الزواج من أجنبيات ( غير المواطنات ) .. نقااآآآش

79 thoughts on “الزواج من أجنبيات ( غير المواطنات ) .. نقااآآآش”

1. بسم الله الرحمن الرحيم

   يسلم اخوي abou essa كفى ووفا و ما يحتاج ازيد شي فالموضوع .

   بالنسبة لموضوع الزواج من اجنبيات . انا لي وجهة نظر مختلفة . لانه كلمة الاجنبية الي تعنيها الاخت لها عدة تفسيرات .
   اجنبية بمعنى غير مواطنة . او اجنبية بمعنى غير عربية
   بالنسبة لي انا اشوف انه زواج المواطن من خليجية ما فيه شي خاصة اذا كانت من الاهل او القرايب بحكم امتداد القبائل العربية في شبة الجزيرة .
   ام البقية من الاجانب مع احترامي للجميع فأتوقع ( راي شخصي ) انه زواج لحظي او مؤقت ومعظمه قائم على مصالح . الا اذا كان احد الطرفين مستعد على ان يقدم تنازلات كبيرة . وهذي التنازلات مرات يكون فيها تنازل عن الهوية او العادات ..الخ و التنازل اعظم في حالة وجود اطفال ضايعين بين مجتمعين فتجد الهوية عندهم مهزوزه . مثل شخص سمعت عنه ترفض زوجته ( اوروبية ) تمشي معاه اذا كان لابس كندورة و شماغ .

   النقطة الي تتكلم عن المهور و غلاها انا ابا اوقف عندها شوي . لانها من واقع تجربة شخصية لي .

   الاخوان او الشباب بشكل عام يتعذرون بالمهور و غلاها . وهذا شي موجود طبعن . لكن مب للدرجه الي تتكلمون عنها . اذا انت يا قلان خطبت من البيت الفلاني و قالوا لك المهر كذا . المفروض تكون واضح و شفاف فالبداية تقولهم يا جماعة انا وظيفتي كذا و راتبي كذا و المهر الي اقدر عليه كذا حتى قبل لا تخطب بشكل رسمي و تكون رمسة بين الحريم خبر الوالدة توصل الكلام هذا . اذا موافقين توكلنا على الله . واذا مافيه مجال الله يوفقني بلي ترضى بي و الله يوفقها و تلقى نصيبها. وقولهم من البداية انا ما ابغي ديون اول حياتي. وانشاله اذا من نصيبك الله بيكتبها لك .
   بس المشكلة عندنا اذا الواحد خطب و قالوا له المهر كذا و الصالة كذا و الفندق كذا دق صدره و قال افا عليكم . لا يصغر في عين البنيه .
   و بعدين اذا ما لقيت نصيبك فالبيت هذا يا اخوان شوف ناس غيرهم يقدرون حالتك . مب الا البيت هذا و البنت هاذي . و ترى وايد الي يشترون الرجال قبل المال .

   انا شخصيا خطبت مرتين اول خطبه الله ما كتبها بسبب المتطلبات المالية . و كانت تكاليفها كالتالي
   حفلة الخطبة 30 ألف
   نثريات 18 ألف
   مهر 50 الف درهم + ذهب 50 ألف + 88 الف تكاليف العرس بالكامل + 30 الف مؤخر

   تكاليف زواجي الحالي كانت كالتالي .
   العقد 4 ذبايح
   مهر 10 ألاف درهم + ذهب 20 ألف + 40 الف تكاليف العرس بالكامل + بدون مؤخر

   و عمي الله يذكره بالخير رجل مقتدر جدا جدا و فيه خير . يوم خطبت عنده قال لي نحن ندور للرجال و الفلوس هب في حاجتها . والحمد لله عايش حياتي من احسن ما يكون . لا سلفية ولا دين و قاعد ابني بيت و الحمد لله و الشكر وكل ما يصير مشكلة او موقف اقول في نفسي , عمك الله لا يهينه ما قصر معك وفكك هم الدين , لا تطاوعك نفسك و تزعل بنته . ( صلوا عالنبي) ^_^

   اما سالفة ما يقوم به بعض الشباب الله يهديهم الي يتزوجون من اسيويات و العذر غلاء المهور فما اقول الا الله يهديهم . لانه الجنسيات هاذي ما يردعها لا وازع ديني ولا اجتماعي . و مهما كانت زينة ( وغير الباقين) وهذا عذر الشباب . بترجع تحن للبيئة و الشي الي ربت عليه . و اظن الاخوان و الخوات يعرفون عن شو انا اتكلم .

   تراني فاضي عالصبح قلت اشارك ^_^

2. سبحان الله … الموضوع من وجهة نظري طبعا من غير ما أعمم

   أستغرب

   صار الورق و الدفاتر … هي إلي تحكم على الفصل و الأصل و الأخلاق و الدين

   أقصد بالورق : الفلوس

   و أقصد بالدفتر : جواز السفر أو الجنسية

   و في نقطة مهمة شي عرب ( خليجين + من دولة عربية ) و عجم من غير تحديد جنسية معينة ..

   مكتسبين جنسية الدولة ..

   و أهم شي لا فرق بين عربي واعجمي إلا بالتقوى ما ذكر رب العالمين الجنسية أو الفلوس

3. السلام عليكم
   حبيت اشارك معاكم في الموضوع
   من وجهت نظري يا جماعة الخير أول شي الغلاء في المهور
   مثل ما تفضل الأخ بو خلفان 100 ألف ما يسدن من غير الزهبه والفندق وليلة الحنا وشهر العسل واذا شي قصر ترا قصر الشي الفلاني وادفع (من واقع عشت هالشي بس الحمدلله مب انا)
   في عوايل تشتري الريال وما يهمها المهر لانهم يبون الريال اللي يستر على بنتهم ويحفظها
   بخصوص كلام الأخت فراولينا عن الشباب اللي ياخذون مواتر بالقيمة العالية ترا اقولها البعض من هالشباب (مدين ومزين) والسموحه يا شباب هذا الواقع واذا الواحد دفع هالمهر الكبير بنفس سياسة (ادين وعرس) الوحده كيف بتعيش مع ريلها ماتبا تاكل ما تبا تطلع تتمشى تتسوق تعيش مع زوجها في بيت الزوجيه

   ليش اغلب المواطنين ياخذون اجانب ….؟؟
   اول شي المهر يكون قليل والأجنبية ترضى بأي شي اهم شي عندها تسكن وتاكل.

   شو الفرق بين المواطنه و الاجنبيه ..؟؟
   لا فرق بين عربي واعجمي إلا بالتقوى (اشوف المواطنه والاجنبية كلهن واحد بس الاخلاق هيه اللي تحكم في النهاية)

   كيف ممكن انققل من هالشئ ..؟؟ ( حل لهذي المشكله )

   – أول شي نقلل المهور (الحكومه سوت صندوق الزواج بس بعد فوق هذا في عوايل تطلب أكثر)
   – الوعي الديني والأخلاقي (يمكن تكون الأجنبية مب مسلمه)
   – اي مشكله بين الزوجين تكون بينهم بس وعدم تدخل لا اهل الزوجه ولا الزوج لان هالشي يخصهم هم ومايخص أهاليهم (طبعا بعد العرس).

   والسموحه منكم

4. لي رد في وقت لاحق و لكن أحب أنوّه لنقطة بعض الأخوة ( دون ذكر أساميهم ) حبوا يتفلسفوا فيها

   الحين الأجنبيات (غير المواطنات ) كلهم داخلين مصلحة ؟؟؟؟؟؟؟؟ إتقوا الله

   الحين المواطنات كلهم كسر ظهر ؟؟؟؟؟؟؟ إتقوا الله

   يا جماعة يا إن يكون عندكم إنصاف في الكلام أو ما حد يرمس مع إحترامي للجميع, لأن في من الأحنبيات اللي يوزنون بالألماس و الذهب لأخلاقهم الرفيعة و دينهم النزيه و عاداتهم المحترمة و كذلك الأمر لأخواتي المواطنات..

   ليس تخلون فئة من الطرفين يشوهوون سمعة المجمل ….

   في عقول تفكر و في عقول تمييز من الزين و منو الشين و لكن إذا الواحد ما يعرف يختار هني المشكلة …

   والله يا جماعة أعرف ناس أخذوا أجنبيات و شافوا تربية لعيالهم مافي بعدها تربية ( أخلاق, دين, إحترام, إلخ…. )

   و كذلك الأمر بالنسبة لأخواتنا المواطنات… و هناك بعض الحالات اللي كانت فيها الأجنبية داخلة على طمع و مصلحة و لعلمكم الشخصي ترى في مواطنات بالهبل يدخلن مصلحة ( مع إحترامي لجميع فئة الحريم المواطنات ) و لكن كل بني آدم يعرف شو الغاية اللي يبي يوصلها ….

   أرجو من الجميع عن فتح باب النقاش في مثل هالأمور يكون في نوع من الجدية و عدم التساخف في آرآء أو أفكار البعض..

   مثال: رد الأخ (tokyo ) , أنا أشوفه سخيف و ماله داعي و لا قدم و لا أخر في النقاش و إنما فتح باب من الحزازية لربما تؤدي إلى مشاكل بين الأعضاء …

   أرجو من الجميع وزن ما سيقول لأنه إمّا أن يرقع شأنه أمام بقية الأعضاء و إما أن يؤثر عليه سلباً

   تحياتي للجميع و آسف على الإطالة …

5. السلام عليكم ورحمة الله وبركاته
   الحمدلله والصلاة والسلام على رسول الله وعلى آله وصحبه أجمعين
   بالاختصار المفيد الاجنبيه دامك مواطن بتاخذك ولو فيك مية عله المهم انك مواطن وعندك كم درهم لان الدراهم مراهم
   والمواطنه لا بيكون الوضع غير عندها شروط و مواصفات لازم تتوفر عند الزوج
   بس من ناحية منظور راحة البال في المستقبل عليك ب بنت الدار حتى لو غلا مهرها وحلات الثوب رقعته منه وفيه
   والزواج ب الاجنبيه اعتبره بنظري زواج مؤقت ينتهي بسرعه وقت انتهاء المصلحه او وجود مشاكل الاجتماعيه وخاصتن في اختلاف في العادات والتقاليد,وشوفو من هم الضحايا الاطفال .
   ونصيحتي لكل واحد يختار الزوجه الصالحه فالام مدرسه اذا اعددتها اعددت شعبا طيب الاعراق

Comments are closed.