أخواني الأعزاء
السلام عليكم ورحمة الله وبركاته،،
أما عن استفساراتي، فأنا في البداية دورت في المنتدى قلت يمكن أحصل بعض الاجابات لكن ما حصلت اللي اباه، بس وانا أبحث لاحظت بعض الأعضاء عندهم خبرة في موضوعي وباين عليهم ناس والنعم فيهم يحبون يساعدون وانا متأمل منهم كل خير.
ابغي استفسر عن بعض المواضيع مثل:
كيف أخلي الكاسكو بصير أكثر ألفة يعني أبا يطلع على إيدي بس هب طايع؟
شو الجو المناسب له، أنا مخليه في الصالة وأشغله المكيف بين فترة وفترة بحيث يكون الجو عادي، لكن في الليل ما ادري أخلي المكيف شغال؟ أخاف يبرد واذا بندته أخاف يستحر؟ وبالنسبة للإضاءة فالليل وقت الرقاد هل ابند الليتات وإلا أخليه شغال؟؟ شو الأحسن؟
بعدين بالنسبة للأضافر والجناح، وين أوديه يقصون أضافره والريش اللي في الجناح، والمفروض كل كم أسوي هالعملية؟ وهل أوديه عند بيطري وإلا كيف أنا حاولت أسويها بنفسي لكن ما طاع؟ إذا في بيطري أو مكان معين في أبوظبي ؟؟ ممكن تفيدوني عشان أعرف المكان بالمره لو مرض وإلا شي؟
بخصوص السبوح كل كم أسبحه وكيف الطريقة.؟
وشو الأفضل أخليه في القفص وإلا أطلعه ع الاستاند؟ أنا حاليا أطلعه كل يومين تقريباً من العصر لين آخر الليل وبعدين أرده في القفص بس يزعل وااايد يوم أرده في القفص؟ ومره خليته ع الاستاند يومين لكن المشكلة إنه ينزل ويتمشى في الصالة وتعرفون يخيس المكان.
وآخر استفسار لو بغيت أبيعه كم يسواله ؟؟
هاي تقريباً معظم استفساراتي، ومشكورين كل اللي بيردون علي وبيفيدوني وفي ميزان حسناتكم.
انا عن نفسي عندي كاسكو وحاطنه في مدخل الفلة واشغل له المكيف بس يوم توصل درجة الحرارة 75 او 76 فهرنهايت ابنده ويوم يحر المكان ارد اشغله واغطيه القفص بشرشف مخصوص حقه لووول بس واخلي جهة وحدة مفتوحة واغليه في زاويدة بس مب لصق في الجدار
واهم شي انك اتلاعبه وما تسوي له طاف وتمسحه عليه وعلى راسه وشريه ماي وعسل مخفف بس يكون مب ثجيل يعني خفيف كلش ويفضل كل مرة او مرتين في الشهر ووقت ما هو يكون ماكل مب على معدة خالية عشان ما يسوي حرقة له وبخصوص التسبوح انا اخذ قطعة القماشي الي مثل جيسة وينسحب من الطرف وتكون خفيفة مثل هذا مال الابواك وجذي واحط راسه داخل واشده بس مب وايد بطريقة بس انه ما يشوف حوالينه ويكون مفتوح من صوب رقبته واسبحه بسرعة بالدش يكون ماي معتدل الى دافي وانشفه بسرعة واشل الخلقة من راسه واحطه على السجادة في الغرفة واهم شي تكون دافية كلش وعقب يوم ينشف شوي اخليه في القفص واحط له اكل واغطيه ساعتين او ثلاث واهم شي يوم اتغطيه مايكون برد معتدل الجو وبدون تيارات باردة او حارة
وبخصوص الاظافر اهم شي انك اول شي اتعلمه على الالفة بطريقة انك اتلاعبه واتمسح عليه وعقب يوم يكون اليف وياك خذ مبرد اظافر عادل وبرد اظافره بحيث اتكون اظافره ملسا وهذا الشي احسن من تقليم الاظافر لان التقليم يخرب الشكل وياذي الطير ولتنسى انك ما تبرد اظافره وقت القلش
و بخصوص العصبية ترا كل كان حي مزاجي وله مزاج انته او انا او كل حد اتييه اوقات يتنرفز او يخاف من شي ويولد عنده العصبية
طبعا وقت العصبية انك احسن شي اتطلعه وعقب عشر داقايق اتدخله وعقب تنخش وتصفر له عشان يرد عليك ويعتدل مزاجه
ولتنسى ان الكاسكو يحب العنب وهو مفيد له لكن بدون افراط ويكون اخضر مش احمر
وحاول ما تحط له اي لعبة ان تكون سهولة الكسر او القضم او البلع ويفضل عدم وضع الالعاب بل انك انته اتلاعبه وتونسه عشان تكون بينك وبينه صداقة
وابتعد عن الفلفل لانه مب زين
واحسن وقت لتسبيح الطائر الصبح او الظهر
وانا اخر مرة سبحته بالدش صبين عليه ماي ورد عشان تكون ريحته حلوة احسن شي بدون مواد كيماوية
ههههههههههههههههههههههههه 
وتمنى انك تشارك بمنتدى الصفحة الرئيسية عشان تستفيد وتفيد الكاسكو
ما شاء الله معلومات ممتازة جداً وأنا وياك في كل نقطة حتى ردك بخصوص الأظافر ..
وبالنسبة لحبس الطيور انا بعد ضد هالفكرة .. حرام هذي الطيور فالطبيعة اللي عطاها مطلق الحرية للطيران .. فإذا حد يبا يربي ببغاء يشتري قفص يناسب حجمه وما يخليه محبوس فالقفص ..
بالنسبة للنقطة اللي ذكرتها بخصوص الكاسكو الذكر أو الأنثى يتعلق بصاحبه من الجنس الآخر ..
هذا اعتقد ينطبق على اغلب انواع الببغاء .. عندي أكثر من نوع وهذا اللي لاحظته ..
وأيضاً نقطة هامة .. لازم الواحد ما يشتري الببغاء فقط لأنه يباه يتكلم وهو ماعنده فكرة عن كيف تربيته، إذا مستعد يربي ويقدم الاهتمام الكامل فهني اشوف اقتناءه مناسب ..
بالنسبة للمنقار يجب عدم تقليمه .. الببغاء فالطبيعة روحه يعدل منقاره وعن طريق الخشب أو الأشجار ..
حطله قطعة غصن متين أو خشب وهو روحه بيقضم الخشب ويعدل منقاره ..
يوصل 70 سنه
بالنسبه للطير اولا خل القفص في مكان مرتفع بعيد عن ظربة المكيف ولو كان في مكيف فالليل لحف القفص ، ويستحسن الظلام يكون داااااااامس
السبوح مره في الاسبوع في الصيف و مره فالشهر في الشتاء ، وتقدر اتسبحه بالبخاخ مال تنظيف الزجاج اتفرغ منه الماده وبعدين اتحط ماي دافي في الغرشه واتخليها يوم وتجب الماي واترد تغسلها بماي وديتول حتى تتاكد من زوال المنظف وبعدين حط فيها ماي وانا ازيد غطات ماي ورد واسبح الطير وريحته تستوي حلوه
طيري شارله قفص كبير قد الباب تقريبا مفتوح من فوق والاكل داخل القفص ، يوم يبا ياكل ينزل القفص وطول الوقت برع القفص من ثلاث سنوات احين ما احبذ فكرت حبس الطير وينزل ويحوط ويرد
في شي مثل المبرد او المسحل عشان الطير يحك منقاره هذا ضروري اتحطه
الطير ياي من بيئه مختلفه وبيت آخر يختلف نوع الاكل ومنو يقدمله الاكل ومتى يقدموله الاكل والاطفال في هاك البيت هل هم مزعجينه يعني نمط حياه مختلف ومحتاج اكثر من 6 شهور لين مايتعود على بيتك وبعدها بيرد يتأقلم وياك
احتمالات :
!) يقال انه الكاسكو الانثى تحب الذكور من البشر وتركب على ايدهم بسهوله والعكس الكاسكو الذكر يحب النساء
2) الكاسكو المحبوس اكثر كلاما من الكاسكو الغير محبوس
3) الكاسكو الغير محبوس اليف اكثر من الكاسكو المحبوس
4) الكاسكو يعمر حتى 15 سنه ويبدا التزاوج من عمر خمس سنوات وفوق