من زمان كان في خاطري أكتب عن هالموضوع بس الظروف ما سمحت…واليوم تفيجت لكم 
1- افتقد سيارة الايس كريم اللي على كورنيش البحيرة…كنا لازم نوقف عندها وناخذ ايس كريم ب درهم (احلى شي الاخضر بو فستق) وكنا ناخذ لبوب وشوف الحلج كيف يشتغل
2- افتقد كافتيريا سمير مال الفالودة والبستني (كنت اطلب مكس) شو استوى فيه شكلهم شلوا المبنى بالكامل
3- أفتقد زحمة ليلة العيد…هالأيام كل يوم زحمة مب شرات اول بس زحمة ليلة العيد والله أيام
4- أفتقد راعي السمبوسة اللي كل عصر كان يصيح في الفريج ساااامبوسة ونحن على طول ما انصدق
ليش ما يعطونهم تصريح للبيع لامرة ثانية ترى هالسمبوسة نفسها تنباع في الكافتيريات؟ دقوس بو صقر يا حليله
5- أفتقد ملاعب الفريج وكل عصر نلعب لين المغرب ونشتري هنكل عشان الشوت (اونه لعيبه)
6- افتقد الحداق على السيفه…وين اختفى السمج ما اتعرف! وممنوع تحدق في الخور البيضا ولا الجزيرة الحمرا صارت دمار
7- افتقد جريدة البيان ولونها الجديم من يتذكر اللون؟
8- أفتقد هدوء الامارات وشوارعها خاصة بعد الساعة عشر
9- افتقد اشهر رادارين في الامارات على شارع الاتحاد منو يتذكرهم؟
10- أفتقد عيال البلاد الي كانوا تارسين الشوارع وينهم الحينه
ياللا كل واحد يقول اللي يفتقده ولكل امارة خصوصية وشي خاص تتميز فيه
افتقد بيتنا اللي في الرمله
منطقه في الشارقه قديمه
افتقد سوبرماركت فاين فير
والله اشتقت حق ايام اول يوم كنا نسير كل خميس لصالة التزلج في حديقة الهيلي طبعا هذا اليوم خاص للسيدات .. وكل ربيعاتي اللي وياي في الصف والمدرسة يكونن هناك هذا اليوم التقولون ان الصالة كانت محجوزة باسمنا ما في حد في الصالة ما نعرفة ايام وطول الوقت تزلج في تزلج ومن نتعب سيده لمطعم الصالة وعاد شو الاكل همبرجر على بطاط وايس كريم وعصير وخرابيط ما لها اول من اخر ههههههه وعقبها على طول تزلج في تزلج والله انك ذكرتنا .
اشتقت للعامله. ( طرادين يسحبون الليخ للسيفه )
اشتقت لزيارة الرياييل الصبح بين بعض وخبز الخمير ما يحياي.
تشوف الحريم برع يخبزن من الفجر.
اشتقت للعبره الي بو ربع درهم تعبر لين الطرف الثاني لراس الخيمة.
اشتقت اشوف الوالد يوسم الرياييل, وانا ايودهم. لول.
اشتقت حق دكاكين ما اول يوم ايلسن العيايز ويبيعن في بيوتهن.
.
.
نحن نحب الماضي لأنه ذهب . ولو عاد لكرهناه