السلام عليكم ورحمه الله وبركاته
من باب الافاده ، حبيت اعلمكم انه شي دورة تصوير في الشارجه ،،
اليوم كان اول يوم ، بس بعده باب التسجيل مفتوح ، الدورة بتكون من 7 ايام كل اثنين واربعاء ، المكان جمعية الامارت للتصوير ، حذال سوق العرصه ،،
في حالة الوقت مب مناسب ، شي بعد نفس الدوره بتكون في شهر 7 ،،،
وهاي خريطه الموقع
بعد ما اطوفون مسيد الشيعه خذوا ثاني دخله ، اللوحه كاتبين عليها مدخل الشيوخ وكبار الشخصيات ، انا دخلت هناك بس ما شي باركنق سيده ، لازم تلفون يمين يسار حق الباركنق، سوو شراتي دخلت سوق العرصه ومسكت لي هندي ايدلني وين الجمعيه ، لان منطقه التراث فيها مليون الف جمعيه ومتحف وبيت اثري ف بتضيعون شوي ،،،،
مرفق جدول الحصص للي حاب ،،
والسلام عليكم ورحمه الله وبركاته،،
احساس الشارجه ، الصور اتبين لك مستقبل مشرق ، الا الصورة الاخيره اتضحك احمم قصدي حلوه
بخصوص الوقت ، والله اعرف ناس مالحقوا على الحصه الاولى بس بيشتركون باجر ان شاء الله يعني في امل في الاشتراك، وعلى الفكره الجمعيه بتسلم شهادات للمشاركه ، ف مب متأكده اذا سجلت متأخر بيعطونك الشهاده وله،
بس ما شاء الله كمرتك احترافيه ، انا عندي شراتها بس نيكون دي 80 مول ما اعرف استخدمها ، احس فيها مميزات بس مب عارفه كيف اضبطها عشان جي بشترك المره اليايه معاهم ،،،،
الله عليج ياباشو .
يزاج الله خير
البارحه ال google كرهني
ادور دورة تصوير .. طلع عندي بدائرة الثقافه والاعلام . لكن حق سن ال 14 لين 16 سنه .
فانا عمري 18 سنه فماقدر اشترك وياهم
انتي الله يسامحج المفروض من شميتي ريحة الدورة تخبرينا على طول . مب عقب الجماعه ماسجلو وخلصو
لاني اليوم كنت فالشارجه ومارحت اسجل
المشكله مادري بيسجلوني انا يوم الخميس بكون بالشارجه !!!اليوم كنت موجود ورجعت بوظبي
اسميني جاستني غصه من شفت موضوعج ياباشو .
قبل اسبوعين ماخذ كاميرا .. كانون 500 d
بس الصراحه يبالي دوره . الكيمرا وايد حلوه وفيها مميزات لكن انا اجهلها !!
بتصلبهم الصبح . وان شاء الله يقبلوني
هاي بعض الصور .. مادري شورايكم . في مجال اطور ولالا
..
..
والله السموحه اخوي الحربي ما عندي علم ، الدوره الثانيه اعلنوا انه بتكون في شهر سبعه بس ما حددوا الاوقات ، تقدر تستفسر منهم شخصيا على 56888896 06 ، بس اذا عرفت من وقت بطرش لك ان شاء الله المواعيد،،
اما بخصوص الاسعار ، هيه الاسعار ممتازه ، انا جيكت في جمعية ام المؤمنين مجرجين 500 بس المشكله لين الحين ما حددوا الوقت اللي بيطرحون الدوره ، اما جمعيه الامارات للتصوير معلنين انها 350 ، بس خذوا من الاهل 300 درهم ، اعتقد عرض للمواطنين بس،،
تحياتي لمرورك العطر ،،
لو تكرمت بس تخبرنا متى الدورة الي في شهر 7 لاني ناوي اشترك ….. مع العلم ان الرسوم ممتازة .
الف شكر لج اختي عـ المعلوؤوؤمآت ..
و إن شاء الله رآح تشوفوني بينكم في اقرب وقت .. و رآح نبدع بالوحش الاسود الصغير ^^