السلام عليكم و رحمة الله و بركاته
تماشياً مع الحملة اللي تقوم بها وزارة الداخلية هذي الايام ضد الاطارات التالفة او اللي انتهى عمرها الافتراضي و تم حتى الآن ضبط 2750 سيارة في اسبوعين فقط في إمارة أبوظبي !!
كلنا نعرف كيف محلات الاطارات المقلدة منتشرة بكثرة خصوصاً صوب الصناعية
و للأسف وايد شباب يتعاملون وياهم بحجة السعر الرخيص !
يعني الواحد فينا يستخسر يدفع 300 او 400 او حتى 1000 درهم زيادة
و ما يفكر بحياته او حياة ربعه او اهله اللي يركبون وياه 
و الكل يدري بالجو عندنا ما شاء الله خصوصاً هالشهرين .. زين يوم ان الاطارات الاصلية تتحمل !!
اتمنى من الكل يتفاعل مع الموضوع و يذكر لنا المحل اللي يتعامل وياه في تبديل الاطارات
و هل يشتري النوع الاصلي و لا يتجه للتقليد ؟!
هل كانت له تجربة سابقة مع اطار مقلد ؟ و هل لا سمح الله تعرض لحادث او انطر عليه التاير ؟!
و كم الفترة اللي يستخدم فيها الاطار تقريباً ؟
شخصياً بالنسبة لي اتعامل مع المسعود للإطارات التابع لشركة المسعود
و مكانه شارع الدفاع في أبوظبي و موجود في مصفح بعد و طبعاً اطاراته اصلية
و نوع الاطارات اللي استخدمها : بريجستون و استخدمها لمدة سنة و نص الى سنتين تقريباً
و بإنتظار تفاعلكم
انا استعمل ميشلن من فاست تراك الي فمحطات امارات فدبي , قبل كنت استعمل بريدجستون من السركال(محطات ادنوك) بس عيبهن فيهن صوت عالخط مقارنتن بالمشلن
الله يهدي الي يركبون تواير 900 لا ينفعن يوم تظرب بريك ويثجلن عالسياره , وفبلادنا عالحر ما يطولن , وفشتا يسلبن يوم الأرض خرسانه احيد واحد عنده نيسان جديم كان حذالي تم يظرب بريك ويهد كم مره قبل الدوار والموتر ساااير لو كان ورايه جان دعمني مع انه كنا نمشي 100
تسلم ظبياني عالموضوع الغاوي…
يعطيك العافية اخويه و تسلم على مشاركتك
و ان شاء الله تركب لكل سيايير البيت تواير اصلية
الي ابا افهمه ليش يتم ادخال اطارات مخالفه للموصفات واو تم شطبها من بلادها هل الامارات مكب للنفايات ؟
اعرف ريال ركب ال BFGoodrich على جيب رانجلر 5 سنوات حق البر
يفصخ التاير يرد يركبه، يربخه ويرد ينفخه يمشي عليه يوم كامل على ضغط هوا 12 او 15 ماشالله عليه اخر شي بنشر وهو ساير البداير والحمدلله كان بنشر بسيط لا شاحت الجيب ولا شي.
5 سنوات اتسخدام جيب فالبر والمدينه مب شوي الصراحه. عيبه يمكن شوي بس شوي صوت
انا مركب نفس التاير على جيب و الجيب الثاني حاطله ميكي تومسون وكلهن امريكيات وحق رمل وجبال.