مساكم الله بالنوور و السرووور
موضوع يقرقع في راسي هالايام الا و هو عن الدراسات العليا..طبعا تنحسب من فوق البكالريوس او الشهاده الجامعيه
يعني الماجستير و الدكتوراه
طبعا عندنا في الامارات اغلب الناس يحسبون الشهادة الجامعيه هي نهاية المطاف و قليل اللي يكملون عقبها << حد منهم حدهم ثانويه بعد
بالنسبه للي يكمل ماجستير…عندي تحفظات للموضوع بالنسبه لريال و للحرمه..و اتمنى اني اقدر اوضح لكم وجهة نظري عشان نستفيد من ارائكم
قبل كان دوم في بالي ان اللي يكملون الماجستير و خصوصا الدكتوراه تلقاهم متعقدين من عمارهم..و احساسهم الداخلي بالنقص هو يدفعهم يكملون داستهم عسب يملون نقصهم هذا بشهادات رنانه << و فعلا والله في وايد نماذج جذيه لو تنتبهولهم..و انا متأكده انهم بيظهرولي هنيه في الموضوع عشان يبررون مواقفهم لوول.بس انا ما احكم على حد..انا ابا اتكلم في الموضوع لان يمكن اكمل دراستي..
ثانيا بخصوص البنت او الحرمه اللي تلقونها تسعى للشهادات و الدراسه
شو راي الشاب في حرمه عندها ماجستير او دكتوراه؟ ما يحس انها متعقده
لو بنت اييها خطيب عندها ماجستير يعني واااااااااو…بس لو ريال يعرف وحده عندها ماجستير بيقول شو ها العيوز و الا بلاها هاي متخبله على الدراسه!
بقولكم شي بصراحه…انا عشت و سافرت و تعاملت مع اجانب..تلقى الواحد منهم عنده 2 بكالريوس و 2 ماجستير و دكتوراه و ييلس يسولف و عادي ما تقول هذا دكتور و لا هو يقولك الا اذا سألته
لكن تعالو شوفو العرب..خلاص اسمه ما ينكتب الا قبله الدكتور او الدكتوره…رافعين خشومهم تقول مخترعين الذره…يحطون حواجز بينهم و بين غيرهم..و احرص ما يحرصون عليه انهم يخبرون الناس ترا شوفو انا دارس و عندي جذيه و جذيه
نقطه ثانيه ما يخصها في اللي قبلها..الا و هي
كثر الشهادات للعربي ما تنفع هنيه خصوصا للشغل..سير قدم اي مكان بيقولولك over qualified
لو اييهم اجنبي بيتضاربون عليه و بيحطونه خبير
بس عربي دوم تتصكك في ويهه البيبان
طبعا انا ما اعمم
بس بغيت اسمع ارائكم قبل ما اتخذ رايي في مشروع اكمال الماجستير…
مع اني حاطه في بالي اذا باقي كلاسي بيكملون و بنكون ويا بعض شلة المصخره و السوالف بكمل…بس اكمل بس جذيه روحي صراحه ما عندي ميول هالكثر في الحقيقه و الواقع << عشان انقل بروجكتاتهم بعد خخخخخخ :wegr4:
والله هاااااالناس الطموحة اللي تحب الدراسة والله موضوع يفتح النفس ويحمسني على الدراسة اكثر لانه ((من سلك طريقا يلتمس فيه علما سهل الله له طريقا إلى الجنة وإن الملائكة لتضع أجنحتها رضا لطالب العلم وإن طالب العلم يستغفر له من في السماء والأرض حتى الحيتان في الماء وإن فضل العالم على العابد كفضل القمر على سائر الكواكب إن العلماء ورثة الأنبياء وإن الأنبياء لم يورثوا دينارا ولا درهما إنما ورثوا العلم فمن أخذه أخذ بحظ وافر))…
والصراحة الاهل يحبطون ومايشجعون يحسبون الايام والساعات والسنين عشان يشوفوني متخرجة انزين بتخرج بس التخرج هب معناته نهاية الدراسة ونهاية المطاف وبصراحة مايهمني رايهم اذا حبيت اكمل… وانا ناوية الصراحة اكمل وما اوقف من الدراسة …
وكملي وتوكلي ع الله ولا يهمج راي الناس… وانا اشجع الناس الطموحة اللي ترتقي بالعلم والمعرفة ويسعون لاعمار الارض… وبالتوفيييييييييق للجميع
أختي الفاضلة شكرا على طرح هذا الموضوع الشيق, بداية أخالفك الرأي في الربط بين الحصول على درجة علمية معينة وأن الشخص يكون غير متواضع أو شايف نفسه, عندنا في هذه الدولة من المواطنين يحملون درجتي الماجستير والدكتوراه بجداره وعرض عليهم العمل في الدول التي تخرجوا منها وهنالك الفئة الأخرى الذين يحملون من الشهاده فقط الأسم ويمكنك الحصول على تلك الشهادات من دول عديدة أولها أمريكا. النقطة الرئيسة التي أود أن أتكلم عنها أن الدراسات العليا داخل الدولة لاترتقي إلى المستوى المطلوب وأقولها من واقع تجربة لأني درست البكالريوس في الخارج والماجستير داخل الدولة. للأسف الجامعات الموجوده هدفها الربح المادي وفيها دكاترة يتنقلون بين الجامعات ووجهة نظري أن الاستفادة خارج الدولة أفضل بكثير.
الله يوفقج اختي في دراستج
اعرف طال عمرج
بس لأن الجامعة المنتسب اليها تشترط هالشي
اما الباقي عادي انهم يستقبلون الفرش على قولتج
رأيي الشخصي :
الوظيفة مهمة لاكمال الدراسات العليا كون النظرية تتوافق مع التطبيق العملي
على سبيل المثال :
اذا طلب بحث معين او برزنتيشن فمن السهولة بمكان تطبيقه على مقر العمل الرسمي
تقبلي تحياتي العطرة
كلام صحيح و اوافق عليه .. هذا نفس كلام المدرس يوم سألناه عن رايه
بس شو الحل ويا اللي ما تبا تشتغل من اصله << :oooww:
انا فاهمه شو اللي تقصدينه لاني فكرت بنفس الطريقه
والحل هو انه
تتبعين صوت ضميرج <–ما خذتنه من ليون كينك
شوفي انا فكرت وفكرت وفكرت لقيت انه الناس ما بينفعوني
اسمحيلي اقول هل الكلمه
انتي لين الحين مب معرسه شو الفرق لما تاخذين الماجستير ؟؟؟؟
النصيب نصيب
وعلى سالفه انه شكلج عيوز
تره صدق
اختج في الله (اللي هي انا ) من دشيت من ثلث اشهر واحس عمري عيوز عيل لما اخلص شو؟؟؟ http://www.satfrequencies.com/invest/images/icons/icon10.gif
بس تعرفين انا ابي اكمل دراستي عشان اثبت ل عمري شي… شوفي اسبابج ليش تبين ادشين ؟؟؟
اخوي عاشق الروح مب شرط الخبره انا دشيت الماستر وما عندي ما عند جدتي ،فرش من الجامعه
لا والله ما قصدت جيه
اصلا انا اخر شي يهمني راي الناس
و لكن ما ابا ابين Dispirit جدام عمري..يعني لهالدرجه خلص ال fun من حياتي لدرجه اني ماعرف شو بسوي و اسير اكمل دراسه
و عقب احس عمري تحولت الى انسانه اعوض نقصي النفسي بالشهايد
الموضوع شوي معقد<< السالفه اني مخربطه عمري شوي :^27:
الله يحفظج اختي و يبارك لج في ريلج
بالفعل مثال يحتذى به
=======
اختي دبي بيبي
ما بتكلم عن عمري عسب ما ابرر موقفي حسب كلامج
لأني من ضمن الفئة اللي تكمل الماستر .
بصفة عامة
سواء ذكر والا انثى
اعتقد ان بعض الأسباب اللي تدفع الانسان يكمل دراسته العليا :
– التوعية و نماء الثقافة العامة
– الترقي في العمل
– افادة مجتمعه بما تعلمه من نظريات و يحاول تطبيقها
– درسة و وعي ما يدور حوله في شتى مجالات الحياة المعاصرة
اما من يدرس فقط للحصول على الكرتونة ( مقولة دكتور ) فلن يستفيد غير الترقي في العمل
و من السهولة بمكان ان يفتضح امره انه لا يعي شيئا عند اول تجربة له في ميدان العمل و المعترك الحقيقي
او انه اشترى الشهادة من الخارج
او انه تفاخر ( خقة )
يوجد هذين النوعين في المجتمع
فاختاري اي منهما تحبين ان تكوني ؟؟؟
همسة : كملي دراستج لأن النجاح الحقيقي هو تحقيق الأهداف ( لا يكون الا بسلاح العلم )
و اذا حبيتي تدرسين داخل البلاد مستعد افيدج لكنهم يشترطون خبرة عملية في العمل لا تقل عن 5 سنوات + ان يكون Senior staff
اما خارج الدولة فهناك الكثير من الجامعات المعترف بها ممكن الاطلاع عليها من وزارة التعليم العالي
او بعض المعاهد المتخصصة
تقبلي تحياتي العطرة
مشكور اخوي على النصيحه
اليوم انا و ربيعاتي نرمس عن الموضوع و شكلنا بنكمل
عندي كم شهر لين اقرر وين و شو و شحقه و شقايل..فباخذ وقتي و اذا بغيت مساعدك اكيد ما بتردد
يزاك الله خير