من زمان كان في خاطري أكتب عن هالموضوع بس الظروف ما سمحت…واليوم تفيجت لكم 
1- افتقد سيارة الايس كريم اللي على كورنيش البحيرة…كنا لازم نوقف عندها وناخذ ايس كريم ب درهم (احلى شي الاخضر بو فستق) وكنا ناخذ لبوب وشوف الحلج كيف يشتغل
2- افتقد كافتيريا سمير مال الفالودة والبستني (كنت اطلب مكس) شو استوى فيه شكلهم شلوا المبنى بالكامل
3- أفتقد زحمة ليلة العيد…هالأيام كل يوم زحمة مب شرات اول بس زحمة ليلة العيد والله أيام
4- أفتقد راعي السمبوسة اللي كل عصر كان يصيح في الفريج ساااامبوسة ونحن على طول ما انصدق
ليش ما يعطونهم تصريح للبيع لامرة ثانية ترى هالسمبوسة نفسها تنباع في الكافتيريات؟ دقوس بو صقر يا حليله
5- أفتقد ملاعب الفريج وكل عصر نلعب لين المغرب ونشتري هنكل عشان الشوت (اونه لعيبه)
6- افتقد الحداق على السيفه…وين اختفى السمج ما اتعرف! وممنوع تحدق في الخور البيضا ولا الجزيرة الحمرا صارت دمار
7- افتقد جريدة البيان ولونها الجديم من يتذكر اللون؟
8- أفتقد هدوء الامارات وشوارعها خاصة بعد الساعة عشر
9- افتقد اشهر رادارين في الامارات على شارع الاتحاد منو يتذكرهم؟
10- أفتقد عيال البلاد الي كانوا تارسين الشوارع وينهم الحينه
ياللا كل واحد يقول اللي يفتقده ولكل امارة خصوصية وشي خاص تتميز فيه
الله على الكرنيش ايااااااااااااام
بخبركم محد يفتقد سياره المخبز خخخ مادري شو بلاني على الاكل
وماريو في الاتاري , دراجه ام شراع او سفايح كنا نحوط فيها خخخ
و بطاطا عيدان اختفى اللي عليه علامه صقر ! واللي يبيعون فول
سوداني وبطايق + تحيدون فعاليات مهرجان دبي اول سنواته
شارع المرقبات و الضيافه والالعاب ومسيره المهرجين وغيره كان احلى عن الحين احيد الشيبه يودينا هناك ويلعبنا اخر الاسبوع
لين نقول امين خخخخ بردلكم ثالث مره لو تذكرت =)
انا عن نفسي افتقد يلست العصر نتريا رسوم المتحركة بعد مايقرا القران الكريم
تتذكرون كل قنواتنا الجديمة
افتقد محاوط القايلة بعد الغداء وتخويف اهلنا من حمارة القايلة
افتقد دكاكين لول اللى يبيعنا اسكريم بو نص الاحمر بس عشان يصير اللسان احمر
افتقد لمت الاهل يوم الخميس والجمعة في المزرعة رايحين المزرعة عشان الحوض نتسبح فيه
افتقد يوم كلنا مكروتين وراء في دبة السيارة رايحين العزبة خخخخخخخخخخ
افتقد اكثر شي عيايزنا سوالفهن وكلامهن الطيب لو كانن يزعلن ويتضاربن يرجعن لبعض ماشي في القلوب غير الود والرحمه
افتقد ايام لول يوم تسكر الكهرباء ننام فوق السطح والله انها ايام اتمنى لو ابيع كنوز الدنيا احين عشان اعيشها
هذي النافورة كانت في كورنيش أبوظبي
أهل بوظبي يذكرونها زين ما زين
أيااام وذكريات عندها
خصوصا أيام الأعياد والمناسبات الوطنية
متى بتعزمني عشان أللعب معاك؟!!
موجود عندي احلى لعبة يم يم يم
