من زمان كان في خاطري أكتب عن هالموضوع بس الظروف ما سمحت…واليوم تفيجت لكم 
1- افتقد سيارة الايس كريم اللي على كورنيش البحيرة…كنا لازم نوقف عندها وناخذ ايس كريم ب درهم (احلى شي الاخضر بو فستق) وكنا ناخذ لبوب وشوف الحلج كيف يشتغل
2- افتقد كافتيريا سمير مال الفالودة والبستني (كنت اطلب مكس) شو استوى فيه شكلهم شلوا المبنى بالكامل
3- أفتقد زحمة ليلة العيد…هالأيام كل يوم زحمة مب شرات اول بس زحمة ليلة العيد والله أيام
4- أفتقد راعي السمبوسة اللي كل عصر كان يصيح في الفريج ساااامبوسة ونحن على طول ما انصدق
ليش ما يعطونهم تصريح للبيع لامرة ثانية ترى هالسمبوسة نفسها تنباع في الكافتيريات؟ دقوس بو صقر يا حليله
5- أفتقد ملاعب الفريج وكل عصر نلعب لين المغرب ونشتري هنكل عشان الشوت (اونه لعيبه)
6- افتقد الحداق على السيفه…وين اختفى السمج ما اتعرف! وممنوع تحدق في الخور البيضا ولا الجزيرة الحمرا صارت دمار
7- افتقد جريدة البيان ولونها الجديم من يتذكر اللون؟
8- أفتقد هدوء الامارات وشوارعها خاصة بعد الساعة عشر
9- افتقد اشهر رادارين في الامارات على شارع الاتحاد منو يتذكرهم؟
10- أفتقد عيال البلاد الي كانوا تارسين الشوارع وينهم الحينه
ياللا كل واحد يقول اللي يفتقده ولكل امارة خصوصية وشي خاص تتميز فيه
أتوله على أيام الجامعه والسكن والامسيات والايام الحلوة وأحلى شي لمّة البنات في السكن والله ما في احلى منها الواحد راح يتم يذكرها طول عمره
افتقدنا ابونا الشيخ زايد رحمه الله
اخي الفاضل انا معك في بعضٍ من الماضي لا نريد له ان يعود …
ولكن اغلب ما ذكره الاعضاء جميل ونتمنى عودته …
…………………..
اخوتي بمتابعتكم عشت ذكريات جميلة اتمنى عودتها … ولكن هيهات ما ذهب لا يعود
…
وساظل متابعه …
لان بردودكم … اتحدث ….
لا هنتـــوا
شكرا لك اخي الفاضل BOY على موضوعك الجميل المعطر بعبق الماضي
دمتم بكل خير
تحياتي
اختكم
سهمي عالي
والله يتني دمعة…الله يرحمه ويتغمده برحمته ويدخله فسيح جناته والخير في عياله ربي يحفظهم
شكلك دهري يا eaalali على فكرة كيف ينقرا أسمك؟