السلام عليكم
و صبحكم الله بالنوور و السووور
يالله يبالنا كرك يعدل المزاج على الصبح
الموهيم يقولكم صدق او لا تصدق
دبي بيبي البارحه طبعت سيفياتها و سارت الكرير فير…ربيعاتي سحبوني ..و الله يخليكم السي في مب ابديتد حتى يعني فضيحه …بس انا سرت حق مكان معين اصلا ….لكن وزعت سيفياتي مني و مناك
في النهايه و في اخر المعرض لقيت المكان المنشود …و لخيبة املي ما عندهم تسويق..بس قتلهم البكالريوس مالي بزنس اند مانجمنت يعني عادي انحط اي مكان … كانت امالي مرتفعه لهالمكان بس للاسف شكلي ما بحصلها ..و الخيره فيما اختاره الله << تصدقون عاد دبي بيبي ترمس عن الشغل؟؟
الموهيم ملاحظاتي عن المعرض في اليوم الاخير لاني ما سرت غير اخر يوم و اخر ساعتين
توقعت الزحمه تكون خانقه …بس مول ماشي زحمه …بس زحمة السيارات برع ..و لكن داخل الاجواء عاديه جدا
استغربت من عدة شركات و دوائر << لان موعد الاغلاق هو الساعه 8
لكن وايد منهم من استوت الساعه 7 صكو ليتات بوثهم و شلو قشهم و باي باي …مادري اذا عندهم تشبع ..بس حتى ولو ..يعني في اماكن تمو لين عقب الساعه 8 واقفين و يرحبون بالباحثين عن الوظائف و يجاوبون على استفساراتهم بأبتسامه و بكل سعة صدر مع انهم مب ملزومين يتمون لين عقب الساعه8
نقطه ثانيه ..اغلبية الباحثين عن الوظائف شالين سيفياتهم وياهم …و اغلب الاماكن ياخذون السي في المطبوع و هاي انا اشوفها افضل طريقه بالنسبه للباحثين عن الشغل….لكن في اماكن يرفضون السي في و موفرين كمبيوترات و يطلبون منكم اعادة كتابة السي في من اول و يديد في الخانات المخصصه !! و هالشي ابدا مب عملي..يعني انا مثلا السي في مالتي 3 صفحات و ها قمة الاختصار لان اعرف ان النموذج المثالي من السي في المفروض يكون صفحتين ..لكن عندي وايد خبرات و دارسه وايد و مشاركه وايد في فعاليات و مؤتمرات و جوائز و امور ثانيه و المختصر المفيد طلع عندي 3 صفحات…يعني باخذلي ساعه اعيد كتابة السي في مالتي من اول و يديد …و ممكن اصلا هالمكان يرفضوني ..في هالساعه انا ضيعت على عمري كم فرصه ثانيه مع شركات و دوائر اخرى
صح هو اسهل للشركات بالطريقه الالكترونيه ..لكن اصعب لنا و معرض التوظيف اساسا هو للباحثين عن الوظائف و تسهيل الموضوع لهم
ففكرت في فكره جهنميه …و بتسهل الموضوع للباحثين و للشركات ..الا و هي ان الباحث عن العمل ايي و السيفي مالته محطوطه في ثمب درايف ..الا و هو اليو اس بي …و ينزلها في الكمبيوترات اللي توفرها الشركات….مب هاي طريقه الكترونيه سهله و بسيطه ..تريح الطرفين << لازم يطبقونها السنه اليايه
لان وايد شركات ايضا يرفضون ياخذون السي في و بداله يعطونكم الرابط لموقعهم الالكتروني في بطاقه و يقولون دشو سجلو من البيت ..عيل ليش سايرين
شي ثاني لفت نظري هو
دائره حكوميه مرموقه جدا في دبي ..سرنالهم و ما خذو السيفيات بس قالولنا دشو الموقع..توني دشيت الموقع و حاطين لستة الشواغر…و يا عيني على لستة الشواغر…عندهم فقط 13 شاغر..عيل ليش مشاركين في معرض الوظائف و متعبين عماركم..و الا بس حق البرستيج
ايضا
بعض الشركات فاتحين بعدة اقسام في نفس الشركه ..يعني لو تبون تقدمون عندهم لازم تدورون على البوث و تحطون سيفيتكم عند كل مكتب..انزين ليش؟؟ طرشو فقط ال HR و هم بعدين يفرزونهم بمعرفتهم ..مادري شو المغزى علما بان الشركه هاي عندها قسم HR واحد .فمادري ليش ما يعطون راع التخصص تخصصه و خلاص ..مطولينها و هي قصيره
في النهايه و هالخبر الحلو اللي عيبني
شركة خاصه اماراتيه في دبي فتحت برنامج حلو اللي هو مسقبلي ابنيه بيدي
هالبرنامج مخصص للخريجين الجدد لدعمهم في
ابراز الطاقات و توظيف الافكار و الابداعات
تأهيل شامل يلبي احتياجات الخريجين الشباب في تجربتهم العمليه الاولى
رفع مستوى الكفاءه و الخبرات من خلال برنامج التدريب العملي
دعم و تمويل الافكار المتميزه كمشروعات صغيره
يعني اذا الواحد عنده فكره مميزه و محتاج دعم منهم ما بيقصرون بس مطلوب من الشخص ان يكون جاهز 100% من دراسة جدوى و بور بوينت و برزنتيشن و يحط في باله ان بيقطعونه بالاسأله
و هاي فكره رائعه من شركه خاصه و هذا ان دل على شي يدل على ان اصحاب الشركه مؤمنين بالجيل الجديد من الخريجين الاماراتيين و رغبتهم في مساندتهم و تطويرهم
الشركه هي s.s.lootah
و هاي جميع ملاحظاتي هالسنه عن معرض التوظيف
و اتمنى اللي ساروله يشاركوني بملاحظاتهم الجميله
تسلم على الرد الفنان
و صدقت من ناحية الجهه المراقبه ..هالشي لازم يصير ..لانه اغلب اللي يقدمون يقولون والله محد اتصل بنا …و مسوين اشاعه متضخمه عن المعرض انهم فعلا ما يوظفون فلازم الحقيقه تظهر للناس كبيانات اكيده من جهه معتمده
فكرة الثمب درايف حلوه بس ما تنفع..باخبرج ليش..
الحين انتي يوم تدخلين بياناتج فى الكمبيوتر تدخليها فى برنامج معين ياخذ كل معلومه وفق نظام معين..عشان يفرزون المعلومات ويحصلون اللى يبونه بسهوله…
بس فكره لما تنقلين السي في تنقلينها من الثمب تكون على شكل وورد..مب عمليه بالنسبه لهم..لانهم لازم يقرون كل سي في..يعني نفس المطبوعه…ما فرقت!!
هذي السنه مارحت
بصراحه غسلت ايدي لان اكثرهم نصابين يشاركون بالمعرض للدعايه والاعلان عن انفسهم
والا بالاصل ماعندهم اي رغبه بتوظيف ابناء البلد
نتمـنى التوفيق للجميــع ان شاء الله
مشكوره
ما شاء الله عليج دبي بيبي .. موضوع رائع وملاحظات قيمه .. انا عيبتني فكرة اليو اس بي .. اريح واسرع بتكون او بالايميل وخلاص ليش بعد التسليم باليد
انا اشوف لو يكون في جهة تراقب هالمعرض وتشوف كل شركة كم تاخذ من المواطنين في هل المعرض سنة بعد سنة وهل هم ملتزمين بنسب التوطين ام لا ..
وبعد لو يكون في تنسيق بين الجامعات والمعاهد والكليات مع الجهات المشاركة في المعرض .. يعني لو يكون فيه مؤتمر مثلا مصاحب للمعرض يشاركون فيه ممثلي الجهات المشاركة في المعرض وممثلين من الجامعات والكليات والمعاهد و من وزارة التربية و وزراة التعليم العالي ويتناقشون في مشاكل البطاله في الدولة و في التخصصات المطلوبة بالفعل في سوق العمل و امكانية طرحها للتدريس في المؤسسات التعليمية