اريد كراج مختص للفتك سوبر سفاري ..تصليح وتجييك

السلام عليكم

يا الربع يا حبايبنا .. اريد حد عنده خبرة في الكراجات .. او الوكاله ؟؟

انا عندي نيسان فتك سوووبر سفاري موديل 2007 …

المشكله انا شارنه مستعمل …

والله يسامح اللي باعني اياااه بصراحه احس انه باعني المووتر بسعر غالي

لانه الموتر كان فيه حادث من الامام … بمبر وشبك وعفصه عالبونيت من جدام ..ههه

المهم انا شريت الموتر بشهر 4 ….

يعني قبل خمس شهوور وكم يوووم

والريال قال انه الموتر نظيف وكان ماشي 61 ألف كيلو ..

وفل اووبشن جلد ودفلوك وفتحه وكل مواصفات السووبر ولونه ذهبي ..

المهم الريال قال الموتر 100 بال 100 والتصليح وكاله والخ الخ

المهم انا حليلي كنت محتااي مووتر لاني كنت بايع الاستيشن مالي وبخاطري آآخذ فتك

ويوم حصلت الاعلان على طول اتصلت والريال عطاني من هذاك الكلام المعسل اللي من طرف اللسان اللي مايوّدي مكان …. ههه

وقال الموتر مرّه مافيه حيلة ومظبوظ والخ الخ . وخبرني عن الحادث اللي على قوولته بسيط

قلتله بشووف الموتر ..

طبعاً يوم ييت اشووف الموتر .. كانت هاذيج الايام ايام مطر والمووتر من برّع ما يتشاااهد يعني اتعرفون يوم يطيح المطر والشواع فالموتر ما يبّن البدي ماله اذا فيه شي والا شي

المهم خبرني وقالي انه الاير باج مال الكرسي مال السائق اللي عالطرف طالع .. قلت له وشو اللي طلّع الايرباق .. قال انه واحد من ربعه متين مادري شو سوّى وطلع الايرباق مال الكرسي … قلت ماعليه مشيّت مسكين على نيّاتي …

المهم خبرني بمكان الحادث والضربات اللي صارت وانه تم تصليح السيارة وشغل وكاله …

عطيته عربوون … وبالباجر سرت هو سوّا التسفير وكل شي … وييت واستلمت الموتر والمووتر كان وصخ ما يتشاهد … وديته من العين لين دبي …. وسجلته فدبي وكل شي والريال كان مب مقصر كان فاحص الموتر فدبي وكل شي يعني … يعني انا سرت وسجلت وسويت الارقام والبيمة …

المهم سرت غسلت السيارة …

وعقب شفت ضربة فالباب مال السائق .. ضربة حصاااة .. والباب فيه بعض الشمووخ فالصبغه يعني ..
قلت مايخالف ..

طاااف ..

شفت الكشافات مغبّرة … قلت يمكن يبالها تنظيف ….

بس ويوم احترقت اللمبه مال الكشاااف اشتريت لمبه اصلية وبدلتها بس ماطاعت تركب ؟؟ قلت شو السالفه ليش ماطاعت تركب اللمبه .. مع اني شارنها من الوكاله ..

طبعاً الحساسات اللي جدام ماكانت تشتغل … .. استغربت ليش ماتشتغل الحساسات

المهم طلعت الكشّافات تجارية قلت يا سلام هذا تصليح الوكاله ؟؟؟

طلعت الحساسات تجارية قلت ايوا زين زين ..

المهم والهرن مال السيارى كان تعبان ..

وانتوا اتعرفون انه سامان النيسان غالي بالمقارنه مع الاستيشن … اكثر شي دبل وتربل فالسعر بين النيسان والاستيشن

المهم .. وديته الوكاله والله جيكته بأكثر عن 5 آلاف ونص ..

وعقب اشتريت كشافات وكاله واللي مب مصدق انها سعر الكشافات 1500 درهم يسير قطع غيار الوكاله ويسأل …
والهرن ب 450 درهم …

الحساسات ب 1200 .. ولازم اشتري الحساسات كامله مع السستم ما يستوي اشتري حساسات بروحها من دون السستم …

انزين … قامت تطلع عندي تقرقيعات فالبودي … بدلت بوشات بودي …

بدلت جامبيلات ..

بدلت دبّة سايلنسر حق الكزوووز .. ب 800 درهم … وكاله

انزين وطبعاً عقب صرت اعاني من السفايف والاصوات .. والسبب مال الوكاله هم خرطولي الدرامات وشغلهم كلك وللحين اعاني ..

من غير شي صووت عندي صووب القّبة .(( السقف )) من الداخل تقريبا صووب الفتحه او بجانب الفتحه .. نفس البرغه اللي راخي ويوم اتمشى بالسيارة يتم يتحرّك فيطلّع صووت قرقعه وانا ما احب موتري فيه اي صوووت موولية اعافه والله ..

المهم عقب بدّلت تحطيط وكاله مال السووبر موديل 2009 مع التركيب ب 2100 درهم

ومن شهر وديت موتري فاست سنتر سيرفس . اللي فصناعية راس الخور فدبي ..
وسويت له فل فل سيرفس … وطلع عليّ ب 4500 درهم … ولكن للاسف السفايف بعدها اتطلع صوووت بين وبين … والقرقعه اللي بالسقف ماعرفوولها ..

من غير والله خسرت على الموتر فالميزانيات اعوووذ بالله هلّكني والله … من الرقله كل ما اسير مكان يخترعون فالموتر ويمثل ماهووو ..
كم مره كبست رودات وميزانيه والخ الخ ومب شي ..
اخر شي غيّرت تواير وكبس رودات وميزانية ارضية والحمد لله الموتر عال العال

بس اللي اريد اعرفه الحين عشان اصلّح موتر فمكان زين ونظيف وشغلهم مضمون ونظيف … وما يخترعون بالسياره ؟؟ وين اوّديه …

اذا الوكاله . اي وكالة اوّديه .. المسعود والا الرستماني .؟؟

الرستماني اللي فشارع الشيخ زايد اغسلوا ايدكم منهم هم خرّبولي الموتر

او اذا فيه كراج زين وين ؟؟؟ اللي عنده خبره الله يخليكم يخبرني ؟؟؟

المشكله انه شي ناس يمدحون بعض من الكراجات ؟؟ بس بصراحه الكراجات اللي يمدحونها يمكن مختصه حق سيارة معيّنة ومب بكل السيارات ؟؟

واللي اشووفه انا بصراحه احس انه موتري محد يعرفله …

قبل عندي استيشن وياما شكيت من بعض الاصوات ويوم اوديه الوكاله مايعرفون ..او يخترعون ويخلووني اغيّر شي ثاني ومايخصّه وبالاخير انا الخسران

والكراجات نفس الشي يقولون العطل من الشي الفلاني ويوم اغيره نفس الشي يعني يخسرووني فووق الخسر خسر ..

والمشكله الوقت ؟؟؟؟ يعني اتعنّى واضّع وقتي وغير وقفة السيارة فالكراج وبالاخير … لازم فيها عووق

يعني ماتكون 100 بال 100

والله المستعان

نصيحتي لكم لاتضمنون كل من يبيع سيارته …. يمكن يكون مرّجع الكيلو .. او فيها حادث ومايقول … او الخ الخ ..

ولكن بعد مازال شي ناس عندهم ضمير وعندهم ذمة ويعترفون بكل شي صار للسياره …

الله يهدينا ويرحمنا ..

والله ساعات افكر ابيع موتري …

بس لو بعته .. بكم بابيعه ؟؟؟ والله ماخليت شي الا وغيرته ؟؟؟
خسّرني خسر والله

وفووق هذا انا شارنه غالي … وخاسر عليه فووو ال 25 الف من يوم اشتريته ……

الله المستعاااااااااااااااااااااااااااااااان

والسموحه طولت عليكم ….واللي يبا يعتبر ؟… للعبره هذي قصّة معاناتي مع الفتك