الشاعر راشد بن طناف

احد الشعراء االفطاحله من ابناء الامارات..راشد بن طناف بن فايز بن سعيد,ولد في واحة الذيد التابعه لامارة الشارقه حوالي عام 1910م,فقد والده مكرا ,فرعاه سعيد الصوايه النعيمي جده لوالدته,حتى بلغ السابعه من عمره حيث انتقل الى مدينة الشارقه مع اسرته,حفظ القرآن الكريم عند المطوع ,ثم تعلم الكتابه لدى الشاعر احمد بن عبدالرحمن بوسنيده,تفتحت قريحته الشعريه بعد عقده الاول ,عمل مهنة الغوص وهو في السابعة من عمره,وزاولها لمدة ثلاثين عاما ,ثم عمل في مهنة قطع الاحجار المرجانيه البحريه لاغراض البناء لمدة اربع سنوات.
تزوج اربعة نساء تباعا ,آخرهن ماتت مهي تؤدي فريضة الحج عام 1975م,مصيفه المفضل”النباعه”التي اشتهرت بغديرها الكبير الذي كان يمتد بطول كيلو متر واحد تقريبا,وهو المصيف الحبب لمعظم اهالي الشارقه.
آخر عنوان له كان بيته في “الرمله”بالشارقه,وكان هذا البيت بمثابة الصالون الادبي يزوره الناس من كل مكان ليكتبوا قصائده ويسجلوا بالات التسجيل طريقة القائه الفريد التى اشتهر بها في السنوات الاخيره.

كله من امك

ياشوق عنكم خاطف ابدوق = بشراع ومشغّل مكينه

مامن طعم فيكم ولاذوق = حاشا ولا فيكم جنينه

لوعاد زينك يشبه ام طوق = واللا شرى فلح الشرينه

قلبي اتعلاّ وارتفع فوق = ما ايحيط ف الربعه اثنينه

نعكم بشوم بركب النوق = صوب الذي صافي جبينه

ياللي خدوده تشغل بروق = ماجد عبر في السفينه

بومضمرِ والراس مطلوق = والصدر به شوبين تينه

واللا المضاحك در مفروق = دانات لج امفرّدينه

بومبسمٍ عربٍ ومنطوق = وابريطماته امديرمينه

مملوك لو طناف معتوق = سنتين خذتوا هاجرينه

اخير ولو بعتوه فالسوق = يوم الضنا يهجر ضنينه

لو ييتنا باتاخذ الحوق = ودفتر جديمك سامحينه

عيّال ماتوفي بلحقوق = وكله من امك ها اللعينه

ماروم اسوي الدرب طرّوق = كل يوم جني لي اضغينه

وياشوق عنكم خاطف ابدوق = بشراع ومشغّل مكينه

في المدرسة

في المدرسه عني ايدرّس = يقرا كتاب الالف والبي

خلانيه يالس و أكرّس = بمضغ لحمهم ناضي وني

يامارس المهجه تمرّس = تسحب وصد القلب با اللّي

دمعي على الوجنه ايخّرس = حبك بلاني يوم انا اصبي

لوشفتني شيبه وافرّس = وامشي بعكازين وارتي

والله والله ماتعرس = مادام راسي باجي وحي

وانا الذي ساجي واغرّس = بيداركم خرفوا لي اشوي

عيزت كم اطبخ واهرّس = ويوم اغرفوا مابدنّي شي

كلّه كله ذاك لمضرّس = لي يايب اخطوطه من دبي

واجف على بابي واحرّس = مرةٍ افج ومرةٍ ازلي

مادوّق اشراعي امترّس = ولانزّل الفرمن عن الصي

تصبغني بجذبك ورّس = عيّيت عنك وبتبع الفي

ردك ضيق البال

يازين ردّك ضيّق البال = واحرمتني شوفك ولاماك

غثّيت بالي والعقل زال = وقلبي اتعلّق فيك يقفاك

وانا من اللّيعات في حال = وانته امريح البال ش ادراك

ولاتفتكر فيّه ولا اتبال = لابد عليّه حدٍ اوشاك

ياغر ياغالي يازعّال = لوماتباني عاد انا آباك

قلبي جداك أيّر ميّال = وانير يوم اتصادف اوياك

فيك الجمال وحسن جتّال = سبحان لي صوّرك وانشاك

ارميتني من اوّل الفال = صوّبتني بالحاظ عيناك

ياغيد ياوحشي يا يفّال = مافي الغواني حد شرواك

يابوحواجب تشبه الدال = ياما حلا صفة ثناياك

وانهود صدرك وقّف اشكال = كالبرتقال بازمة اصباك

وامضمرٍ فيه الحقب يال = هايف وبالردفين محلاك

ياليتني في ريلك انعال = واللا بقربك عبد واحضاك

خادم ولو في شوفك آنال = نظرة عيانٍ في محيّاك

ان قلت بصبر فالصبر طال = سيدي متى بتشارف اوياك

والله يا الغالي فلا ذال= جفني ولاغضى وخلاك

بفديك روح وحالٍ ومال = حتى صبي العين يفداك

في مهجتي

تدري بيه مالي عزا عنك = لو بالسلام اتمر و اتزور

وان قلت بسلي جذب انا عنك = امحال هذا مول ما ايصور

في مهجتي والجاش مسكنك = لوباتمر اسنين وادهور

انا الذرى لك والسدف عنك = اوياك بقطع سبعة ابحور

باسال من باسال.؟ بي منك= لا اتشط بي تاخذ تاخذني ابزور

انته ابسعه ونا حسب عنك = كمّ الصبر واتمر لعصور

ابعدت ما ايّيني نبا منك = ونا على لاماك مجبور

ما اتنام عين الغضي عنك = ياسيّدي يابدر لبدور

ويا اوليفي هذا خطا منك = والشي هذا منكم اقصور

قالوا حشى مابنغفل عنك = واسكت وخل الشي مستور

بوصل وبيزول الكدر عنك = وبتصير في نعمه ومسرور

لون الدمني

البارحه يوم القفنّي = اربع من الخفرات لحرار

فيهن شرا لون الدمنّي= لي شعّلت وسط الحشى نار

بسبابهن قلبي محنّي = هن غرب لو سكّان فالدار

فيهن غرست احساس ظنّي = جان الوصل ماينقل اخطار

وفيهن تخايل نظم فنّي = ما اعرفت جيف آسجل اسطار

ينّي ابهد وسالمنّي = وقالن ياراشد دير لنظار

نبغيك يالشاعر اتغنّي = وفينا اتسجل نظم لشعار

قلت اعذروني ما اعذرنّي = وقالن عليك الحق يندار

الله واكبر يوم ينّي = واللي التوت فالبشت لخيار

ويابوعلي قم بالتأني=اوياك نترافى ف لشوار

ويابوقذيلات اتبنّي = يطلن ابمسج وطيب لعطار

حبّه وسط قلبي يدنّي = شروى الرعد وايهل بمطار

آه يان قلبه

آه يامن قلبه تشقّا = وانتصف آزم جسيمينا

لاحشى مابحتمل فرقا = لي امربنّه من اسنينا

لاصديج ولا رفيج القا = يفعل المعروف والزينا

نيم يزهى لي من الشرقا = هو غناتي قرة العينا

جيف بصبر جيف بتّقا = ساطيٍ عوقه من اسنينا

في هواهم دوم انا امشقّا = ماليه غير الله امعينا

الجسم والحال مندقّا = ياعلي جيف الفكر فينا

ف الهوى فاهم ولا اتنقا = غير لي فاهم معانينا

بوخديداتٍ شرا البرقا = يشتغل مابين مزنينا

والمضاحك دونهن غرقا = يك داناتٍ مثامينا

في حشايه علّته ترقا = عايت ابكل المداوينا

بات دمعي هاطل ابهرقا = في الدجى طلع الميازينا

[ لوٌل خصوصي ]

اسهيت عني عاد وانسيت = وانسيت يمع الشمل ويّاك

وقت المسا في رايح البيت = مايرفض الميثاق شرواك

بيدك اموقّع ع العهد الصيت = ماقلت ذاك الحين ماباك

تبغي ارش بالزيت = والبج النيران ف حذاك

بتقول ياطنّاف زلّيت = وباشمّت الخافي به اعداك

راعي العقارب والتواليت = ما ايفيد يوم تقرب احذاك

نيس ويبل م الذنب شليت = ماينغفر ذنبك وحاشاك

لو تغسل ابخيشه من الريت = النفس ماتهواه لاماك

لوّل خصوصي يوم جرّيت = واليوم تكسي صرت وش ياك

خذب الرقم لجره وحطّيت = وايد يويل ويركب اوياك

م القلب لين السيج خريّت = معنا سقط ذجرك وطرواك

ترّس اشراعي عنك ملّيت = والقلص قصّيته ولا باك

جنة الحور

قصر انبنى في حالة الخور = مسفر ويتلالا بلنوار

ماسيّدت من مثله قصور = ولا في امريكا مثله اجوار

منور اشعاعه بين لبحور = واتحيّرت في شوفه انظار

فيه النعيم وجنة الحور = واشجار لي تسقى بلنهار

نرجس وفل ومنبت اعطور = كم غرّدن ع اغصونه اطيار

من راعبي وبلبل وعصفور = يشدن طرب يوم الهوا دار

اهواك

أهواك واتشرف ابطرواك = وابغض واعادي من يعاديك

وسط الحشا لفواد لبّاك = الروح مجبوره اتلبيك

ثرمن خلج ف الناس شرواك = غير النبي يوسف شراويك

لا اتمد للحسّاد يمناك = لحسود بتخرّب معانيك

ناس تحاول تبغي رضاك = وانا ابحال ومال برضيك

وان ييتني باتاخذ رضاك = حتى ابنصخ روحي بقاضيك

البنك صخرته لعيناك = بكتب على احسابي وبعطيك

رغم العيزّ بكشف اغطاك = لوهي بغت عني اتغطيك

تعبان وامخسر على امطاك = هي من تبا غيري ايمطيك

مالوم حد

ظنيت بك طاقه دمقسي = ما ادري شرى يونية الجيب

مالوم حد الوم نفسي = حب بلا صرفه تعذيب

ماخذ ثمان اسنين بسي = صابر على جذب وتجليب

تاخذ بيان وشي دسي = انذال مافيكم ترحيب

يابن الحجنجل ثرك هسي = تبع الهوى يبغي تراتيب

اعرفت مقصودك واحسي = شيّبت راسي قبل لمشيب

جي ماختلط جنسك وجنسي = جنسك رحى تطحن بلا شيب

ابيع وانادي ابحسي = ولخراي باعصره عن الغيب

مايستوى جني وانسي = والجن كاباهم معازيب

طارح على هيرك امجسي= عقّبت بويه والعلم بيب

ساحب ولاقربك برسي= بدبر صلغ والبندر السيب

يالنذل لي مافيك رسّي= كل ماكرمتك لازم اتعيب

صلوا عدد ماهب نسّي = ذعذاع وايداور م لمغيب

ماقلتلك يالغالي

ماقلت لك يالغالي اطمن = خل الدلع لاتصير بطران

اخير تطاوعني وتستن = لاتستوي خبله وشيطان

ماريت فيكم حسن ظن = غير الرفاس وعضّ لسنان

قلبي عليكم دايم يحن = وانته اقليبك هوب حنّان

اتشوف عمرك ف الوزن تن = شايب ووزني سبعة اتنان

يتك النفيعه سقّط وجن = والبنك مملاي لك نيطان

حبك كمنجه ف الحشا يرن = ويحرك اوتاري ولشجان

يا اوليّفي يا اصغّير السن = لاتستوي لي دوم منّان

ان ييت صوبك ريتك اتون = ون سرت ترقص جنك احصان

[ يازين ]

يازين ظاع الظن لي فيك = وايفيت يالمضنون وش ياك

لول اتصبّح بي وامسّيك = واستانس ابوصلك ولاماك

واليوم لاتييني ولا ييك = شاجي وعيني دوم ترباك

يرتاح بالي يوم الاجيك = واصيح يوم ايمر طرواك

لوتهجرنيه مابخليك = لوعاد تنساني فلا انساك

ون خفت يالمضنون واليك = الرب لي صوّرك وانشاك

يوز اتّق المعبود باريك = وارحم وليع امعذب اوياك

تعبان متشجي ويلعيك = ساق العمر والمال فدواك

يانور عيني لبركه فيك = تبقى وانا لك خادم احظاك

[ قم يانديبي ]

قم يانديبي فوق شقرا امعناه =و انصى زكي اليد عالي قدرها

اقلط وقبّل بالتحيه يمناه = شيخ على الضيحات يدّي نذرها

جليل من الشيخان في وصف معناه = ان مدّ باليمنا شماله قصرها

سلام انوج من شذى المسج يهناه = واطيب من ارياح الجنان وشيرها

لك يانجيب البيت ياعالي الجاه = يامنسب الضرغام عالي وكرها

ابيات شعر م الخوافي امنقاه = وامسجلات بالمعاني سطرها

سلطان بن زايد بلرواح نفداه = ونذرى ابظله من حوادث خطرها

يثني الصخا ولجود كل من عنى وياه = يسدي الفضايل مايحاسب خسرها

يمكث ابنعمه خالجه دوم دنياه = ابنعمة عمت بدوها وحضرها

دافم ابحزام وعزم والمجد يرقاه = شخص سلالة من طوايل شبرها

ومن عقب ذا يا ابن الغضفر اتلقاه = قول امنقا من خوافي غدرها

ادعو لك التدبير تهنا ابلاماه = وايطول عمرك في تلايا دهرها

ياجايد الفرسان وقت الملاقاه = وامعشي اوحوش الخلا في قفرها

يانجل زايد ياحمى كل منجاه = واكساك ربي باليمايل نصرها

اوهبك رب العرش فخر ومذكاه = وانته سفر ظلما الليالي وبدرها

ولايظن شاعر في مجالي ويهزاه = الا بليد وخالي من فكرها

باتت اقلامي في مدحكم مشقاه = آخط واسجل معاني فسرها

ولاني قصيد المدح فيكم هل الجاه = وانتو عليتوا في النوايب نظرها

والمدح فيكم له قوافي ومرقاه = يامن بنيتوا للمكارم قصرها

صلاة ربي عد مانهل اسقاه = أروى طعوس عمن وانبت ثمرها

انجفت من لاماك

انجفت من لاماك ماباك = عايف ولاداني مجاريك

يالخضر زد الناس مدناك = شاع اخبرك كثرت مواديك

لول غناتي القلب يهواك = واليوم دورّ من ايهوايك

عند العرب والله لاشناك = من عقب جرحي من يداويك

ماييت متعنّي ولولاك = واليوم والله مول ماييك

حصلت من مثلك ويسواك = ولا اتظن ماحد يساويك

لا اتزم عندي عارف ادواك = وان سرت والله لاداويك

انهي ايلين ايوقف انهاك = اعيزت كم انصحك وانهيك

بجرب السلوى وبنساك = لوّل وسط قلبي مراسيك

تمت وصلوا عد ماياك = انهى وطالع جان اراضيك

[ كم يريت الهوى ]

كم يريت الهوى زمري=فاهم السيحات واتصاغا

بالغ السبعين من عمري=والهوى ف القلب يتراغا

صوغ لي من صوغك الجمري=واخدم اليه قيد ارصاغا

ماتشوف الدمع ينهمري=سالبني حلو لمّاغا

يارحني في وسط صدري=وحط فوق اليرح لي داغا

ثيبني يالكوس مندمري=قاصر ايدايه يبا ابلاغا

مبتلي بسويبي الغمري=جيل و المحّار برواغا

لي قحمت وييت با برّي=شفت يارح والعقل زاغا

شفته اليريور متذري=فوق دلخ وتحت نبّاغا

بضربه والكابر افتّري=وافترق طشه عن ادماغه

عطر في فنيال متشري=وحرف فا والرا سر وناغه

كم لك بافسر السري=ياحمد بسني م لملاغا

[ يانور عيني ]

يانور عيني كم اطمنك = ووصلك عليه بالتشافيج

وش اللي بدى لك عاد وامحنك = ياقايد الريم المطاليج

هذا الخاط مني ولو منك = واتحلف لاني مول مافيج

دلعان واللا ذا بطر منك = ياغيد ياحلو التباريج

مالي صبر مالي عوى عنك = وقلبي بحبك دايم اشفيج

يرتاح لي منه دنا منك = ووصلك ايفّري عن الضيج

ظنيت بك لاني بأمنك = وبغرسك مابين المعاليج

هذا الذي نستاهله منك = يابو حيايين معاويج

وسط السويدا قلت بخزنك = لوكنت ناصح م المصاديج

وش هالجفا ياللي بدا منك = عذبتني وامنشّف الريج