اكتبوا أكثر قصة حزينة في حياتكم الشخصية وعبروا عن أحزانكم

84 thoughts on “اكتبوا أكثر قصة حزينة في حياتكم الشخصية وعبروا عن أحزانكم”

1. مرحبا

   انا اكثر شي اثر فيني يوم توفوا ناس من اهلي … غالييين عندي وايد

   وناس محد فطيبتهم

   وهم غالين عند كل اللي يعرفونهم

   وكتبوا فيهم اكثر من قصيده

   والقصيده اللي اذكرها تقول :-

   شي من الاحداث نكتبله مثايل
   خص المفاجىء وله صدمه قويه

   اذكر التفصيل مامخمل خمايل
   شايف بالعين هب رمسه خليه

   اتصل فلان كساب الجمايل
   راعي المعروف والنفس الصخيه

   وماذكرها عقب

   بس اللي اذكره

   قاللي الدكتور ضغطه في نزايل
   ماتفيده الاجهزه ولا تقط حيّه

   هذا اللي اذكره

   وكنت مصدوم فيومها
   المهم

   الشي الثاني

   كنت يالس فالبيت

   والعيال يشوفون التيلفزيون

   وفجاه قالوا والله الشيخ زايد مات

   قلتلهم شووووووووووووووووه

   قالوا هذوه الخبر

   والقنوات شي منهن قفلن وحطوا قرآن والخبر تحت مكتوب

   وصدق كانت صدمه قويه علي

   ماكنت مصدق

   اقولهم مستحييييييييييييل

   لاحول ولا قوة الا بالله

   يلين اليوم . فاي سالفه اقولهم هالانسان محد شراته يقولولي منو اقولهم ابوي زايد الله يرحمه ويغفرله

   انسان حكيم بكل معنى الكلمه

   كريم بكل ماعنده

   صااااااادق

   قد كلمته

   ريال ونعم فيه

   كل الشعوب كانت تحسدنا عليه

   الله يرحمه ويغمد روحه الجنه
   

2. لكن في موقف يحضرني أعتبره مؤثر ..

   كنا في دوله عربيه فقيره جدا ..انا و شباب في رحله سياحيه ..و احنا نتمشى في المناطق الريفيه شفت بنتين يرعن غنم .. فوقفت السياره عندهن ( أعمارهن 10 و 8 سنوات تقريبا ) .. فزقرتهن و عطيتهن علبتين عصير و قطعتين حلاوى . ..

   فرحن وايد و حليلهن .. شربن أول عصير و كلن اول قطعه .. عقب يات الصغيره تبغي العصير الثاني و القطعه الثانيه .. فهزبتها أختها الكبيره ونازعتها و قالت :

   لا ها حق أمي ..من يومين ما كلت شي !!

   هالموقف بالنسبه لي كان جدا مؤثر

   فعلا موقف مؤثر جداااا
   حسيت بقشعريره بجسمي

   ترى الطفل يستمد عواطفه من امه اذا الأم حنونة
   فالطفل يتعلم الحنان منها واذا كانت قاسية يتعلم القسوة

   
   

   فهي حبت انها ما أذوق الأكل الا وأمها ذايقنه

   
   __________________

3. 
   هاي قصتي اللي طلبها الأعضاء

   كنا مسرعين في السيارة ، وكنت تعبان شوي ويالس في الكرسي اللي حذال السايق وربيعي كان مسرع عسب يوديني البيت ، المهم كان فيه مطر ذاك اليوم وربيعي دش اللفة مسرع ومستعيل بس ها كله عشان يردني البيت أرتاح، المهم مات قدر يتحكم في السيارة وافترت السيارة وضربت في رصيف الجزيرة اللي بين الشارعين، الكل أغمى عليه ودوخ، وأنا أول واحد فتحت عيوني فيهم، بس بعدني ما كنت مستوعب اللي صار، وتميت دقيقة أو دقيقتين أحاول أستوعب وأذكر لين ما أستوعبن انا نحن سوينا حادث ، وانتبهت اني مب عالكرسي مالي أنا على كرسي السايق وريولي على الكرسي مالي اللي كنت يالس عليه وراسي برع من جانة السايق، يعني جني متمدد على كرسيين ومظهر راسي برع السيارة، بعدين قلت انا شو اللي يلسني بكرسي السايق وين ربيعي اللي كان يسوق؟ وين راح؟ طالعت في الكراسي الخلفية حصلت ريعي الإثنين اللي ورى مدوخين و ينزل من خشم واحد منهم دم بس ما حصلت السايق، صديت برع السيارة، حصلت ربيعي اللي كان يسوق ، وياريتني ما شفت المنظر، حصلته طايح في الجزيرة غرقان بدمه، وما يتحرك ولا يتلك وكله دم من كل صوب ، الريال طار برع السيارة وطاح في الجزية وقت الحادث، الشرطة كانت بعدها مب واصلة، حاولت أتحرك عسب أسير عنده وفي هالوقت اكتشفت اني مب قادر احرك ريولي وما أعرف ليش ، وحتى أذكر اني ما كنت قادر احرك ايدي، ويت الشرطة وشافوني واتصلوا عالإسعاف ، وأنا يوم شفت ربيعي في الجزيرة طايح تميت أصيح، واحرك عيني في ويه الشرطة عسب يفهم ويوديني عند ربيعي وكنت يالس أتشاهد والحمدلله ـ بس ما كنت أرمس ، كنت أتم تم، لأن راسي وحلجي انصابوا في الحادث وشفايفي دش فيها زجاج السيارة، الشرطي فهم إني أبا أسير عندي ربيعي في الجزيرة ، حاول يشلني لكنه اكتشف اني ما أروم احرك ريولي ، ولا ايدي تقريبا على ما أذكر، فعلطول تركني وما حاول يشلني مرة ثانية، فتميت أصيح أكثر وأطلع صوت انين عسب يفهم ويرضى يشلني بس ما رضى قال إني مب قادر أحرك ريولي وخاف، عقبها دزيت جسمي وعقيت عمري على ما أذكر من باب السيارة عالأرض وتميت أزحف لين ما وصلت عند ربيعي ، حاولت أكلمه ما رد علي، ويلست أتم تم بس من دون فايدة عقب طحت حذاله ونحن الإثنين غارقنين بالدم وانا استويت مب عارف أتفس عدل، فيت الإسعاف اتشلني أول واحد ، بس أنا هزيت جسمي ومنعتهم، أشرتلهم يشلوات ربيعي اللي طايح حذالي أول، قالولي عقب بس انت أولى بنشلك وسيارة الإسعاق الثانية بتشل ربيعك بس رفضت، وعقب شلوا ربيعي، عقبها يت سيارة الإسعاف الثانية اتشلني بس انا رفضت قلتلهم شلوا ربعي اللي في السيارة حاولوا يقنعوني بس من دون فايدة ، وتميت لين ما ربعي كلهم ساروا المستشفى إلا آخر واحد كان ما فيه شي وحتى ياني وانا طايح عالأرض كان بس مدوخ في السيارة من الضربة وفاق، ويوم سرنا المستشفى دخلوني انا وربيعي على غرفة اسمها الإنعاش أو العناية المركزة في الطوارئ، أنا حطولي أوكسجين ورد النفس طبيعي عندي بفضل الله وخيطوا جروحي بس للأسف اكتشفت ان ربيعي حالته خطيرة ، وسوى ثلاث عمليات ويلس في المستشفى حوالي 3 أسابيع. منهم أسبوع تقريبا في العناية المركزة.
   بس الحين هو بخير وهذا من فضل الله

   السموحة اذا طولت عليكم

   قصتك واااااااااايد مؤثره

   الحمدلله على سلامتكم

   واهم شي اتوبون ما تستعيلون وخاصه يوم يكون صاب مطر

4. وينكم جماعة خلصتوا قصصكم؟

5. لا ما قصدت شي يالطيب بس لأنك قلت ان البنت طلبت الطلاق بس ما كتبت ان زوجها طلقها ولا ما طلقها يعني ما وضحت.

   عالعموم مشكووووووووووووور بالطيب ويزاك الله خير فعلا قصة مأساوية

   الله يرحمها ويغفر لنا ولها

   اخوي عشاق التراب

   بالعكس اسعدني سؤالك وملاحظتك في محلها

   انا بالفعل ما وضحت انها تطلقت من زوجها …

   انا اللي اشكرك اخوي بس الظاهر اني كتبت المشاركه وانا مستعيله

   واي ملاحظه اكتبها ومايهمك

   اختك ديره

Comments are closed.