من زمان كان في خاطري أكتب عن هالموضوع بس الظروف ما سمحت…واليوم تفيجت لكم 
1- افتقد سيارة الايس كريم اللي على كورنيش البحيرة…كنا لازم نوقف عندها وناخذ ايس كريم ب درهم (احلى شي الاخضر بو فستق) وكنا ناخذ لبوب وشوف الحلج كيف يشتغل
2- افتقد كافتيريا سمير مال الفالودة والبستني (كنت اطلب مكس) شو استوى فيه شكلهم شلوا المبنى بالكامل
3- أفتقد زحمة ليلة العيد…هالأيام كل يوم زحمة مب شرات اول بس زحمة ليلة العيد والله أيام
4- أفتقد راعي السمبوسة اللي كل عصر كان يصيح في الفريج ساااامبوسة ونحن على طول ما انصدق
ليش ما يعطونهم تصريح للبيع لامرة ثانية ترى هالسمبوسة نفسها تنباع في الكافتيريات؟ دقوس بو صقر يا حليله
5- أفتقد ملاعب الفريج وكل عصر نلعب لين المغرب ونشتري هنكل عشان الشوت (اونه لعيبه)
6- افتقد الحداق على السيفه…وين اختفى السمج ما اتعرف! وممنوع تحدق في الخور البيضا ولا الجزيرة الحمرا صارت دمار
7- افتقد جريدة البيان ولونها الجديم من يتذكر اللون؟
8- أفتقد هدوء الامارات وشوارعها خاصة بعد الساعة عشر
9- افتقد اشهر رادارين في الامارات على شارع الاتحاد منو يتذكرهم؟
10- أفتقد عيال البلاد الي كانوا تارسين الشوارع وينهم الحينه
ياللا كل واحد يقول اللي يفتقده ولكل امارة خصوصية وشي خاص تتميز فيه
افتقد
السوق القديم في ابوظبي
السوق الجديد في ابوظبي
النافورة
سوق الخضرة في مدينة زايد
سوق السمج في السوق الجديم
المدارس الجديمة (الكندي, الغزالي, بن دريد الخ)
افتقد ايام الوافد يعمل مليون حساب للمواطن
افتقد الفالودة الي عى بحر الشارجة (سندباد)
افتقد فرجان الاول والبيوت الجديمة (مدينة زايد, البطين الخ)
افتقد ابونا زايد
افتقد ابونا شخبوط
افتقد سعيد بن نهيان
افتقد راعي الدنقو و الباجله في السوق الجديم
افتقد راعي السمبوسه موسى موسى لوول
افتقد الاعراس في الخيم
افتقد الشوارع الفاضية
افتقد الخصوصية
ما بخلص
والله قلبتوا علينا المواجع يا جماعة الخير….
أفتقد جمعة الأهل والشباب ولعب الكورة بعد صلاة العصر لين صلاة المغرب….وحواطتنا دوم ….سبحان الله ما أعرف من وين كنا نييب كل هالوقت…الوقت كان فيه بركة واليوم كان طويل وايد سبحان الله
يعني شي وقت طويل وااايد نرد من المدرسة نتغدى كلنا اللي في البيت رباعة ومستحيل ناكل إلا إذا كلنا متيمعين مب هالأيام كل حد يسير غرفة الطعام ويغرف ولا الأكل يوصله لين حجرته….
عقب الغدا نيلس نذاكر لين الله أكبر العصر…نسير نصلي ونرد نطالع الرسوم المتحركة وعقب نسير نلعب ألعابنا المفضلة لين صلاة المغرب…اللي يلعب كورة قدم ( طبعا” معظم الفريج ) عادي 20 واحد في كل فريق بس طبعا” ماشي بنات ويا الشباب في هاي اللعبة…واللي يلعب صقلة ولا كروووووك ولا شرطي حرامي…..والله واااايد العاب
ولا لعبة عنبر…وصيد سمج…وهاي الألعاب كانت أفضل ألعاب عندنا في فريجنا في بوظبي والعين…خاصه في العين أيام فرجان أول…كانو الشباب يلعبون وبا البنات في فريج واحد وكانت الدنيا أمان ولا فيها خرابيط هالأيام
أذكر أيام يلستنا على الدكة في الفريج..ولعب الهند ويا الشباب وندق على الكافتيريا وسجل على الحساب وبنعطيك آخر الشهر…خخخخ
أشياء وااايد في بالي بس بكتفي بهالقدر وان شاء الله بردلكم مره ثانيه…….
ألف شكر لك يا صاحب الموضووع ولجميع المشاركين وعلى قولة مطرب الجيل الجديم نبيل شعيل….((اللي ماله أول شي أكيد ماله ثاني ))
تحياتي للجميع
بصراحه الطفره الي حصلت في الامارات خلتنا نفتقد اشيااا كثيره
ابغي حد منكم يذكرلي منطقه كان يعلب فيها قديما يعني من حول 20 سنه ما بقول من 30 او 40 ولا حتى 50 سنه
من 20 سنه وبعدها موجوده
في بريطانيا واوروبا اشوووف المسنيين ب عمر ال 80 و ال70 و ال90 سنه يتجولون في اماكن يتذكرون فيها شهر عسلهم ونحن يا حسره مب قادرين نسير امكان نتذكر فيه تاريخ 20 سنه من الماضي
ماشي منطقه تراثيه محافضه على شكلها السابق في الدوله