السلام عليكم ورحمة الله وبركاته
حبيت استفسر عن تجارة سمعت بها بس ما عندي خلفية واضحة فيها وهي “تجارة الوره “. ان شاءلله اكون كاتبتها صح
اللي اعرفه ان في ناس شروا شاحنات واللي شرا سيكس ويل ب 280 الف او اكثرو أجرها ع شركات المقاولات وتدخل عليه ماشاءلله تقريبا 70 الف في خلال 6 اشهر.بس انا شخصيا مب مـتأكدة من هالكلام اذا صدق مردودها قوي ولا الناس تبالغ؟؟؟؟؟؟ انتوا شو تشوفون؟؟
وسمعت ان لهالتجارة مخاطروعادي ايطيح السيكسويل في جبدي وما تتأجر على شركة لان الوره لها مواسم .بس معظم اللي سألتهم ينصحوني بأني أاجرها على شركات المقاولات اللي في دبي لانهم محتايين للسيكسويلات على طول السنة يعني اخلص من تأجيرها من شركة الا تاخذها شركة ثانية واتدخل عليك في السنة ارباح.وانا في خاطري اوكل لي شخص يفهم في الشاحنات و يشتري لي هالسيكسويل ويأجره ع شركات وله عمولة مني لاني انا مالي في هالمواضيع وهالتجارة بعيدة عن ميولي
فانتوا شو رايكم بهالتجارة ؟ تنفع ولا ما وراها غير وجع الراس
وابا خلفية عن الموضوع اكثر لاني كل اللي عندي قلته وما اعرف عنها شي ثاني ، اخاف اشتري السيكسويل وايلس من عقبها ع الحديدة واتوهق
بس اناا اعرف انكم ما بتقصرون وياي
السلام عليكم ورحمة الله وبركاته
جزاكم الله خير ياشباب على هذا التعاون الملحوظ وعلى المعلومات الطيبة
وان عندي ملاحظات بسيطة عن الموضوع وبعض التعديلات وذلك من خبرتي المتواضعه في هذا القطاع .
الفكرة بشكل مختصر في حياه الشيخ زايد بن سلطان ال نهيان رحمة الله علية ومن منطلق توفير الحياه الطيبة والكريمة للمواطن وباذات الارامل والمطلقات والعجزه والمحتاجين قرر المرحوم انشاء اقسام في بعض الجهات الحكومية بأستاجار المركبات والشاحنات والباصات عن المواطنين وبدورها تقوم اما بتاجيرها للشركات او لاستخدامها مقابل مبالغ نقدية مغرية واذكر لكم بعض الجهات:-
1- البلدية
2- الاشغال
3- الماء والكهرباء
4- الدائرة الخاصة
5-المرور
وبعد مرور عدة سنوات على هذاالموضوع وتغير السياسات والظروف انقرضت معضم هذه الاقسام وتم الغائها .. ولم يبقى منها الا القليل …
بالنسبة لاداره المرور والترخيص تقوم باستأجار المركبات من المواطنين وتاجيرها لشركات المقاولات العامة (الغير وطنية )وتحت اشرافها دون تدخل صاحب المركبة .
الخطوات :-
1-يتقدم الشخص بطلب تسجيل لدور بالوره ويتم اعطائة رقم دور …
2-بعد مايطلع الدور يخيرونك اذا تبغي سنة كاملة لازم تحظر سياره جديدة من الوكالة (زيرو) واذا تبغي ستة شهور تحظر سياره مايقل موديلها من اربع سنوات .
3- بعد ماتسجل السياره باسمك تسلمها للمرور ومالك علاقة باي شي ثاني ما عليك الا تستلم الشيك اخر الشهر .
4- بعدما تنتهي مدة الايجار او العقد يتصلوبك من المرور لاستلام السيارة وفوقها مبلغ للصيانة بعد ان يتم التقييم من كراج او وكاله معتمدة لدى المرور .
(في حالة حدوث حادث/سرقة/حريق/اي شي لا سمح الله يكون تحت مسؤولية الشركة )
………………………………………….. ………………………………………….. …………………………
بالنسبة لتاجيرالشاحنات والمعدات للشركات عن طريقك مباشرة :-
اذا بتلاقي عقد يشمل الصيانة والاعطال والسائق والمحروقات (الديزل/البترول) بدون تغير طبيعة اوظروف العمل وتكون مدة العقد طويلة مصدق من المحكمة توكل على واشتر السيارة
لاتنسى البلد مقبلة على نهضة عمرانية جبارة وفي طلب كبير على الشاحنات والمعدات
واي استفسار انا حاضر …
اخوي uaefalcon والله انك وفيييييييييييت وكفييييييييييييت ، جعلها ربي ف ميزان حسناتك يارب
يعني من كلامك احس السالفة تجارة ناجحة بس الواسطة تلعب دور عسب يردون علي بسرعة ويطلبون السيارة اللي عندي، وجي معناته اذا حبيت ابدا هالتجارة ابداها بالبيكب احسن لي عسب اشوف اذا اقدر امشي معاهم ولا لأ عقب افكر بالشاحنات العودة؟
مرة ثانية اخويuaefalcon اشكر تعاونك معايه واتمنى الكل يتعاون بطرح افكاره ويفيدني في هالموضوع مثل ما افدتني
مرحبا
بالنسبة يا اختي للورا , هذي كلمة تداولوها الشواب يوم فتحوا باب للتسجيل المركبا ت العمومية وتاجيرها في ادارة المرور والترخيص لمساعدة الناس المحتاجين( انا ما ادري انتي تقصدين الورا اللي في ادارة المرور والترخيص ولا شي غير ) عالعموم الورا اللي تديرة ادارة المرور والترخيص كالتالي:-
الموضوع هو الزامي لجميع الشركات العاملة في الدولة واللي عندها مشاريع اكثر من مليون درهم يعني اي شركة عندها مشروع بقيمة مليون او اكثر اجباري انها تاخذ سيارة لمدة ستة شهور من ادارة المرور والترخيص طبعا هالسيارات ملك للناس مش للشركات ولا للمرور والترخيص وكل سيارة لها مبلغ معين يعني السيارة واحد ونص طن الاجار الشهري تقريبا 4500 درهم اما البيكب دبل كبينة 5500 درهم اما السيارات 3 طن ب 7500 درهم اما الشاحنات اعتقد انها بقيمة 25000 الف او 20 الف تدفعها الشركات المستاجرة لصالح المالك عن طريق ادارة المرور والترخيص طبعا في عقد اتفاق وتاجير بين الشركة والادارة الترخيص واذا اللة وفقج واتصلوا فيج وقالولج ييبي السيارة الادارة المرور فبالعكس هالشي وايد زين ومفيد وفي ربح حلو وايد خلال مدة قصيرة والشركة هي الي تتكفل بجميع اعطال وحوادث السيارة خلال عقد الاتفاق ,,, اما اذا انتي بطريقتج بتاجرين السيارة على الشركة فيمكن يكون هناك اخطار ويمكن تكون القيمة اقل ولازم الشركة تتستاجر سيارة من ادارة المرور الزامي لان هناك دوريات شرطة يمرن على المشاريع المقامة في امارة العين وابوظبي ( طبعا انا اتكلم عن العين وبوظبي) وياخذن اسم الشركة التي تدير المشروع وكم صار لها في المشروع وكم قيمة المشروع كل هالبيانات وبالتالي يتم استبيان الشركة هل استلمت سيارة ولا لا اما الامارات الثانية ما عندي فكرة ,,, وبالنسبة للتسجيل كاتالي:-
1- اولا تقومين بتسجيل اسمج في قسم تسجيل المركبات العمومية( التاجير)
2- لازم تكون خلاصة قيد وصورة جواز
3- احيانا قد يطلبون ملكية السيارة واحيانا لا
4- الانتظار لحتى الوصول الى الدور وقد يستغرق اعواما وسنينا .
هذا شرح بسيط عن طريق تجربة مريت فيها وخذت فكرة وااللي عندة زيادة شرح ياليت ما يبخل علينا
وشكرا
اخوي Secure اولا اشكر ع تفاعلك معايه
ثانيا انا يوم قلت اني مالي في هالمواضيع لاني بنت ومالي تجارب سابقة في الوره و قلت بعيد عن ميولي وانا ماجذبت في هذي اني ما سبق لي اني افكر بهالاشياء في موضوع يخص الشاحنات والور وما عندي حد من اللي اعرفه يشتغل في هالتجارة …
بالعكس اخوي انا حابه اخوض في هالمجال وابا اتاجر في الوره بس مشكلتي اني ما عندي خلفيه فيه وابا ادرس الموضوع صح وآخذ نصايح ناس لهم باع في هالموضوع
مشكووووور اخوي مرة ثانية على نصيحتك لي ^_^ واتمنى الكل يشاركني