مســـاكم بريحة الفانيلا >>> تحب الفانيلا

اليوم سالفتي تضحك شوي على قهر

هذا ربي يسلمكم ويعافيكم .. الوالدة الله يطول في عمرها ويعطيها الصحة والعافية ويمتعنا ببقاءها كل يوم تتصل فيني امممم مااذكر كم مرة بس ماشالله اذا وعت الصبح تتصل واتخبرني سوالف الخدامات واتصال الظهر تقولي شو بيطبخون واتوصيني لا آكل شي في الدوام عسب أتغدا واذا يعيبني انهم يطبخون عيش وسمج والا يسوون شوربة والا شو نوع السلطة واتصال آخر الدوام يكون : انتي وييييين !؟ اقولها في الدرب ماماتي … اطوف اشارة والا اشارتين تقولي : هاا وين وصلتي اقولها : انا بعدني في الدرب “وخاصة الحين شارع الخليج العربي ما يحتاي ” وتمت تعطيني محاضرة يا بنتي تعالي البيت بسرعة انا اخاف عليكم !! اقولها : ماماتي انا في الدرب والله واصلا انا ما احب الطلعات !

شوي وتتصل فيني يحليلها اتقولي هاا وين وصلتي !؟ اقولها: شكلج تتسلين معاي وعادت لي نفس الاسطوانة انا اخاف عليكم عيال الحرام وايد يمكن حد يغازلج !!! >>> وين يغازلون اذا انا من الدوام في السيارة واسوق في الشارع ! قالت لي : يمكن حد يلف عليج ! او يمكن حد يلحقج بالسيارة والا شي “امي من النوع اللي وااايد خيالها واسع ” عادي تتخيل ان في حرامي بيدش البيت وكل يوم تشيك على ابواب غرفنا لاااازم انسكرها بالمفتاح من داخل من خوفها علينا الله يهديها يارب ويهدي بالها

جاان اقولها : ماماتي انا في الشارع محد يوقف حد في الشارع عسب يغازل والا وبعدين انا متحجبة ومتغشية ولا اطالع حد ولا حد يطالعني قالت لي: انا واثقة فيج بس عيال الحرام وايد ما اتعرفين كيف يطلعون لج ! جااان اقولها : انا في حيااااتي كلللها محد غازلني اطمني قوم المغازل معروفين ونحن مب مال مغازل وهالسوالف .. تمت تدعيلي ان الله يحفظنا وسكرت عني فديتها

وفي ذاك اليوم كنت عطشااااانة وااايد >>>> بلغ مني العطش مبلغه ، وطول الدرب ونا اشوف البحر وودي بماي

المهم وصلت واحة أدنوك ونزلت اشتري ماي والا اسمع صوت من وراي !! واحد يتكلم بصوت عالي مع الفلبينو اللي يبيع ووين ما اسير يكلمه واسمع صوته في صرصور ودني على قولة المصاروة خذيت الماي وعلوج وما ادري شو بعد المهم ودفعت للفلبينو 5 دراهم جاان يقولي حسابج 6 درهم مدام !!

جان اظهر 100 درهم قلت له اصرفهم والا اسمع نفس الصوت يقولي اختي توكلي على الله ! >>> توكلنا على الله !!!

ما رديت عليه قلت للفلبينوا go ahead !

جان يرد نفس الصوت سيري انا بدفع عنج وقال للفلبينوا رد لها فلوسها ! >>> قلت في خاطري خير ان شاء الله اختك والا امك ولا زوجتك !

ما التفت ولا حتى رديت عليه وقلت للفلبينو go ahead !! والفلبيني مسكين متصنم ما يعرف يسمع كلامي ولا كلام صاحب الصوت لاني ما شفته لكن لمحت انه قصير وشفت بياض دشداشته !

وما عرفت شو قال بس جنه تحرطم ع الفلبينو ليش صرف لي ال100 وما فهمت شي لاني طلعت من الواحة

يوم طلعت سيارتي شفته ساد علينا الطريج وقلت يادي اليوم اللي مش فايت ! واتريينا لين راعي الرنج حرك سيارته

تميت اتأمل حواري مع الوالدة والموقف اللي صار قلت شكلي ضربت نفسي بعين هههههه

ويوم رديت خبرتهم في البيت ضحكوا علي اختي قالت لي يمكن شهامة منه وحليله الريال حب يظهر الكرم الحاتمي ! قلت لها يظهره ع الفقراء والمساكين مب يضايق خلق الله الله يهديه

المهم تحليلي لشخصية الرجال من قراءاتي لتحليل الشخصيات:

الرجل بأي شخصية كانت يحب العطاء واظهار النخوة والمساعدة لأي “انثى” طبعا الأغلبية والباقي اتوقع انهم لازم ينكتبون في كتاب الجاحظ “البخلاء”

والرجل بدون اي استثناء يحب انه يكون صاحب الفضل وهالشي يخليه يفتخر بنفسه وايد جدام نفسه وجدام الناس بعد حتى لو أخذ موظفة وهي تصرف ع البيت بيسير يدور على وحدة يظهر لها انه يقدر يعطيها ويستمتع بهالعطاء ولو كانت وحدة “اي كلام” ومرات الزوج يجرح زوجته ويقولها انتي مب محتاية اهلج يعطونج والا تشتغلين لكن فلانة مسكينة ما عندها حد ، تكسر خاطرهم الحرمة اللي “تحتاج” لهم او اتبين حاجتها حتى لو كانت مادية ! او حتى في الدوام تلاقينه يعطي من خاطره لأي شخص او “شخصة ” محتاجة شرح لاي شي في الدوام

وانتهى حديثي مع خواتي ان لا تصرفون على رياييلكم عشااااان يحسون انكم محتاجين لهم ويستمتعون بشعور المعطي ” لان اللي يعطي يوم يشوف فرحة المعطى يتضاعف عنده شعور السعادة ” طبعا هذا اللي نفوسهم سخية – أما البخلاء فبدون تعليق

ومن يوومها ونا آخذ معاي غرشة الماي في السيارة وماااشي نزلة لواحة أدنوك

واسمحولنا تراها ثرثرة وسوالف عادية بس قد يكون فيها متعة حديث مع الأحباب

.
.

اختكم المحبة لكم ســــارية

19 thoughts on “الدنيـــــا سوالف // محد غازلني في حيـاتي”

  1. فعلا تصرفج صح

    علمونا واحنا صغار ما ناخذ فلوس والا هدايا من أي حد غريب

    عيــــــــــب

  2. ختيه ساريه اللي سويتيه انتي هو الصح .. الحذر واجب وخصوصا في هذا الزمن !!!!!

    والحذر كل الحذر من الشيييش (محطات البترول) فيها علل واااااايد .. وعزه النفس مطلوبه في هاي المواقف

    تصرفج كان صح 100 % .. وانتي ماكنتي محتاجه مساااعده اصلا !!!!!

    انتي بنت ماينخاف عليها … وسبحان الله احساس الام مايخيب !!!

    شكرا …

  4. احس انه السالفه عاديه اهم شي تاخذين الموضوع بنيه زينه لانه ما سوى اكثر من جي مره مريت بنفس الموقف و الريال عنده اغراض وايده و الي عندي يمكن مال 5 و لا 7 دراهم وبغيت اخرد و كان عندي 200 و بدال هاللخبطه قال توكل قلت يرايال خل عنك قال توكل قلت يالله باي باي هههههه يعني مب سالفة مغازل و لا شي و الله و اهم شي ما تاخذين الامور بهالطريقه و اعتبري انه و لا مره حد غازلج فحياتج هههه

  5. مسآئج طيب وعود >> تحب العود ^^

    ….

    اختي احنا دوم ننظر للموضوع من طريقة سلبية .. على انه مغآزل وغيره
    اللي يبى يغآزل يسوي الف طريقة وطريقة غير هآي ..

    لازم نحسن النية فغيرنا .. يمكن من طيب خآطره ما بغآج تخردين ال 100 على ريآل وقآل خلاص برآيج توكلي عالله .. ترى واايد تستوي ..

    عآدي مرآت تستوي حقنا فالجامعة هالحركة خآصة يوم نطلب كوفي .. أحيد مرة دكتوري طلب كوفي ويانا .. وقصره ريالين فلين ما يطلع البوك وغيره .. قلتله دكتور نو بروبلم انا عندي خردة خله برآيه ..

    في منهم ريآييل والنعم ويعآملون اللي برع مثل خوآتهم ..

    انا لو تعرضت لهالموقف بالعكس بقوله يزاك الله خير وبروح ..
    ما اعرف ما بفكر على انها مغازل وجي

    …..

    عالعموم الله يحفظج ويحفظنا ويستر علينا وعليكم ..

    ..

Comments are closed.