بسم الله الرحمن الرحيم
السلام عليكم
شخباركم ؟ شو أموركم طيبة إنشاء الله ؟؟!!
المهم شباب وبنات ما بغيت أطول عليكم، انا يتني فكرة للتجار وللتاجرات والافراد اللي يبون سامان وبضاعة من سوق الجمله وما يقدرون يسيرون له ، لأن بعيد عنهم أو ما عندهم وقت، أو لأن بعيد عن أماكن سكن الحريم ، أو عشان الزحمة إلخخخخخ من متاعب الطريق ، فيتني فكرة إذا شفت عليها إقبال بسويها ، الفكرة هي:
الناس اللي تبا بضاعة ( صغيرة ) من سوق الجملة تتصلي وأنا بييبها لهم لعجمان والشارقة فقط لا غير ، بشرط إنهم يعرفون إسم الشركة و إسم البضاعة ونوعها ، ويستحسن يكون لهم صورة لها ويطرشولي إياها .
سوق الجملة واااااااايد كبير واللي يدخله يحس إنه بيموت من كثر الزحمة والهنود والأفارقة اللي فيه ، يعني الواحد يحس عمره يالس في مومبي في الهند من كثر الهنود والأفارقة ، والمحلات كبيرة وكثيرة ومب علطول الواحد يحصل اللي يباه..
لضمان الحقوق طرق الدفع :
أولاً: لازم اللي يبا البضاعة يقدر قيمتها ويعطيني قيمتها كاملة قبل ما أسير + ولازم يضم لمبلغ بضاعته رسوم تكلفتي أنا، يعني ببساطة أكثر إيداع الرسوم اللي انا أطلبها قبل ما أسير دبي عبر طريق الإيداع البنكي في حساب بنك دبي الإسلامي اللي فروعه منتشرة في جميع أنحاء الإمارات ، وهو تقريبا أكثر بنك في الإمارات له أجهزة إيداع إلكترونيه وشغالة 24 ساعة يعني الواحد ما يحتاي يسير البنك أوقات الدوام.
ثانيا: أنا ما أتحمل إذا الواحد قالي اييب بضاعة معينه وما كانت موجودة ولكني برجعله فلوسه كاملة مال البضاعة، لكن لازم يكون متأكد إن بضاععته موجودة لأني لو مالقيت بضاعته ممكن آخذ عن الشخص 50 درهم من سعر التوصيل والباقي برجعه له وومكن أسامحه على حسب رايي.
ثالثا: أنا ما أتحمل الفرق في أشكال بعض كراتين الأدوات أو ألوان الأغراض..
رابعاً: لازم اتكون البضاعة صغيرة يعني يقدر الواحد إييبها بالسيارة العادية ، مثل ما طلبت مني أحد العضوات الكريمات أييبلها ماسكرات للعيون يعني أقولكم هالشي كمجرد مثال والحمدلله يبتلها ومن هالشي أنا إخترعت الفكرة بفضل الله سبحانه وتعالى .
خامسا: نحن بنسير السوق إذا الموضوع هذا نفع انشاء الله كل 10 أو 14 يوم تقريبا أو على حسب الطلبات ، وإذا الموضوع ما نجح بنرد للناس فلوسها.
سادساً: أكرر إن رســومي لازم تندفع قبل ما أسيــر السوق + قيمــة البضــاعة كامـلــة.
سابعاً: ممنوع منعاً باتاً ونهائياً إن شخص يسلمني البيزات واشتريله البضاعة وعقب ايقولي لا خلاص رد البضاعة لأنه غير رايه.
ثامناً: لازم يذكرلي الزبون نوع البضاعة وإسم الشركة اللي تصنهعا وإسم نوعية البضاعة نفسها ويفضل صورة عنها.
أخيراً قيمة الذهاب إلى سوق مرشد + التفتيش عن المحل اللي يبيع البضاعة + شراء البضاعة + تسليم البضاعة لين منطقتك اللي ساكن فيها في إمارة عجمان أو الشارقة + المفاوضة على البضاعة مع المحل.. تتراوح من 170 درهم لين 350 درهم على حسب الكمية وعلى حسب نوع البضاعة ، يعني السعر ما بيقل من 170 درهم وما بيزيد عن 350 درهم على كل مرة أروح فيها لطلب الزبون حتى ولو كان نفس الطلب أظني فهمتوا قصدي.
للعملاء والزباين اللي من خارج عجمان والشارقة إذا كانت بضاعتكم صغيرة ( يعني أدوات جداً صغيرة مثل أدوات زينة للحريم أو غيره ) ممكن انطرشها لكم على أرامكس وبياخذون لكل 5 كيلو وزن 40 درهم لأغلب الإمارات والله أعلم ، وعكل كيلو زيادة حوالي ياخذون حوالي 8 درهم تقريبا، أما إذا البضاعة ما نقدر انطرشها ويا أرامكس يعني لازم أنا أيي أسلمها فباخذ عنكم زيادة زيادة.( لأني وايد بتكلف بترول غير مخاطر الطريق غير إنه مشوار خاص لصاحب الطلبية غير مخاطر الرادارات هههههه)
يعني للناس اللي ساكنين في بوظبي باخذ عنهم 300 درهم زيادة .. ( لمكان معروف وليس للمناطق الداخلية )
للزباين اللي ساكنين في العين باخذ عنهم 250 درهم زيادة .. ( لمكان معروف وليس للمناطق الداخلية )
للزباين اللي ساكنين في أم القيوين بضيف عليهم 70 درهم زيادة. ( لمكان معروف وليس للمناطق الداخلية )
للزباين اللي ساكنين في رأس الخيمة باخذ عنهم 150 درهم زيادة.. ( لمكان معروف وليس للمناطق الداخلية )
للزباين اللي ساكنين في الفجيرة باخذ عنهم 220 درهم زيادة.. ( لمكان معروف وليس للمناطق الداخلية )
الأسعار ما بين 170 و 350 درهم على حسب نوعية الطلب ( أنا بحدد السعر بالضبط عقب ما أعرف نوعية الطلب )
للإتصال مباشرة مع بوعوف على الرقم:
(6951591) ( 056)
ورجاء حاااااااااااااااار جداً اللي مب جاد لا يتصل نهائيا نهائياً
الطلبات بتكون في غاية الخصوصية والسرية
أخيراًَ أحب اراويكم مواضيعي في المنتدى
شنط حلاقة رجالية متكاملة:
وياريت من اللي يمرون على موضوعي يقولون كلمة طيبة ويرفعولي إياه يزاكم الله خير، ( الكلمة الطيبة صدقة )
والسموحة منكم
الله يوفقج إختي وشكرا عالمرور الطيب والجميل ، وانتي بعد متميزة في مشاركاتج
الله يوفقك شكرا عالمرور الطيب
ما شاء الله عليك مميز في مواضيعك و خدماتك
بالتوفيق إن شـــــــــــاء الله
توكلنا على الله سبحانه وتعالى