السلام عليكم و رحمه الله و بركاته
اقترب موسم البر و البرد و الايام الجميله .. ولاكن ما شد انتباهي هي اسعار البقيات التي تتجاوز اسعارها اسعار افخم السيارات مع انها لاتوجد فيها الفخامه ولا الجمال وخاليه من معاير السلامه التي توجد في اقل السيارات سعرا …الاسعار هذي غير مبرره .. و الامر من ذالك انها تستخدم مره في السنه في موسم ايامه لاتتجاوز ال 3 اشهر اقصاها
استغربت عندما رأيت ان بعض انواع البقيات تتجاوز اسعارها 200,000 درهم
تعتقد لو ان احدى الوكالات مثل الرنج او ال بي ام او غيرها صممت من هالانواع بكم ستعرضها للبيع
وكم تكلفه هذه العربه بالاربع عجلات و محرك مقارنه بالسيارات التي تصنعها
يا ناس اتقوى الله و عن البطره .. حتى اني من فتره رأييت اعلان في الموقع عارضنها ب 230000 درهم … الصراحه لو لفلوس سارقنها ما بشتريها بالهسعر ههههههههههههههههههههههه
دخل رنج ولا اكس 5 ولا اي قوروييل البر
بنشوف اذا بيمشي نفس البقي
بنشوف اذا تقدر تشله ركز نفس البقي
بنشوف اذا تقدر تقفز كيلو في السما و تحل ع الارض و ما تحس ف شي نفس البقي
و اخيرا بنشوف شو هالسيارة اللي بتسويبها كل هذا و بتظهر صاحيه من البر نفس البقي
هذي هوايه حق ناس و اللي يحب هالاشياء عادي يكون عنده هوندا ب 30 الف درهم بس عنده بقي ب 200 الف
و على قولت الأجانب Expensive toys for rich people
ما سألت نفسك ليش البتلي الأرناج و الآزور و البروكلاند أغلى عن عن البنتلي جي تي ب بالضعف تقريباً؟ لأنهم صناعة يدوية.. و البقي نفس الموضوع، بتحصل الرخيص و بتحصل الغالي و بتحصل اللي لو انجلبت طحنت اللي فيها لأن المواد و اللحام تعبان و بتحصل اللي لو انجلبت على 150 فريمها ما بييبه شي،
البقي اللي يغليها عدة أشياء:
1- المكينة: على حسب اختيارك من 4000-5000 دولار لين 50000 دولار و فوق على حسب القوة المطلوبة.
2- القير من 4000 دولار و رايح لين قير الآلباين بذيج القيمة.
3- الفريم و الشاصي: تحصل اللي يبدا ب 4000 دولار لين 50000 دولار و رايح.
4- الأكسلات و الهوبات و السي في جوينتس، من 2000 دولار و رايح .
5- الرنقات التواير: من 2000 دولار لين 10000 دولار.
6- الجامبينات: من 1500 دولار و يوصلن لين 25000 دولار و بعد أكثر على حسب الرغبة..
يعني بغي زينة و فيها مواصفات ممتازة و من شركة معروفة ما تقل عن 50-70 الف دولار هذا بدون اكسسوارات.
الطراد العادي مال النزهة ممكن يوصل 130000 درهم مع مكاين.. الأوف شو الكبار اللي مثل السيغريت و غيره ممكن يوصلن ملايين رغم أن الحجم مشابه..
كل سوق و له رغيبته و كل و الناس اللي تدفع على حسب احتياجها.
السلام عليكم ورحمة الله وبركاته
بسم الله الرحمن الرحيم
كيف الحال الغالي 73 والله الصراحه انا معاك في موضوعك هذا.. وفيه مبالغه فالاسعار… وعلى ما قلت لو كانت احدى الوكالات بصنع بقي اعتقد بتطلب 500.000 عيل اذا فيه ارباح عزاة الشركات العالمية لانتاج السيارات بيغيرون الخطه وبينتجون بقيات وبيسون خط انتاج للبقيات لكن اللي مستغرب منه ان البقيات لا فيهن مواد وقطع مثل السياره يعني تكلفه اقل بألف مره ويطلبون سعر اغلى من السياره ….قبل فتره كان في واحد من الاخوان يعرض بدي من غير مكينه
وكان طالب فيها تقريبا 50.000 سعره بالنسبة لغيره معقول لكن بعدك تقول غاليه
في موضوع البولارس الاس سعرهافالوكاله 85000 شريت وحده مستعمله 63000 موديل 2009 لكن والله عقب كم من شهر راجعة نفسي وبديت اشك اني صاحي بعد ذلك بعتها وشريت سوزاكي ساموراي قير عادي مكيف احسن من البقي وأأمن بألف مره ووين تبى تسير اتوكل بس يبالها توربو .
السلام عليكم ورحمة الله وبركاته
عيل شو بتقول لو قلت لك ان شي بقيات على 400000 هههههههه
انا عندي بقي وطالبنها 65000 وعرضتها في المنتدى..
السلام عليكم ..
أخوي الغالي uae_73
في بداية الأمر أنا كنت مستغرب مثلك بالنسبه لأسعار البقيات اللي عند الشباب .. وتبا الصدق ما كانت عندي أي خبره في هالمجال .. المهم مع الأيام ياني فضول وقلت أبا أعرف عنهن .. عندي صديق علمني عن الأولي والتالي فيهن وهو من كراج البداير (( سعود النقبي )) .. المهم يا طويل العمر طلعت السالفة سالفة شركات وأسامي ..يعني نفس عالم السيارات العاديه .. في الكرولا وفي البورش على سبيل المثال … والشركات هذي تتنافس بالمواصفات والكواليتي والفنشنج في البقيات .. شو رايك في بقيات أسعارهن فوق المليون درهم ؟
ومن أنواع البقيات عندك :
standard tarvel
و
mid travel
و
Long travel
وأكثر شي مرغوب ومعروف اللي هو ال longtravel ..حق التقفيز والركز والراحه في السواقه أكثر عن النوعين الثانيات .. فـ يــا غالي حاول تسوي سيرج على البقيات في الجوجل على longtravels sandrailsl وشوف أسعارهن في أمريكا كم تبدا ؟ بتحصل اختلاف في الأسعار طبعا وفي باكيجات عندهم إذا تبا رولر شاصي يعني شاصي كامل بتواير وجامبيناته بس من غير جير ولا مكينه وإذا تبا turn key يعني على دقة السلف وبالعربي كامله مكمله .. وفي الفريم يعني بس الحديد من غير ولا شي إضافي .. وانته بروحلك بتطلبله الأغراض وشوف كم بيوقف عليك وطبعا مع أسعار الشحن من أمريكا .. صدقني أخي الكريم في النهاية بتدفع فوق ال 100 ألف وبتكون عندك بقي بس مب بالمواصفات اللي بتشوفها في البقيات اللي أسعارها 200 و300 بس بتستانس ..واتعرف طبيعة الإنسان دايما يسعى للأفضل ومع الأيام بتبيع اللي عندك وبتشتري الأحسن إن شاء الله .. نقول ليش غاليه بس جير ومكينه ؟ أوكي المكاين مكوده عندنا في البلاد وبشتى الأنواع .. بس هل فكرت في الجير ؟؟ ترى جير البقي مش نفس جير السياره .. نظامه غير ويسمى بال Transaxle نفس فكرة جير الفولكس ويجن البيتل الجديمه وكذلك السوبارو ..يعني الإكسلات طالعات من الجير .. وهالجير يا طويل العمر في كذا شركة تخصصت في صناعة جيور البقيات وأشهر شركه هي شركة Mendeola وأسعار الجيور طبعا عندك من ال 25 ألف درهم وانته طالع ومن غير شحن .. ترى الشحن من أمريكا للقطع غاالي واااايد وجرب وشوف هالشي .. ونسيت أخبرك بعد بالنسبه للرنقات والتواير والجامبينات والشيالات ونوعية التواير كل هذا له شركات وتتنافس بالأشياء اللي ذكرتها قبل .. وأتمنى إن بعض الأمور صارت واضحه لك بالنسبه للبقيات (( الأمريكيه)) ..
والسموحه على المداخله بس حبيت أوضحلك
تحياتي