الجمعه وحديث ساخن ثاني مره…..

اليوم الجمعه جعلها الله جمعة تآلف ومحبه بين القلوب

وفرصه لطلب العفو من الاعضاء اللي يمكن غلطنا عليهم بدون ما ندري

او تفوهنا عليهم بمزحه يمكن ما كانت في مكانها او انفهمت بشكل ثاني

وان شاء الله دامنا متواصلين في هالمنتدى الطيب ما بيكون بينا الا الاحترام والمحبه ..

في الاسبوع الماضي كان موضوعنا عن حفظ اللحوم من دون ثلاجه

يمكن البعض ما يهتم بهالشي ولكن البعض يستفيد منه

عن نفسي استفدت من طرق الحفظ اللي شرحوها الاعضاء وان شاء الله بجربها

اليوم الحمدالله وبعد ما الله مدنا بالعمر والعافيه بين الجمعتين

شديت العزم وبدون سابق انذار ولاهود ولا هدا

صوب عيال العم

حليت عليهم ضيف بدون داعي

احب المفاجآت هههه

الغدا اليوم فناااان عيش ابيض وسمج ويزينه الربيان يمممم

مع شوية مقبلات تكون دايما متوفره على راس الصحون الاماراتيه

عاد هذا اللي ياكل منه يحاول انه ما يسوق السياره لانه بيرقد في الخط

مفعوله قوي وسريع

الحمدالله والفضل والشكر له سبحانه

وبدينا في الحك والصك وفتح المواضيع الساخنه

اليوم كان موضوعنا حماسي وآمالنا كبيره وذهبيه

يلسنا نخطط في المشاريع ملينا من الفقر وضرب وتعذيب الرواتب

قلنا شوي نشوفلنا مشروع يسندنا ويزيد من دخلنا

لين متى نحن بنتم جذيييه هااااا

واللي خلانا نتحمس للموضوع انا سرنا مره السوق الصيني في دبي

وحصلنا شبك للعزبه طوله 30 متر وسعره 250 درهم

وفي العين سعره 350 درهم آخر 345 درهم

لاحظوا الفرق في السعر واللي يابه من الصين بكم يابه …..؟؟

وهنيه لمعت فكرة المشروع :: قلنا بنسير الصين وبناخذ كانترات شباكه وحديد وكمن سلعه وبنزلها في مزرعه

عشان ما نتحمل تكاليف الايجار

بعدين بنوزع البضاعه على التجار واكيد هم عارفين فرق السعر

والبضاعه ما بتتأخر عندنا وبنفوز بسفره مجانيه للصين

وارباح بالهبل واااااااو

وشوي طلعلنا معارضين واعداء النجاح قالوااااا لااااا

ما يصلح انتوا ما عندكم مكاتب استيراد وبتكونون غير قانونيين في السوق

قلنالهم والحل ….؟؟

قالوا الحل :: السوق ما فيه دياي احسن شي تاخذون فقاسات

وتنتجون وتوزعون والسوق يبغي واشتغلت الحسابه وكل مره العدد يتضاعف

لين ما دخلنا ارقام بست منازل ولو شوي كملنا كان الحسابه شوطت

بس طلعوا مره ثانيه اعداء النجاح وقالوا هذيلا يبالهم عنايه خاصه وآلات كبار

وياكلون وايد وما ادري شوووو

لين ما كنسلنا

طبعاً البعض أثر فيه صحن البصل ولا قدر يكمل ههههه

لين ما وصلنا مشروع الانتاج الزراعي اللي شجعنا عليه العضو دار زايد يزاه الله خير

وفكرنا في البيوت البلاستيكيه ومكاين التحليه

وقمنا نضاعف البيوت والزراعه ونحصد لين ما استوت ارباحنا بالملاااين

بس التكاليف بعد كانت تزيد كل ما زدنا البيوت البباستيكيه

لين وصلت الملايين

يعني كل شي تسكر علينا ما فيه فااايده

بس طلعنا بمشروع اتفقنا عليه كلنا حتى اعداء النجاح ايدونا فيه

اللي هو مشروع الراتب

اتفقنا انه كل واحد يحافظ على راتبه بدون سلفيات وبدون اسراف

هذااا احسن مشروع

هذا اهداء منا للعضو دار زايد على تشجيعه النا في الزراعه

واستثارة الثوره الزراعيه فينا

هذا مكان في بيت عيال العم مرتب عشان يزرعون فيه ورقيات

شكلنا ما بنشتري هالموسم ورقيات من السوق ههههه

بس هذا موضوعنا اليوم وياليت تشاركونا الموضوع

واللي عنده فكرة مشروع لا يبخل علينا

وسلامتكم

وبدا كل واحد يشرح موضوعه ويسدح مشروعه لعل وعسى