التقـرير المفصل لعزيـمه العميمـي

تفاصيـل العـزيمه بالتفصـيل الممل :

في البدايه ياني أتصال من مكالمه غريبه أتصل المره الأولى مارديت … أتصل مره ثانيه بعد مارديت

أقول في خاطري منو هذا ؟!! … وشو يبا ؟!!

المهم بعد شويه كان يوصلني مسج … فتحته شفت المسج من نفس المتصل كاتب فيه (( أرجوا الأتصال أخوك العميمي ))

من قريت المسج حسيت بالفرحه أقول : أخوووي العميمي يا سلام

ستووووووووووووب ؟!! … تعال الحبيب من وين ياب رقمي ؟!! أممم شي غريب

يله مب مشكله المهم أني عرفته … أتصلت فيه على طول

وقاعد أفكر وأقول منو بيي منو بشوووف كيف أشكالهم … وأذا تبون الصدق حشرت العميمي ع الخاص أقوله منو بيي خبرني ؟!! … يقولي أصبر خلها مفاجأه أحسن لك

الحمدلله الأيام عدت على خير و وصل يوم الخميس المنشود وطبعاً طلعت من الدوام من وقت عشان أكون جاهز للعزيمه

وقفت في المكان المنشود الساعه 11 الضحي … وأتصلت في العميمي أقوله ها أنا موجود وين أربيعك ؟!!

قالي الحينه بييك الرحال وبند التلفون … قلت ما شاء الله الرحال بيي شي طيب بتعرف عليه وأول وجه بشوفه

يله زين شويه وثواني وأشوف موتر وقف وراي وطبعا أتجهزت أنا شليت أغراضي ولازم كاميره التصوير

عشان أغطي الأحداث الجميله

أول مانزلت شفت منظر غريب عجيب وقالي الرحال للخطوط البريه في خدمتك يا الطيب

ههـه شكراً رحال … كيف الحال ؟!! … قالي الحمدلله بخير يله أركب حياك

وماقصر أخوي الرحال ركبت معاه وسوالف وأعلوم لين ماوصلنا نص السيح

وما شاء الله علي العميمي مسوي خيمه شووو كبرها أول مادخلت

حصلت العميمي وأخوي متعني ومتصرف

سلمت عليهم وخذت أخبارهم وأعلومهم وأستأذنت منهم عشان أصورهم

وطبعاً وافقوا ههـه

وماقصروا في الفواله وفي دله القهوه … والنعم فيهم … خذنا أعلومهم وسوالفهم … وبصراحه أبد ماتنمل

وبين فتره وفتره يدخلون الاعضاء اللي عازمنهم العميمي … ماقصر أخوي … لين ما أكتمل العدد

كلهم يو العزيمه بدون مايتخلف حد … قال العميمي وين تبون تتغدوون داخل الخيمه ولا برع ؟!!

كلهم قالوا دام الجو حلو خلنا نتغدا برع وفرشوا الغداء وماقصر الأكل كان لذيذ

وهاي هيه الصور للعزيمه والسموحه مابخبركم منو من الأعضاء هم عشان ما أفضحهم

وهني كل الأعضاء يأشرون على صاحب العزيمه

تقبلوا تحياتي