يا اخواني حبيت اتكلم عن موضوع وايد مهم ويهم كل واحد يعشق
البحر وهو المحافظه على البيئه البحريه والحياه السمكيه في بحرنا
ومثل ما الكل عارف وشايف ومعاني من قلة السمك والصيد فلابد انه
تكون هناك اسباب ادت الى قلة السمك.في السابق الواحد يدش البحر
بدون محدق معين ويسمر في البحر وماشاالله الخير وايد اما الحينه
تحوص في البحر ومن محدق لين محدق ومن مشد لين مشد ثاني
عشان تقدر تيب حلا بيتك والجماعه الي وياك في الطراد ويدوبك يسد
الكل وساعات ما يسد .محد فكر ليش قلة ثروتنا السمكيه.وعقب كم
سنه بنلقى في بحرنا سمك ولا ما بنلقى.
طبعا الاسباب وايده ومنها على سبيل المثال :
1-تحويل الخليج الى مكب لنفايات البواخر وماي وزيت التبريد.
2-التمارين العسكريه الي تقوم في الخليج والذخائر ال تحتوي على
مواد سامه وتستخدم في هذي التمارين.
3-الصيد الجائر او الصيد بلا وعي.
واسباب كثيره طبعا غيرها بس حبيت اركز على الصيد الجائر لانه
الاسباب الاولى ما نقدر نغير فيها شي.
يا شباب البحر فيه نعمه ونحنا لازم نحافظ على هذه النعمه والصيد
الجائر المقصود فيه الالياخ والهياله.انا طبعا ما احارب السماكه في رزقها
بس يوم من الايام حصلتلي هذي القصه وانتو احكمو عليها.رحت يوم
من الايام لسوق السمك في دبا البيعه في عمان العصر عشان الحق
على المزاد ويوم وصلت السوق شفت منظر اول مره في حياتي
اشوفه.جبال من الصدى والتبان على الرصيف بالالاف.وقفت مندهش
من المنظر وحصلت واحد واقف وسالته المزاد
خلص ورد عليه ماشي مزاد تبى تشيل الوحده بدرهم ونص تخيلو
التبانه بدرهم ونص وكاسرته بعد واتفقت وياه اخذعنه 50 وحده 60
درهم ولكن للاسف مالقيت ثلاجات في المحلات لانه الناس خلصتها
وما خذت السمك.وفي الليل رحت المجلس عند الشباب وخبريتهم
بالقصه وما صدقو وشدو الرحال ثاني يوم على دبا ومودين وياهم اربع
ثلاجات كل وحده تشل ابقره وتريو من 4-7 المغرب ويت كل الطرادات
واللنشات وما غير واحد فيه 6 حبات تبان صغار ويبى الحبه الوحده 60
درهم تخيلو اليوم الي قبله بدرهم وربع والي عقبه 60 والبركه طبعا
في صاحبنا الي خم البحر ونظفه من السمك.الحكم الكم ياخواني
هذي مب جريمه في حق البيئه البحريه. وانتظر منكم المشاركه
والاراء.والسموحه على التطويل.
مشكور على طرح الموضوع اخوي
ماقول غير ………….
الله يرحمنا برحمته .
الحمدلله قدرت احصل صورة السمك الي صايدينه في راس الخيمه هذي صدق جريمه ما ينسكت عنها
مرحبا اخواني البالول وحلو ابوظبي
يزاكم الله خير على التفاعل والمشاركه.لا حياة لمن تنادي وعقب ما يفوت الفوت بيمنعون علينا الصيد نهائيا.لكن قبل المصيبه محد يتخذ اي اجراء للوقايه من هذا الدمار في حق البيئه البحريه.والسموحه
فعلا الموضوع محتاج تدخل السلطات فيها
ومنع كل من يقوم بالصيد الجائر
مشكور اخوي صلاح على الطرح الحلوووو