اشتغل في هالمكان؟ ( الجزء الثاني)

صبحكم الله بالنوووور و السروور

شحالكم و شخباركم

يقووولكم << سيده بتسولف هههههههههه ابا افضفض احس مب قادره هم على قلبي

نزلت الموضوع عن البنك الربوي قبل و طبعا اقتنعت بكلامكم 100% و شليت الموضوع من بالي..و مشكورين على نصايحكم السابقه ..و الحين مطلوب شوركم في سالفه ثانيه

المهم يقووولكم البارحه انا راقده في امان الله …و يرن تلفوني ترن ترن …ترن ترن

اطالع الرقم مكتب؟؟ قلت منووو بعد ؟؟ و عموما ما اشل اصلا ..بس قلت خل اشل اشوف شو السالفه..و ناشه من الرقاد و الصوت مرعد ” الووووووووه” …ياني صوت واحد مواطن يقول انتي فلانه .. قتله هيه نعم ..قال انا فلان من الدائره الفلانيه نباج تين مقابله …اذا تحبين تين اليوم يكون افضل …قتله بشوف << و انا مستغربه من وين يابو رقمي؟؟ حد يجسم سيفياتي من ورايه؟

طبعا خلاص انغثيت و نشيت …اطالع الساعه..من الفجر الساعه 10 و نص << خخخخخخخ من الفجر عندي لووول

الموهيم نشيت شاورت الماما و البابا و لبست و توكلت ..و تريقت اورنامين سي في الدرب

وصلت هناك…و الرياييل…الريايييييييييييييييييييييييييييييييييي يييييييييييل على قفا من يشيل و كلهم يطالعووون ..مشغلين رادارتهم ..اخ ويهي عورني

المهم سرت سويت المقابله و ما بدش في التفاصيل ..ويا المسؤول كنت اوكيه..يوم طرشني ال Hr خرتها بشرف ههههههههههه..خلوني اقول ان على كثر ما سرت مقابلات..اول مره اشوف هالنوعيه من الاسأله العجيبه

الموهيم ظهرت مب مستانسه ..ما كان عايبني الوضع وايد …. البارحه شغلت تحرياتي عن الدائره اياها..و صح انها دائره حكوميه ..و الشغله لوو بغو يعطوني اياها فنانه …

بس السلبيات:
1. الدائره من اقل المعاشات في امارة دبي
2. مدحوبه رياييييييييل …يعني اول اسبوع عادي مستحيه ..ثاني اسبوع طار الحيا و استوي من الموظفات قوم بو ” وييييييييييه الله يغربل ابليسك يا حمود” << حمود زميل العمل ….و انا ما ابا هالشي ابدا ابدا ابدا ..عيب منقوووووووووووود
3. على ما سمعت ماشي مميزات و لا ترقيات و لا بطيخه ..سمعت عن واحد يشتغل هناك من اكثر عن 10 سنين شرات ما هو !

الايجابيات:

1. المسؤول اللي قابلته وايد حيوي و متحمس للشغل و شكله واااااايد يحب شغله ..و هالنوعيه من الناس يحمسون للشغل
2. الشغله نفسها شكلها اوكي مع ان ما عندي خبره سابقه في الموضوع ..بس الواحد يتعلم

بس المشكله الاكبر عندي ….انا ما توقعت هالشي..طلعو من اللي عاطتنهم السي في مالي في الكرير فير..و ياني الموضوع بغته …و احس الحين بضيج..جني بفقد حريتي …دوام كل يوم من الفجر .. التزام يووووووومي

ما اعرف اذا كنت مستعده لها التعب ..حتى نفسيا مب مستعده ..و ضااااااااااااايجه …البارحه استخرت و الحين ضاااااااااااااااايجه

ربيعاتي يقولون انتي تتدلعين طاع البنات يالسات في بيوتهم مب محصلات شغل و انتي بطرانه كل ما تيج وظيفه تشوحيبها على طول يديج ….و انا مب بطرانه و لا شي..السالفه احس بعدني مب مستعده..و ما لقيت الوظيفه اللي انا احس استحقها في المكان الصح ..و دامني مب محتايه الوظيفه الحين خلاص اعطي غيري الفرصه ..و اتريا الوظيفه المثاليه << اللي في مخي ..يمكن تي في يوم من الايام

بس عاد كل ما اسير عند حد و الا ارمس حد …هااااااه خلصتي دراسه؟؟ ماشاء الله ماشاء الله و شحقه ما تشتغلين ؟ عيل جي يالسه في البيت؟ جنه يعني شي قانون في هالدنيا الواحد يخلص دراسه و يبتدي يكرف على طول …و اذا قلت ما ابا اشتغل الحين كلهم بققو عيونهم ؟؟ و شحقه دارسه ؟ و شحقه الشهاده ؟ و شحقه و شحقه

حتى دريولنا متدخل في حياتي و يقول ليش مافي شووغل؟؟ الحين ما خبرت حد عن المقابله هاي ادري بهم بيسوون زلزال و بيقولون سيري اشتغليييييييي..جني يالسه على جبودهم

يعني الواحد يوم يبا يسوي الشي يسويه و هو مرتاح و مقتنع …مب بالدز و الضغط النفسي..مال بلاج انتي يالسه في البيت و خلق الله كلهم يدامون…

كالعاده انا ما نزلت الموضوع الا عشان اسمع ارائكم …اللي عنده خبره و اللي داري بالدنيا و صدقوني ترا ارائكم تأثر فيه و الا ما كنت بشاوركم في هالامور ….يعني لو اشاور ربيعاتي كلهم بيقولون اشتغلي …لو اشاور هلي بيقولون على هواج …عشان جي يوم ابا اراء صح اييكم اشووف ماذا في جعبتكم من نصايح حق دوبي بيبي

احس وايد هذرب بس قلبي متروسه ..لو كاتبه الموضوع البارحه فليل جان احسن على الاقل برقد مرتاحه