاد وادفع 100 الف دفعه اولى ..

    يبقالك 400 الف .. 100 جمدهم وديعه او صكوك

    من 50 الى 100 الف اسهم .. مضاربه 3 الى 4 مرات في السنه ( تيبلك من 7 الى 15 ٪ فوائد )

    باقي 200 الف ..

    ابني مسيد للوالده او الوالد ب 50 الف .. ( اجر كبير باذن الله )

    باقي 150 .. فكر في تجاره تنفعك .. وتييبلك مدخول شهري .. يغطي اقصاد السياره .. يعني الموتر ببلاش

    وكان الله غفورا رحيما

    ادري وايدين بينتقدون نقطة الاقصاد .. اخوان الكاش ييب كاش .. الموتر ما يستاهل يدفع فيه كاش .. دفعه اولى وكان الله غفورا رحيما

    عندي شور ثاني .. خذلك شقه في دبي او بوظبي من قوم 600 الى 700 الف .. طبعا على البنك .. تدفع 15 ٪ او 20 ٪ .. والباقي المستاجر يدفع … بعد 10 الى 15 سنه الشقه لك .. ادري هالايام الايجار نازل .. مب مشكله بتكر تدفع شوي سنويا بس في النهايه انت مستفيد .. ليش تدفع 600 او 700 كاش .. دائما ادفع دفعه اولى واحسب صح ..
    يعني مثال لو عندك مليون .. هل تحطها في بيت واحد ؟ لااا .. خذلك اربع بيوت كلهم 250 دفه اولى ،الباقي من الايجار ..

    اتمنى فهمت المقصد

    موفق عزيزي

  2. اذا مواطن ويشتغل في الحكومه وراتبه زين، ٢٠٠ الف لا غير يشتري فيها الماني ٢٠١١مستعمل خفيف مثلا مرسدس اي ٣٥٠ ماشي تحت ١٠ الاف كيلو، او يشتري بها ياباني ستيشن مثلا او نيسان مستعمل خفيف والباقي اذا يعرف يستثمره بنفسه ولا يعقه في محفظه او وديعه.

    وجذيه يكون عنده سياره حشيمه وعمليه وفخمه، تصلح للدوام تصلح للتمشي خراباتها قليله ونفس الوقت عنده استثماره يجاري التضخم في الاسعار.

  4. موضوعك شيق اخوي وحلو

    بس هذي مشكلت الخليجيين والاخوة المواطنين بشكل خاص
    دومهم مستهلكين عمرهم ما فكروا يكونوا منتجين

    انا عن نفسي لو عندي 500 الف

    ببدا بالتجارة على طوووول ولا بفكر اني اشتري موتر حتى لو كانت جيمته برخص التراب

    بدال ما اسير عند راعي المعرض واحب ايدة عسبة ينقصلي كم من ألف
    ليش ما أستوي انا التاجر و الناس ياخذون من عندي

    بقولكم قصة راعي معرض الله يستر عليه الاخ سوري وهوه بنفسة يقولي القصة

    يقولي اول ما وصل البلاد كان يشتغل فكراج بنجرجي ويصلح مواتر وكان ييمع الراتب وخذلة موتر ما يتعدى ال 5 او 6 الاف وبعد فترة حصلة بيعة بحدود ال 13 الف وباعة وماصرف فلس من البيزات ويمع عليهن واشترى موتر ثاني وتم على هالحال لين ما كون له راس مال

    وعقب دخل تجارة ويا شريك في السياير وتم ييمع بيزات … لين ما كون لة راس مال محترم
    وعقب سوالة تجارة خاصة وقام اييب مواتر من امريكا ويبيعها والحينة ما شاء الله يلعب بالبيزات لعب
    وعنده معرضين فالشارجة وعيمان وهذا كله من 6 الاف

    فما بالكم بمبلغ 500 الف ؟؟

    ترى المظاهر هب كل شي فهالدنية

    ولله ياخوي التجاره حظ وتوفيق ,, انا اعرف ناس يمعو فلوس وبدو تجاره خفيفه و فالنهايه ما نجحو ,, البعض خسر راس المال و سكر و البعض لين الحين عليهم جيكات بدون رصيد

    انا بغيت اقول انه الشخص الي انته طريته ترا هذا واحد من بين 10000 شخص ,,

    ولله موفق الجميع

Comments are closed.