في موضوع كنت وانا بعض الشباب نتناقش فيه وهو المغازل وكل شخص قال قصه يعرفها عن احد اصدقاءه بالمغازل وكيف كشفته زوجته وحبت اطرحها عليكم وبعضها يضحك
القصه الاولي
واحد كان مسجل اسمه ربيعته بالتلفون راشد وكان سهران وزوجته عداله عند التلفزيون وكانت ربيعته تدق رنه وتكسر رنه وتسكر حرمته قالت له رد عليه يقول لا هذا واحد اسمه راشد يبا سلف قالت رد عليه وقول ما عندي وكان صوت التلفزيون عالي المهم رد على التلفون فجاءه فاصل اعلاني وصارت الصاله كلها هدوء
وقال لها ها رشود انا مش فاضي والصوت البنيه كان طالع من التلفون واضح وسمعته زوجته وركضت وراحت بيت اهلها اسبوع واخر شي ردت
القصه الثانيه
واحد كان له علاقات غراميه مع بنات وكان له سافرات وكان ياخذ له كل وحده صوره ويحتفظ فيها في البوم خاص فيه بس كان في الدوام مش في البيت ايام حرب الخليج يه مسوؤلهم وقال الي عنده اشياء خاصه في المكتب يشلها لانه في اي وقت بصير تفتيش فكان الاشياء الخاصه الالبوم شله وحطه في دبه السياره وصار له فتره اكثر من شهر ونساه راح هو وزوجته السوق اشتروا روشن للبيت ويوم رد البيت قال للناطور شل الاكياس الي في السياره ودها الشقه والناطور شل الكيس الي فيه الالبوم وزوجته تحطي الاغراض في الثلاجه طاح ايدها على الالبوم وصارت له مصيبه بس الحمدلله ما وصلت للطلاق
والقصه الثالثه
واحد كان مالج ويالس ويا زوجته في كان اخوها الصغير عينه على التلفون عطاه التلفون واتصلت ربيعته ومحطي اسمها اسم واحد من الشباب الولد الصغير بالغلط حط التلفون على السبيكر وصارت له المصيبه
وانكشف
الله يستر علينا وعلى جميع المسلمين ترا موب الواحد يغازل يقوول ما بنكشف لازم اييه يووم وينكشف وهاي قصص حبيت اقولها للاعضاء ان شاء الله تستفيدون منها
تحياتي لكم
لكن اتخيلوا لو العكس؟؟؟ السالفة فيها ذبح أبدي للزوجة
لكن الحرمة فقيرة تسامح !!
و سبحان الله آخرتهم لازم ينكشفون ،،،
شاكر لكم تواصلكم اخواني وجزاكم الله خير
السلام عليكم ورحمة الله وبركاته,
قال رسول الله صلى الله عليه وسلم:
1-“تنكح المرأة لأربع، لحسبها ولجمالها ولمالها ولدينها، فاظفر بذات الدين تربت يداك“
2-“الدنيا متاع، وخير متاعها المرأة الصالحة”
3-“من رزقه الله امرأة صالحه، فقد أعانه على شطر دينه ـ نصف دينه ـ فليتق الله في الشطر الباقي”
لو طبق ماسبق على اختيار الشريك سواءا للمرأة او الرجل بالتأكيد سنتجنب جميع المشاكل والامراض الاجتماعية التي ملئت مجنمعاتنا.
الله يهديهم
لكن كل انسان يغازل لازم بينرد له في بيته
بس يخلي هالشي في باله
لا اقصد مرات مب دائما يكون اريح لها تيلس عند اهلها بكرامتها و لا ايي واحد يجرحها و يعذبها و يكرها في عيشتها واييب لها الاعصاب……….انا قلت هالكلام لاني تذكرت سالفة صارت لوحدة متزوجة زوجها كان يخونها مع وحدة متزوجة (انت متخيل السالفة) و اللي صار ان مرة الزوج دخل البيت و في ايده اكل (من الحرمة اللي كان يكلمها) و تخيل كانت مسويه فيه عمل (سحر) و زوجته كلت من هالاكل! وتمت سنة كاملة و هي تعبانة وايد و يالها اعصاب و حالة نفسية و تمنت وقتها انها ما تزوجت و شافت الطلاق اريح لها من هالعيشة…. و ترى الخيانة مب مسالة هينة لان احيانا ممكن تجلب للزوجة امراض من الزوج الخائن
يمكن معظم الخيانات من شباب تزوجوا صغار و اللي ترا شاف وايد بنات في حياته انا اشوف انه صعب تكفيه حرمة وحدة و يمكن ما يشوفها هي احسن و افضل النساء في عينه بعكس اللي ما شاف و لا عرف قبل الزواج …………
اذا المراة تقدر تغير من زوجها فلتحاول او انها تصبر عليه و اجرها على الله وما تهدم حياتها و تدعي له عسى الله يهديه وتلح في الدعاء
انا اتابع برنامج فوزية الدريع و اشوف اغلب المتزوجات اللي يتصلون يشكون من خيانة الازواج!!!!
و الاحظ ان الاغلبية العظمى من اللي يتصلون و عندهم مشاكل هم النساء!!!
ما اقول غير الله يهدي كل الازواج اللي يغازلون
والطامة الكبرى الحين ان في زوجات خائنات!!!