اليوم الظهر الساعة 2.00 الظهر ….
كالعادة طلعتي يوم الجمعة بعد الصلاة من العين باتجاه الشمال لزيارة الارحام … انا و الحرمة و وبناتي وحدة عمرها 5 سنوات ووحدة عمرها سنتان و نصف وولدي سالم عمره ثلاث شهور و الخدامه …
قد كتب لنا عمر جديد اليوم … بسبب ان واحد الله يهديه من الجنسية ( الاسيوية ) لف علينا قبل التحويله في مكن ممنوع التجاوز ….
اللي صاير طبعا انا على سرعة 80 الى 100 مش اكثر وهو لف علي تخيلوا عاد ما لحقت اضرب ابريك واللي وراي مدقر وراي ضربت ابريك و دعمدت اللي جدامي غصبن عني ما في مجال الشارع ضيق …. طبعا اللي وراي ما قصر فينا طيارنا برع الشارع ورحمة ربك وسعت كل شيء … لا عمود انارة و لا ان قص على يمين الشارع ….
وربكم كتب لنا عمر يديد و الحمدلله …. تعرفون سبب الحادث المتسبب يطالع الحادث اللي في الجهة الثانية ومش مركز في مساره …
واللي مر اليوم الظهر اكيد شاف الحادث وهو ساير درب العين دبي … موتري استشن 2008 و المتسبب صالون لكزس والمتضرر الثاني استشن 99
وحبيت اشكر النشمي الشايب/عوض المهيري من الهير اللي وقف وياي والله ياجماعة اني ما اعرف الريال قالي خذ موتري ووصل اهلك البيت وبعدين تعال بتحصلني في المزرعة … ما قصر جزاه الله خير .
والله يحفظ الجميع
ما ادانى سواقتهم خووووف زياده عن اللزووم
2 من ربعي منجلبين على هالدرب والسبه التحويلات اللي مابتخلص واعرف الريال اللي بنته وحرمته توفوا
الله سلمكم ولو انا مكانك بنزله وبضربه ضرب لين يعوف السواقه ويتوب يسوق
الحمد لله على سلامتك وسلامت الاهل والعيال والله يحفظكم الجميع
الحمد لله على السلامة
والله يعينا على هالآسيويين
الحمد لله على سلامتك يا أخوي
الله يعينا على الوافدين بالتحديد
أمسات واحد من الشباب دعمه واحد أسيوي
طلع الأسيوي عنده ليسن بريطانيا و السيارة تأجير
تصدقون يستاهل توهق ماعنده ليسن الإمارات وحتى راعي شركة التأجير توهق
وكل هذا نتيجه أنه العامل من معارفه فأجرله السيارة وأنته يا المواطن يوم تسير تأجر ما يتم توقيع إلى لازم توقعه ولا جواز ولاهوية إلى خذو كوبي منها شنك بتشرد من البلاد
والحمدلله عسلامتك مرة ثانية ..