الزيادة ( كارفور – زهرة لبنان – محارة البحر – مخابز سلطان ) !!

السلام عليكم

وصباحكم نور وسرور

عن سالفة الغلاء بقلكم سالفة وياي اخواني

كفتريا محارة البحر اللي في الخالدية قرب زهرة لبنان

دخلت أكلت عنده انا وربيعي وطلبت ويا الأكل صحن مايونيز الحبيب راح جاب الصحن والمعلقة واحدة ونصف حط مايونيز ، لمن صار الدفع في درهم زيادة !!! طلع سعر صحن المايونيز ، اضاربت ويا الكاونتر

واللي خطف قبل 3 أسابيع هذاك اليوم صوب محارة البحر وشاف واحد يصارخ على الكفتريا ويقول انتوا نصابين بصوت عالي بيكون شافني

في كفتريا الأمانة في المفرق تطلب صحن مايونيز بيجيب لك بدل الصحن صحنين وما تدفع ولا فلس

زهرة لبنان تدفع على السندويشه من 5 إلى 8 دراهم !!!

ومخبز زهرة لبنان تدفع من 4.5 إلى 7 دراهم !!!

مخبز كركاز اللي في الخالدية أقل شيء صار عنده 3 دراهم !!

الخبز في مخابز سلطان صار 3 دراهم !!

الحليب ولبن نفس سعره لكن صغروا حجمه !!

يضحكون علينا هاهاهاهاها

سؤال اخواني ، نحن ليش ساكتين !! سويت مرة من المرات تلفون على دائرة الشكاوي مال رفع الأسعار بشأن ( …. ) ما أتذكر الموضوع ، لكن حولوني على الدكتور والدكتور كان مشغول في إجتماع ولا شفت خبر !!

إن كان وزارة الإقتصاد ودائرة حماية المستهلك لا تقي نفسها من حرارة الصيف وحرارة طلب المستهلكين والتجار فما الحل !!

هي معاها الحق طايحة بين نارين المستهلك والتاجر

لكن لو نشوف العمال اللي هني الصراحة طايح حظهم

اللي راتبه أقل من 4000 درهم ما يقدر يشم ريحة أبوظبي ولا محلاتها !!

واللي راتبه تحت 4000 وهو برع بوظبي ما يشوف راحة ولا راحة البال من الأجار + المعيشة + المصاريف !!

على سالفة المصاريف خطفت على كارفور مرة واخذت نشرتهم ، قريت مال المدارس الصراحة اللي عنده 2 من العيال ودخل كارفور لابد يدخل بإيده ما يقل عن 2000 درهم

وصباح النور البرنامج اللي يطلع الصبح يحث ناخذ من الجمعيات

يا سلام

هذا فيض قليل مما في صدري ـ آسف تكلمت في التلفون فإنقطع حبل أفكاري –

بالأخير ، أخواني نحن لابد لنا ما نلوم دائرة حماية المستهلك أو وزارة الأقتصاد ، لابد لنا أن نلوم مين يشتري والسعر غالي وفيه شيء يعوض عن اللي يشتريه بسعر أرخص ، لانهم هم اللي يساعدون في ثبوت الأسعار

وبأخير إسمحوا لي على الإطالة

السلام عليكم