السلام عليكم و رحمة الله وبركاته
بعد التحية،،،
حاب أقول كلمة خنقاني من فترة من ناس الله منعم عليها برؤوس أموال ومنتهى همها بالحياة تفتح دكان – مجازا- وطبعا دون أي دراسة أو هدف ويمسكها لهندي يستغله لين يستأجرها الهندي من صاحب الدكان بمبلغ بسيط مهما كبر – لأن أكيد الهندي راح يطلع أضعافه ولا ما كان أخذه- ويكون راعي المحل فرحان بكام ألف بالشهر … … والهندي بعد فترة يصير مثل ” شتي” أو “يوسف أحمد” … إلخ
ليش ؟؟؟؟؟؟؟؟؟؟؟؟؟؟؟؟؟؟؟
مثلا تبي تفتح مطعم خلي هدفك يصير ينافس … برجركينج … ماكدونالز .. تشيليز … صب واي .. إلخ
تبي تفتح محل خياطة أو مشغل ملابس خلي هدفك منافسة فيرزاتشي .. لويس فيتون … إلخ
تبي تفتح مقهى .. خليه ينافس ستاربكس .. جلوريا جينز .. كوستا .. إلخ
يا خوان ماترضوا بالفتات وتخلوا الخيرات ..
لاتقولون والله موب فاضيين نقعد بالمحل .. ماظنيت صاحب ستار بكس لحين يجلس بكل فروعه حول العالم
لاتقولون والله عقليات فلان أفضل منا ..
ترا حنا عنا أسلحة مثل التوكل على الله واليقين .. والحلال .. والبركة وغيرها .. هم ماعندهم مثلها ..
راح تقولون مثلا ما عندنا خبرة ؟ إلي إشتركوا بتأسيس ستاربكس أستاذ تاريخ وأستاذ لغة إنجليزية وكاتب…. لويس فيتون كان صانع صناديق سافر من بلده لين باريس -400 كم- على ريوله وصار يشتغل أي شيء بالطريق حتى يقدر يوصل لباريس .. ومن خلال هالسفره تغلب بصندوقه فصار يعدل عليه .. لين سوا أفضل شنطة بعها لزوجة نابليون الثالث ومن وقتها صار من أقوى الماركات.
وغيرهم كثير … حتى على مستوى الإمارات يوسف أحمد إمبراطور أسواق اللولو وغيرها .. من بقالة بشارع إلكترا خلف سينما إلدورادو لأحد أقوى الإقتصاديين المؤثرين بالخليج والهند .. ومثله شتي من صيدلاني بمستشفى لين صار من أكبر التجار وعنده نيو ميديكل و الإمارات للصرافة ونيو فارما .. إلخ
لدرجة إن فيه فيلم هندي خبروني عنه الشباب يبين إن أي هندي يبي يصير غني لازم يكون هدفه دبي؟؟!!!
وأهل الديرة معظمهم عايشين على كفالة الهندي لأن الهندي هو صاحب الدخل ويعطيهم الفلوس …
وأنا ما أقصد جنسية بعينها لكن كمثال واضح للجميع.
يا خي في عندك أكثر من طريقة .. أسهلها إنك تخلي شركة تسوي لك دراسة جدوى. أو إنك تشتري دراسة جاهزة أو إنك توخذ دورة بإعداد دراسة الجدوى .. أو تتعلم بنفسك أساسياتها … أو أقل ما فيها خذلك وكالة لو تقدر وشوف شلون يشتغلون وطبق مثلهم .. إلخ
راح تتعب في البداية لكن راح تبني أساس متين … وترتاح بالنهاية.
ومن أهم الأمور التسويق ثم التسويق فالتسويق .. هو المفتاح لنجاح شركات كثيرة ومنتجات كثيرة رغم إن يكون في الأفضل منها مثل ويندوز ومثل الأي فون معظم نجاهم بسبب التسويق … شوفوا حرب التسويق بين بيبسي وكوكاكولا .. أو شوفوا شلون في منتجات تعتبر الأقوى بالسوق رغم كذا تم دوشتنا بإعلاناتها حتى ما يجي منتج يدش بسهولة مثل فيمتو مثلا .. أو شوفوا الحرب بين نسكافيه ومنتجاته والمنتج إلي أخذ حصة بالسوق من نسكافيه وهو علي أو Aly يوم إن الأخير نزل قهوة تشبه النسكافيه بالطعم لكن أضاف عليها نبتات لها سمعة قوية مثل الجنسينغ فقامت نسكافيه ردت بجنسنغ وعسل وأضافت نوع أخر بالزنجبيل .. راحت الشركة الثانية ردت نزلت قهوة سوداء وكابتشينو .. إلخ .. تسويق هو الأساس وقبل أي عملية بيع في عملية تسويق حتى لو موب مقصودة.
وطبق النظرية إلي تقول:
“Think Big”
وحتى ممكن نتكاتف ونشوف شلون نقدر نساعد بعض لأني أظن أول خطوة في بناء أمة هي تماسكها وتاكتفها ..
مشان كذا نشوف الهنود والفلبنيين .. إلخ متكاتفين
ودينا حثنا على التكاتف وأمور أخرى كثير بعدنا عنها لين صرنا هشين ..
صراحة كتبت هالموضوع من الغصة إلي فيني ..
وإلي يبا أي مساعدة يطرحها وأنا جاهز … بإذن الله بحدود قدرتي – طبعا معدوم ماليا فطنشوا الناحية ذي 
لو عندي راس مال كبير كان زماني نافست ناس كثر – أنا كل إلي ممكن أساعد فيه الناحية التسويقية والإدارية ومراجعة دراسات الجدوى .. حسب وقتي .. وراح يكون كل شيء أسويه ببلاش علشان أسمع بعضكم بدا يرمس ويقول إن كل هذا مقدمة علشان منفعة شخصية فلا ما أبي شيء إلا إن أشوف إخوان وخوات لي مشاريعهم تكبر
لو عندي راس مال كبير كان زماني نافست ناس كثر – أنا كل إلي ممكن أساعد فيه الناحية التسويقية والإدارية ومراجعة دراسات الجدوى .. حسب وقتي .. وراح يكون كل شيء أسويه ببلاش علشان أسمع بعضكم بدا يرمس ويقول إن كل هذا مقدمة علشان منفعة شخصية فلا ما أبي شيء إلا إن أشوف إخوان وخوات لي مشاريعهم تكبر
وأخر شي وهو إلي أنا أباه منكم بهالشهر الفضيل تدعولي إن الله يفك كربي ويفرجها علي ..
وشكرا
ملاحظة: ما عرفت هل المكان المناسب هنا أم القسم العام فأتمنى من المشرف العذر
يزاك الله الف خير…
شـكــ وبارك الله فيك ـــرا لك … لك مني أجمل تحية .
اشكرك عل الطرح القوي للموضوع
واللي انا دايما باحه صوتي من كثر ما ارمس عنه مع اخواني واللي اعرفه
و وايد عطيت ناس افكار تدخل عليهم ملايين … بس العيازة اللي فيهم منو يعالجها…انا والله لوعندي بروحي راس مال قوي جان سويت وسويت وايد اشياء..
ان هم قدروا فانا اقدر…..وان قدرت انا فغيري بعد يقدر
نشوووووووا نششششواااااااااا بسكم رقاد
موفق بإذن الله … لك مني أجمل تحية .
كثر الله من امثالك