الــــمــجاعـــات

********************

السلام عليكم ورحمة الله وبركاته

اليوم بتكلم عن شي يتجاهله أو تناساه الكثير منا ،، بتكلم عن أزمة خطيرة جدا تتزايد وتتفاقم يوم بعد يوم ،، وبهذه الأثناء نحن ننساها يوم بعد يوم ..

عندي سؤال لكم :

كم واحد فينا لما يروح الكافتريا أو المطعم ، بدل مايشتري ثلاث ساندويشات على قده ،، يروح يشتري خمس أو ست ،، وبالنهاية تلاقيه يرمي الفائض اللي اشتراه .. (أنا واحد منهم الله يهديني)

وكم واحد يروح يشتري أغراض من السوبرماركت أو كارفور ،، بدل ماياخذ له علبة عصير ،، يروح يشتري أربع أو خمس علب عصير ،،، وبالنهاية تلقى العصير انتهت صلاحيته ولم يشربه أحد ..

شوفوا أعراسنا وحفلاتنا وعزايمنا ،، شوفوا كمية الأكل والأطعمة اللي تترمي بالنهاية ،، أتحداكم أن كمية الأكل اللي يترمي أكبر عن كمية اللي ناكله ..

وياحظهم القطط زاد وزنهم من ورى تبذيرنا اللي ماله داعي ..

ياخي أنت بتسوي حفلة عرس أو عزيمة ،، ياخي اطلب أكل على قد كمية الحضور ،،، موب تطلب أكل يكفي ألف شخص وبالنهاية ربعك وأقاربك مايتعدون المئة ..

لاتحاتي وتقول الناس بتقول عنك بخيل ،،، هل يهمك رضى الناس وله رضى الله ؟؟؟

الله سبحانه مايرضى بالمبذريين واللي يرمون بيزاتهم على أكلات وحفلات كلها مصيرها للمهملات ..

فقال تعالى: ﴿وَلا تُسْرِفُوا إِنَّهُ لا يُحِبُّ الْمُسْرِفِينَ﴾

الحين وبعد هالكلام كله بقولكم هدفي اللي أبغي أوصل له …

هل حد فيكم جرب ودخل قرأ أخبار عن المجاعات ؟؟؟؟ وعن آخر الضحايا والوفيات من الأطفال والكبار والمرضى بأزمة المجاعة ؟؟؟

دول كثيرة تعاني من المجاعة والوفيات تتكاثر أكثر وأكثر

دول افريقية وجنوب افريقيا وهاييتي ودول آسيوية وحتى الهند وكوريا الشمالية

واللي يجعلنا نبكي أكثر هو لما نشوف دول عربية شقيقة تعاني المجاعات وأزمات نقص الطعام بسبب الحروب السياسية والإقليمية والحروب الأهلية والطائفية..

وفيه أسباب ثانية للمجاعات وهي أسباب طبيعية مثل الجفاف وارتفاع الحرارة وانعدام سقوط الأمطار ..

مهما اختلفت الأسباب ،، تبقى النتيجة واحدة ويجب المساهمة والمساعدة لتخفيف معاناة الشعوب التي تعاني المجاعة ..

أنت الحين رايح تطلب لك (طلبية من مطعم) ياخي بدل ماتطلب دبل العدد وبالنهاية ترمي نص الطلبية أو ماتقدر تكملها ،، خلك على طلبية وحدة فقط وبيزات الطعام الزيادة اللي بتطلبه تبرع فيهن لإنقاذ أطفال جوعى بإفريقيا أو بدول ثانية تحتاج لفتات الخبز ..

والله العظيم قلبك بيوجعك لما تدخل النت وتشوف صور وفيديو شعوب تعاني مجاعات وتاكل فتات الخبز من على الأرض وبين التراب ..

وفيديو ثاني يظهر أطفال ياكلون النمل والحشرات بسبب جوعهم ،،،

وقصة أم تقطع مسافة طويلة سيرا على الأقدام لتصل لنقطة توزيع الأغذية ،، وفي رحلتها يموت أحد أبناءها لأنه ماتحمل بعد المسافة وحرارة الجو ..

كل هذه مواقف حقيقية وليست خيال ..

لاتظنوا أن الإعلام ينقل لنا حقيقة المجاعة …. بل العكس الإعلام يظهر أنه فيه دول تتبرع لصالح الدول الأفريقية التي تعاني المجاعات .. فقط ،،، وماتظهر الاحصائية وعدد المرضى والموتى اللي صابتهم رياح الجوع والفقر والمرض ..

هل تعتبروا الإعلام المنتشر (هو إعلام حقيقي) ؟؟؟؟!!!

لاتجعلني أنفجر من الضحك إذا كان جوابك بنعم …

لأن الإعلام اللي ينشر صور زائفة وأخبار (ملعوب بها) ووقائع (منسقة ومعادة التصنيع)

والإعلام اللي هدفه وجهوده كلها لصالح (المغنية الفلانية) و (المغني الفلاني ) والراقصة بنت أبوها ،،

والإعلام اللي يهتم بالبرامج التلفزيونية والأغاني والفاحشة وغير ذلك

والغريب لما تشوف إعلام بعض الدول يهتم بأخبار الغرب أكثر عن أخباره المحلية ..

والغريب لما تشوف إعلام وتلفزيون دولة عربية إسلامية ، ولاتجد أي برامج دينية أو حتى وقفات الصلاة ورفع الأذان .. بل وحتى لا تجد في بعضها رفع خطبة الجمعة ..

فهل هذا تسمونه إعــــــــــــــلام ؟؟؟؟؟؟

وهل ننتظر (بعض) الإعلام الفاشل ينقل لنا أخبار المجاعات وأخبار حال الشعوب المحتاجة ؟؟؟؟؟؟؟

يا إخواني ويا إخوتي الأعزاء

أنا ماكنت منتبه لموضوع المجاعة ،، وأنا هداني الله كنت من المبذريين بالطعام والشراب ..

لكن بعدما شفت بنفسي أخبار الفقر والمجاعات ببعض الدول ،،، يشهد الله اقشعر بدني من الصور والأخبار

وهذا اللي أبغي أوصله لكم

ادخلوا بنفسكم وابحثوا عن أخبار المجاعات

اكتبوا بالعربي مــــجاعة

أو بالانجليزي

Famine

وادخلوا هالموقع اللي يتكلم عن المجاعات وفيه محاضرات حقيقية عن المجاعات ورياح الفقر

Direct Aid | ط¬ظ…ط¹ظٹط© ط§ظ„ط¹ظˆظ† ط§ظ„ظ…ط¨ط§ط´ط±

عندي الكثير لأكتبه لكم

لكني بكتفي بهالسطور اللي كتبتها

والسموحة عالإطالة والسموحة عالأخطاء إن وجدت .

والسلام عليكم ورحمة الله وبركاته