السلام عليكم ورحمة الله وبركاته
حبيت اكتبلكم لعل وعسى القى الحل لموضوعي ،
لاني بصراحه مضايجه من الموضوع وايد ، حتى فكرت استعين بدكتور خاص يفهم شخصية ها الولد
ولدي طال عمركم عمره 8 سنوات
انسان اتكالي وايد يعني اذا يبا شيء لو كاس ماي يطلبه من الشغالة ، لو بيدش الحمام ( كرمكم الله ) يبا حد يوقفه لانه يخاف ، وايد يهزب وعصبي ويضارب وخاصه الشغاله تسمعونه اذا واعي بس معصب ومب عيابنه شيء !
طبعاً كل هذا كوم وياي انا كوم ،، ما يسمع رمستي مول كأني ما ارمس ولا انبه لشغله يعني اتم طول الوقت ازعج وشاطه عمري ، سو جيه ولا تسوي جيه واذا طلبت منه مساعده في شيء مستحيل يسويها ، كل شيء بأوامر بصراحه تعبت ،
المشكله خواته اللي اصغر عنه يالسين يتصرفون نفس التصرفات يعني كل ما اقول شيء اسمع كلمة (مابا)
استخدمت جميع الاساليب من مكافآت وجوايز وتحفيز ما فاد
استخدمت اسلوب الضرب ما ينفع
يعني تعبت
حتى الصلاه احاول اكلمه فيها قبل بعد يصلي وياي كمن فرض الحين لا يقولي بعدين ،
بتسألوني وين دور الاب ،
ابوه يداوم في ابوظبي يعني تقريبا غير متواجد الا في الويكند وهو يوم يرجع يكلمه بهدوء ومرات بشده لعل وعسى ينفع وياه بس للاسف
احسن تربيته صعبه ، الله يهديه
مشكله لو كبر على ها الطبع ما برومله ،
بعدين ما يحترم حد موووول من خواتي يعني ما يسوي قدر لاحد ، مشكلتي عاطفية ممكن اتم ما ارمسه بس نص ساعه تلقينه يا واتأسف واسمامحه بس من يكمل كمن دقيقه رد وجلب
ترى طبعه زين ويا الناس وهادي يعني اللي يشوفه يقول ها ما عليه ولا شيء بس في البيت ملعوزني مب بشغبه ، لانه غير مشاغب بس ما يسمع رمستي في شيء
اتمنى القى الحل الشافي لها الموضوع
والله يهديه ان شاء الله
بالنسبالي انا اشوف كلام اخويه ALAIN1001 عين العقل
وانا اتفق وياه في اسلوب الثواب والعقاب هو الحل الامثل من وجهة نظري
لانه الضرب عمره ما بييب نتيجه غير انه بيزيد عناده وخصوصا انه ولد
وبالنسيه للبرنامج لي يرمس عنه اخويه اسمه
سوبر ناني ——>> “super nanny”
وفي شي ثاني مهم حاولي تحسينه انه هو لي بيغدي ريال البيت
خصوصا في غياب ابوه .. وانه هو المسؤول عن خواته
يعني لو وحده غلطت فيهن ( وخصوصا لو كانت تسوي نفس الشي لي يسويه هو )
سأليه قوليله شو رايك انت باللي سوته اختك صح ولا غلط .. وشو مفروض نسويلها نعاقبها مثلا ولا ننصحها
وليش غلط لي سوته اختك
صدقيني هو نفسه بينتبه وما بيرد يسويه
يمكن تاخذ وقت هالسالفه بس بتيب نتيجه
وبعدين العين الحمرا مب دوم تييب نتيجه مره مرتين وعقب بيلبسج
بس كوني حازمه يعني اذا زعلتي لا تتهاونين بسرعه ..لا تقولين عاطفيه وماقدر .. ماعليه اضغطي ع عمرج شوي
راويه انج صدق زعلانه وخليه يوعدج انه مابسوي جي مره ثانيه
واسأليه اذا غلط مره ثانيه شو تباني اسويلك كيف اعاقبك يعني مثل ما قال اخويه خليه يختار عقابه
نصيحه اخيره اختيه وهي الاهم ..
الزمي الدعاااااااااااء .. فالدعاء سلاح المؤمن
كثري من الدعاء والاستغفار والله بيهديه انشاء الله ويصلح باله
وبالنسبه للصلاه جربي ادعي هالدعاء
((( ربي اجعلني مقيم الصلاة ومن ذريتي ربنا وتقبل الدعاء )))
كثري منه في السجوووود
وبإذن الله مابتندمين
السمووووحه لا طولت عليكم
ولا تنسونا من دعواتكم
ما عندي حل
لكن اقول الله يهديه ويجعله من الذرية الصالحه
مبدأ الثواب والعقاب هو الحل
والحمدالله عنده خوات
عندي فلسفه بسيطه : انا بحط عمري مكانه , اذا امي كل شوي تعصب علي و على كل شي وما احصل العقاب غير العين الحمرا فقط لازم ما بسيولها سالفه لاني عرفت العقارب الا كمن كلمة وخلاص او انها تزعل شوي
————————————————
لا تبحثين عن الكمالية الان , ما هى الاشياء المهمة التي تريدين ان يسويها وابداي فيها ولا تضغطين عليه وايد
والعقاب يكون :
1 / اشتري فليم يديد رسوم متحركة وفي الويك اند اشوفه مع خواته وهو ممنوع يشوفه…… حتى لو كلهم اول مره ما تخلينهم يشوفونه لو قلدوا اخوهم
2/ شراء اي لعبه بسيطه لافضل ولد هالاسبوع لان مثلا سمع الكلام او سوى اي شي اتشوفينه ايجابي
3/ اذا تمت الاسلوب نفس ما هو …… اتقوليله انا زعلانه وما ابا اسمع منك شي , ويوم ايي يستسمح منج اتقوليله
ماينفع هالكلام ولازم تتعاقب وانت للي بتختار العقاب وتخرينه بين شيئين هو يحبهم ( عدم مشاهدة التلفاز / او عدم اللعب مثلا خارج البيت اذا هو يطلع من البيت اهم شي يكون الشيئين هم يحبهم )
على فكره هذه الافكار شفتها على قناه ام بي سي 4 …….. في برنامج ناسي اسمه كان فعلا ممتاز وخصوصا للامهات والاباء للي عيالهم ما يسمعون الكلام واظن انها (مقدمة البرنامج ) منزله كتاب ومترجم بالعربي
انصحج انج تشترينها يفيد وايييد
اخوي اسمحلي بسؤال
وليش كانو اهلك متبعين الضرب ؟
وشو كانت نفسياتكم اتجاه اهلكم يوم كانو يضربونكم ؟وهل تتوقع هالجيل راح يتقبل
هالامر شراتكم ,اظن في زمنكم الاوضاااع كانت وايد مختلفه عن زمنا
وتأكد لو كان الضرب حل جان الرسول ضرب وصرخ حين ربى اطفاله
بالعكس الرسول اللي هو قدوتنا أمر بالرحمه للحيوان فما بالك باللي هم اغلى الناس ؟؟!!
الطفال محتاجين تفرغ ,محتاجين احتواء يجب على الاهل يسمعون لعيالهم لو على غلط
خلهم يغلطون ترا دامكم وياهم في الاخر راح يرجعون لحضنكم ..
كل الاهل يبون عيالهم مثاليين
لكن السؤال هل الوالدين هم بعد مثاليين ومؤدين حقوقهم في تربية هالعيال ؟؟
ترا والله الاهتمام والتفرغ اهم من اي شئ ثاني ,
عندج خيزران اصلخي يلدة ماشي الا هل حل و صدقيني بيسطلب
على ايامنا نحن تربينا عالضرب
وحمدالله انتي بروحج بتلاحظين الفرق بين جيلنا و هل جيل
هل جيل دلع