السلام عليكم و رحمة الله و بركاته .
لظروف قاهرة خارجة عن السيطرة و ادارة الأمة البشرية بعد اعصار كاترينا و فيضانات باكستان
المرور قام مشكورا بحجز سيارتي …. والله ما سويت شي “” مزلوم والله مزلوم “”
اللهم هي كم اشارة حمرا و تشكيلة رادارات بسرعات مختلفة مع باقة من الوقوف في الممنوع
بس كل هذا كووووم. و تركب التاكسي كوم ثاني .
سوال بريء يطرح نفسه : سواقين التكاسي في أبوظبي … أكيد معهم لياسن من المرور ” مرور أبوظبي اللي نحن نعرفه … … واللي كان يطلع أرواحنا لين تمسك الليسن بايدك “
الله يرحم الزمن اللي كان الضابط يمتحني في عدد خطوط الشارع … عدد الشجر و الاشارات المرورية اللي في المريخ … و لفات الرالي … قياس المسافة اللي بين سيارتك و سيارة اللي في المكسيك !!!
يعني هم يومين ركبت فيهم التكاسي … والله ختمت القرآن فيهم و قلبي بين رجولي صار غير الأزمات القلبية و التشنجات اللي تصيبني في الرحلة الحلزونية من التكاسي
على سبيل المثال و ليس الحصر :
1- كل اللي ركبتهم … يقولك : أنا مافي معلوم مكان … نفر جديد
2- يدور أطول صف سيارات و يوقف فيه … تسأله يروح السيد الثاني . تنزل غباء الكرة الأرضية عليه فجأة
3- رجله على البريك متناغمة مع دقات فلبه … كل ثانية بريك بريك بريك …
4- كل دريول تكسي … يحسب الشارع شارع أبوه … يمين يسار … لا اشارة ولا هم يحزنون
5- اذا تكسي من شركة كسر عليه دريول من شركة منافسة … اسمع أنواع المسبات و الموشحات و أشعاز المتنبي في وصف تخلف دريول الشركة الثانية.
6- توتر الدريول يخلي دمك ينشف في ثواني … تحسه من أي حركة في الشارع ” يتفاجأ ” و البريك من النوع اللي يخليك تلصق في الجامة …. …. بعدين تسمع منه ” سوري سوري سير ” أو ” سوري . هازا هيوان امشي هالشكل …. …. ممكن هيوان تصير ” خياوان” حسب شدة المفاجاة على الدريول
و السبب : واحد طاف جدامه و بينهم مسافة 500 متر !!!!
و الكثير الكثير اللي من لما أنزل من التكسي أنساها … لأتفرغ لصلات الشكر لله على الوصول بالسلامة بعد الأخطار المحدقة بي بسبب التكاسي … … اللي وجدت لتسبب الأزمات القلبية الجلطات و السل و الطاعون للركاب
هل هذا الشي يصير مع الجميع … … أو أنه أنا اللي صابتني فوبيا و رهاب التكاسي
و خاصة اني كنت أشوف مسلسل حياتي في كل تكسي أركبه
هذا درس لك …. عشان اتحرم أطوف الإشارات
ماذكر متى اخر مره ركبت فيها تكسي ….. بس من وصفك الواحد مايفكر يركب تكسي …
انا اعيش هالحالة دوم
بالضبط نفس المواقف الي استويت واياي يوم وديت سيارتي للصيانة
ركبت معهم مرتين وقلت ما اذا يوم ثاني السيارة تمت في الوكالة بأجر سيارة من مكتب
انا متأكد انه ما معهم ليسن من طريقة القيادة تحسه يسوق سيكل مب سيارة
الله يعينكم الصراحة
اسلوبك حلو في الكتابه
بس ياخوي تحمل هذا الدرسةتعلم منه وراك اهل وخاف علي نفسك من قطع الاشاير قبل متقول انا سويق فكر في الي جنبك كيف يسوق
وذا علي اتكاسي الحال من بعضه حتي في دبي نفس الحال وتكاسي الشارجه و عجمان اخس يشحب الموتر وهو ساير