من زمان كان في خاطري أكتب عن هالموضوع بس الظروف ما سمحت…واليوم تفيجت لكم 
1- افتقد سيارة الايس كريم اللي على كورنيش البحيرة…كنا لازم نوقف عندها وناخذ ايس كريم ب درهم (احلى شي الاخضر بو فستق) وكنا ناخذ لبوب وشوف الحلج كيف يشتغل
2- افتقد كافتيريا سمير مال الفالودة والبستني (كنت اطلب مكس) شو استوى فيه شكلهم شلوا المبنى بالكامل
3- أفتقد زحمة ليلة العيد…هالأيام كل يوم زحمة مب شرات اول بس زحمة ليلة العيد والله أيام
4- أفتقد راعي السمبوسة اللي كل عصر كان يصيح في الفريج ساااامبوسة ونحن على طول ما انصدق
ليش ما يعطونهم تصريح للبيع لامرة ثانية ترى هالسمبوسة نفسها تنباع في الكافتيريات؟ دقوس بو صقر يا حليله
5- أفتقد ملاعب الفريج وكل عصر نلعب لين المغرب ونشتري هنكل عشان الشوت (اونه لعيبه)
6- افتقد الحداق على السيفه…وين اختفى السمج ما اتعرف! وممنوع تحدق في الخور البيضا ولا الجزيرة الحمرا صارت دمار
7- افتقد جريدة البيان ولونها الجديم من يتذكر اللون؟
8- أفتقد هدوء الامارات وشوارعها خاصة بعد الساعة عشر
9- افتقد اشهر رادارين في الامارات على شارع الاتحاد منو يتذكرهم؟
10- أفتقد عيال البلاد الي كانوا تارسين الشوارع وينهم الحينه
ياللا كل واحد يقول اللي يفتقده ولكل امارة خصوصية وشي خاص تتميز فيه
التلفزيون الي من غير ريموت لازم تلفه بيديك وتسمع هالصوت تك تك تك والاريل الطويل الي يباله لف وعوار راس لين تصفى القناة
اقدم شي قريته وكنت احبه
اسكريييم الذهب
اختفىىىىىىى
وعيدان بطاطا ، يبيعونه داخل اكياس حمرا بكارفور
الحبه بخمس ،، نفس الطعم ونفس النكهة اللذيذه خخ
والباقي نفسكم.. مجتمعنا فعلا صغير كلنا تقريبا نتشارك بكل لي قلتوه
كنه كنا عايشين في بيت واحد
طواابع كنا نلزقها في الكتب ..
منو يذكر آيس سكريم غوار .. لون الغلاف برتقالي
ومن داخل أبيض من فوق ع الطرف كاكاو…
والله صدقج.. وأنا بعد أتوله على ذيج الأيام.. والسكن والشلة وكشتات آخر الليل وخصوصاً لو كانت أيام الامتحانات تحصلنا قاعدين في السكن في الويك إند.. وتالي الليل في مبزرة والعين الحارة أونه استجمام!