بسم الله الرحمن الرحيم

انا بدخل فالموضوع بدون مقدمات لاني بصراحه معصبة من موقف صار لي توه قبل ساعه

الموضوع ومافيه القرار اللي اصدره مجلس ابوظبي للتعليم
واللي يخص معلمات المرحلة التأسيسيه من الصف الاول للخامس الابتدائي
واللي هو ان دوام الطالبات ينتهي الساعه ثنتين وربع
ولكن يستمر دوام المعلمات الى الساعه اربع الا ربع العصر!!!!!!!!!!!

بصراحه هذا شي بعيد عن المنطقيه والعقل والرحمه والعدل؟؟؟
هذا القرار صدر قبل 10 ايام تقريبا
ونحن مستمرين نداوم للساعه اربع الا ربع يوميا ماعدا الخميس
بدون اي هدف؟ شو الفايده من هالزياده نحن مانعرف؟
اذا كان قصدهم التطوير المهني فـ التطوير المهني يكون يوم واحد بالاسبوع
واحنا ماعندنا اعتراض على انه يكون عندنا يوم واحد بالاسبوع نتأخر فيه للساعه اربع؟

واذا كان قصدهم التحضير
الله يخليكم خبروني
كيف أحضر دروسي وانا في قمة التعب والانهاك والارهاق والعصبيه والمزاج السيء بعد يوم دراسي طويل مر علي وانا واقفه على ريولي طول الحصه (وطبعا كل مدرسه عندها تقريبا 4 حصص فاليوم) وطبعا صوتي راح وانبح وانا اشرح واسكت فلانه وافهم علانه واعصابي تلفت وانا اجهز واحضر وتركيزي كله فقدته طوال هالوقت
اخر شي يطلبون مني احضر الساعه 2 ونص للساعه 4؟ وانا في قمة التعب؟؟؟
بالذمه حطو نفسكم في مكاننا هل تقدرون تحضرون دروسكم لليوم الثاني بهالوضع؟
اوكي بنحضر دروسنا غصبن عننا لكن هل بيكون في تحضيرنا اي ذرة ابداع؟ هل بنسوي اوراق عمل حلوة وتفتح النفس؟ هل بنحضر بور بوينت و عروض وغيره وغيره كثير اشيا مطلوبه مننا؟ كيف ابدع وانا فاقده اهم شي؟ تركيزي وطاقتي؟ ورغبتي اصلا في اني اسوي هالشي؟

طبعا هذا كله حمسني انا ومن معاي من المعلمات في مدرستي اننا نكتب شكوى ونكتب اسامينا ونوقع عليها
ونرسل الورقه للمدارس المجاورة ويوقعون باساميهم عليها
وطبعا الكل وافق والحمدلله
وقعنا وكل شي الا ان وصلت الورقة للاداره؟ حبينا نبلغهم بالموضوع عشان يكون عندهم علم باللي يصير

واللي صار انه المديره عصبتتتتتتتتتتتتت وانفجررررررررررت وقالت لنا بالحرف الواحد (انتو تبون تتفنشون؟)
ليش نتفنش؟
احنا قتلنا طالبه؟ تحرشنا في حد؟ سبينا؟ ضربنا؟ سوينا شي غلط؟
ردت علينا انه اي حد يسير المنطقة يشتكي على اي شي يكون الرد عليه (اذا مب عاجبكم استقيلو غيركم وايدات يتريون الوظيفة وبيداومون حتى للساعه 9 فالليل؟)

معقول؟ الحين اذا احد تضايق من قرار او من شي يكون الرد عليه بهالطريقة؟؟؟؟؟؟؟؟؟؟؟؟

طيب انا ماسويت اضراب؟ ولا اعمال شغب؟ ولا اي شي
انا كتبت شكوى باسلوب مرتب ومنسق و(مأدب)
ليش يكون الرد علي انا واللي معاي فوق ال 30 معلمة بالتفنيش مثلا؟؟؟؟؟؟؟؟؟؟

ليش وزارة التربية ومجلس ابوظبي للتعليم بالذات اللي محد يقدر يفتح فمة بشي خوفاً من التفنيش؟

ليش كل ماتكلمت المدرسه هددوها بالتفنيش؟؟؟؟؟؟؟؟؟؟؟؟؟؟؟؟

احنا مب بشرر؟؟ مالنا رب؟ مالنا راي؟ مالنا حرية نعبر فيها عن راينا ورغبااتنا؟ مالنا حقوق؟ مالنا حق ندافع عن حقوقنا و(طاقاتنا المستنزفه)؟؟؟؟؟؟

اذا اليوم اتصلت مدرسه على استوديو واحد تشتكي وتقوله عيالنا فالبيت من يربيهم وكان رد المذيع الله يسامحه (ضحو عشان الوطن)
نضحي بعيالنا مثلا؟؟؟؟

ليش عيالنا مب هم اللي بيمثلون الوطن باجر؟؟؟؟
مب عيالنا هم اللي بيبنون الوطن؟؟؟؟؟
مب احنا فالمدرسه نربي عيال الناس؟؟؟؟
ونرضى ان عيالنا غيرنا يربوهم؟؟؟؟
وياليت غيرنا محط ثقه؟؟؟؟؟ ترا نحن نرمي عيالنا فالبيت عند الخدم؟

والله توه اول اسبوع من تأخير الدوام والا معلمة تقول بنتي كانت نايمه فالباص ومانزلت وماكتشفو هاشي الا متأخر
ليش؟
لان الأم فالدوام متأخره
هل يرضى مغير وغيره ان البنت هذي لا سمح الله تختنق داخل الباص و(نضحي) فيها
عشان (نحضر) دروس باجر؟؟؟ او عشان (التطوير المهني)؟؟؟؟؟؟؟؟؟

الحين بالذمه مب الافضل انهم يقللون نصاب المعلم الي 18 حصه بدال 24 حصه فالاسبوع
مب ساعتها عالاقل بنلقى وقت نحضر فيه
لا ونحضر التطوير المهني
ونروح محاضرات
ونسوي كل اللي يبغونه؟؟؟؟

طيب شي ثاني
انا ربيعتي قاعده تكمل دراستها (ماجستير)
واضطرت هالفصل توقف
وخذت عليها الكليه فوق ال 16 الف درهم لانها سجلت وماحضرت
ليش؟؟؟؟؟؟؟؟؟؟؟؟؟
لان مجلس ابوظبي للتعليم يبغي (يطورها مهنيا) داخل المدرسه
وطبعا في مجلس ابوظبي للتعليم مافي شي اسمه تفريغ ولو عالاقل ساعتين فاليوم للدراسه
لا وعلى اساس احنا (ندرس) اجيال وماندرس نفسنا
وفوق هذا كله يبون تطوير مهني؟؟؟؟؟؟؟؟؟؟؟؟؟؟؟؟؟

ارجع واقول باب النجار مخلع

اووه صح نسيت شي هههه من العصبيه
لما كنت اكلم المديره قلت لها انا بكلم الاعلام والجرايد عن هالموضوع

ردت علي (ممنوع على اي مدرس انه يكلم الاعلام)
ليييييييييييييييييييييييش؟؟؟؟؟؟؟؟؟؟؟؟؟؟؟؟؟؟

ليييييييييييييييييييييييييييش كل شي ممنوع علينا؟
ممنوع نشتكي
ممنوع نكلم الاعلام
ممنوع نتكلم
ممنوع نفكر بنفسنا
ممنوع نفكر بعيالنا
ممنوع نفكر براحتنا

لكن
مب ممنوع يكرفونا
مب ممنوع مايرحمونا
مب ممنوع يحملونا فوق طاقتنا
مب ممنوع يظلمونا
مب ممنوع يظلمون عيالنا واهلنا
مب ممنوع يضحون فينا وفي عيالنا

تعبنا والله يا مجلس ابوظبي للتعليم
وعن نفسي افكر جديا بالاستقاله
حالي حال غيري وايدين
والله يستر على عيالنا

للعلم
حتى الاجانب رافضين الزياده اللي صاره وكلهم يبون يشتكون معانا
يعني لا يقولون بس المواطنين
لا وابشركم
وحده من الاجنبيات ماتحملت الوضع ورجعت بلادها وقالت مااااااااااقدر اداوم بهالطريقه

فالاخير
اتمنى من اللي قاعدين على مكاتبهم يطلعون ويشوفونا نحن شو نسوي
واحلم <<< مجرد حلم طبعا
انهم يستلمون مهماتنا وجداولنا وصفوفنا لمده شهر واحد بس
لعل وعسى يحسون فينا ويرحمونا ((هذا طبعا اذا قدرو يستمرون شهر كامل))

والسموحه منكم

19 thoughts on “ارحمونا يرحمكم الله يا مجلس ابوظبي للتعليم << المعلمين والمعلمات للضروره القصوى

  1. شو هذا الفشل يا مجلس ابوظبي للتعليم؟؟؟

    ولين متى ؟

    أتمنى تغير الطاقم الي الكل عارف عنهم من وين مستوردين شهاداتهم العلمية !

    الامور اصبحت مكشوفة للجميع ولابد من أتخاذ قرار رادع وفوري لتغير السياسة التعليمية لانها فاشله بكل معنى الكلمة والكل عارف هذا الشي.

  2. ان شاء الله خير ياختي تفائلي بالخير
    مايحتاي الردود
    الموضوع الي كتبتيه اعتقد يكفي
    احساسي يقول ان الورقة لو وصلت الاعلام . بتتغير امور وايد
    لو المذيع قرء الورقة اعتقد انه بيسحب كلمته الي ذكرتيها
    لانه مب حاس بالوضع الي انتو عايشينه
    لكن لما يقرء الي مكتوب بيحس بالمعاناه
    انتي في كل الحالات مب خسرانه شي
    يكون الموضوع يتناقشه الاعلام وعلى الملئ افضل برايي من المنتديات بكثير ياختي
    اتمنى لكم التوفيق

    انا بجرب

    والباقي على الله

    ترا مابقا شي ماجربناه مب خسرانين شي

  3. ياخوي احساس الشارجه

    انا ربيعتي تخبرني اليوم عن استوديو واحد

    وحده متصلة تشتكي وتقول عيالنا فالبيت محد عندهم

    تعرف شو كان رد المذيع؟؟؟؟؟؟؟؟

    قال لها (ضحو عشان الوطن)

    يعني انا ماعرف هل عيالنا خارج نطاق الوطن؟

    ولا هل عيالنا هم (كبش الفداء) اللي نضحي فيهم عشان الوطن؟؟

    طيب الوطن هذا مب عيالنا اللي بيكملون مسيرته باجر؟؟؟؟؟؟؟؟؟؟ كيف نضحي فيهم اذا كانو هم الوطن اصلا؟

    معناتها احنا ضحينا بمستقبل وطننا عشان شي اصلا احنا مانعرف شو هو

    عالعموم اخوي انا بسوي اللي قلت لي عليه

    وبطبع الموضوع بالردود بكل شي

    وبطرشه حق استوديو واحد

    رغم اني غاسله ايدي منه

    لان استوديو واحد ماعاد هو نفسه استوديو واحد

    ان شاء الله خير ياختي تفائلي بالخير
    مايحتاي الردود
    الموضوع الي كتبتيه اعتقد يكفي
    احساسي يقول ان الورقة لو وصلت الاعلام . بتتغير امور وايد
    لو المذيع قرء الورقة اعتقد انه بيسحب كلمته الي ذكرتيها
    لانه مب حاس بالوضع الي انتو عايشينه
    لكن لما يقرء الي مكتوب بيحس بالمعاناه
    انتي في كل الحالات مب خسرانه شي
    يكون الموضوع يتناقشه الاعلام وعلى الملئ افضل برايي من المنتديات بكثير ياختي
    اتمنى لكم التوفيق

  4. ما دور وزارة التربية والتعليم……………. تدمير الناطق التعليمية

    ما دور المناطق التعليمية ……………..تدمير المجالس التعليمية

    ما دور المجالس التعليمية …………….. تدمير المدرسين والمدرسات ( بقرارات همجية وغير مدروسه )

    ما دور المدرسين والمدرسات …………. تدمير الطلاب والطالبات (بقرارات المجلس بالمنهج الجديد)

    اختي الله يعينك على مصيبتك نحن الاباء لنا مصائبنا من الكتب الغير مفهومه وين الايات والاحاديث والقصايد لا وبعد حذفوا عنالبنات التربية الاسرية الي كانت تتعلم الطبخ والخياطة وغيرها

    اصحاب القرارات لا يعلمون عن الواقع او الميدان التربوي يجب ان يسمع الوزير او المدير للمنطقة راي المدرسات او عمل احصائية لمعرفة ما مقدور اصدار القرارات

    اصحاب القرار في مكتب اولاده بايدي امينه لانهم ابناء الوزير اوالمدير الفلاني وفي البيت لا يرى رقعتهم ابدا ممكن في الاسبوع او الشهر يقعد معهم شوي مشغول بان تكون الامور تمام التمام 100% عندما تقدم للشيوخ لبياض الوجه

Comments are closed.