شو سالفتهن؟؟
مب كفايه الرادارت الثابته في البلاد؟؟
والله حاله .. بنقول يخشونها ورا سياره ولا عمود ليت .. بس مب ورا الحاجز مال عمال الشوارع …
ولا تمشي 100 في شارع 80 .. 700 درهم .. انا مستغرب من ال 200 ولا 100 درهم هاي لل 10 كم.س
ماصارت يعني .. 4 رادارت عادي مصكوك 3000 درهم.. شو ها؟؟ بنقول فوق سرعه الرادار ب 50 اب 700..
مب 10 ولا 20 ..
مرات الشوارع خاليه.. شو المانع تمشي 100 ولا 110؟؟ ليش لهلدرجه مسرع؟؟
ابصط مثل شارع الورقاء .. دومه خالي .. حاطين رادار 90 ..
يفكونا ويسون ضرائب ولا يصرقونا جي .. مب حاله..
انا مب مشكله عندي البيزات بس حرام يعني .. الهندي مثل شو يسوي اذا زخه رادار؟؟ وراتبه ما ايي 2000؟؟؟
اضم صوتي لصوتك ……….
شباب الواحد يوم بيرمس يرمس بشوية منطقيه تقيدوا بالقوانين والي مب قادر يلتزم بالقوانين
لا يسوق موتر التكاسي اكثر من الهم على القلب يركب له تاكسي ويفك روحه من الرادارات
تحياتي لكل من يحترم قوانين المرور فقط لا غير
ببساطة
مخالفتك لا سلامتكــ
ها الموضوع اللي ماشين فيه الجماعه
والله يكون في العون .. كل شهر تطلعنا مخالفه ماتعرف من وين
عزيزي
مثل ما قالو الشباب الرادارات الثابته مثل النمل ما تقدر تسرع. شوفايدة الليزر جن؟ بتقولي عن الحوادث بعد؟ حط لك رادار ثابت و الكل بيخف حتى لو كان صندوق.
و بعدين في قوانين الصراحه مش سليمه . انا من فتره يتني دوريه و شفته يوايج عليه من جدام و وقفني. تعرفون ليش؟
يقول العازل الشفاف على الجامه اللي جدام ممنوع و يعتبر مثل العاكس!!!!!
قلتله اول مره اسمع في هذا الشي . و مع كل هذا سجل المخالفه و فيها حجز شهر!!
يعني لو مركب شامل احسنلي!
والله حاله تسرعون وما تبون الرادار يصوركم .. اللي مب قد المخالفه ومب قادر يدفعها يحترم قوانين الشرطه ولا يسرع .. اما انك تسرع وعقب تقول والله خالفوني
واذا عن السالفه ماديه .. اذا رادار دخل سواء 5 مليون او 10 مليون ما عتقد بيسوى شي من الميزانية المخصصه لوزارة الداخلية ..
اتمنى انكم تاخذون الموضوع بعقلانيه اكبر من جذي ولا حد يفكر في مصالحه الشخصيه .. فكروا بالناس اللي توفوا عيالهم بحوادث .. فكروا بكم ام فقدت ولدها بسبة سرعة او حادث الله يبعدها عنكم …
وفي النهايه بصراحه عــيــب انه الواحد يصف شرطة بلاده بالحراااامية .. اللي يشتغلون تراهم مثلكم مواطنين
والسموحه
الموضوع ببساطة مادي في مادي من سالك والرادرات والمخالفات
لو تلاحظون تغير كل شي بعد اندماج هيئة الطرق والمواصلات مع الشرطة
لانه عدد الموظفين زاد قالوا نحتاج ميزانية اكبر قالوا لازم نزيد الرادارات والمخالفات وسالك معاهم عشان نطلع رواتب الموظفين
كلنا نذكر لعبة سالك وانه بيخفف الزحمة هههه
والحين المترو بعد اونه بيخفف الزحمة
كله لعب في لعب وانه جهود جبارة هههه
واتريوا المزيد بعد الله المستعان