السلام عليكم و رحمة الله و بركاته
للأسف هذه مب المرة الأولى اللي أنزل فيها موضوع أطلب فيه المساعدة ، و كل مرة أنزل فيها موضوع ينتهي بالحذف و بدون ما يكون في أي مساعدة ، و الله العظيم يا إخواني لو مب الوضع خاااانق جدا و خطير و لو ما كانت كل الأبواب مسكرة جدامنا ما كنت طلبت المساعدة من المنتدى ، بس و الله العظيم يا اخواني اننا ما خلينا شيء ما سويناه على مدى سنين طويلة و سبحان الله تطالع يمين تطالع يسار كأنك بروحك في هالدنيا كأنك في صحراء قاحلة و تصارخ و تصارخ و ما تسمع غير صدى صوتك ، ضياع في ضياع ضياع و معاناة في معاناة في معاناة و الله المستعان و لا حول و لا قوة إلا بالله العلي العظيم ……….
و هذا هو موضوعنا :
ظروفنا وايد صعبة ، و الله العظيم هاي معاناة سنين طويلة و الوضع صار خانق جدا و لا يحتمل ، نحن علينا ديون كثيرة ما يعلم فيها إلا رب العالمين ، ديون ع البنك و ديون ثانية ، و الدين الأكبر هو دين البنك و حقه 98 ألف درهم ، و سبب هاي الديون مرابحات أخذناها من بنك دبي الإسلامي عشان نقدر نوفي مصاريف الدراسة الجامعية بسبب ارتفاع الأسعار في ذاك الوقت (أيام كنت في جامعة عجمان و حاليا أدرس في كلية الخوارزمي بأبوظبي) ، و بسبب الرفع المستمر للأسعار من جامعة عجمان اضطريت أترك الجامعة بعد 4 سنوات دراسة وياهم ضاعت هباء منثورا و هذا طبعا غير مصاريف السكن الجامعي العالية في هذاك الوقت و تسديد ديون قديمة عندنا و دفع ايجار بيت و مدارس و غيرها من المصاريف في ظل ظروفنا الصعبة لين ما وصلت قيمة المرابحات في البنك 98 ألف درهم مثل ما ذكرت ، و المشكلة الكبيرة إنه علينا أشياء عاجلة مفروض نسددها و إلا راح تستوي لنا مشاكل (و هذه طبعا ديون و مشاكل ثانية غير الدين الأساسي مال البنك) ، علينا مبلغ مفروض نسدده أول الشهر حق إيجار السكن و الإيجار عبارة عن دفعات تندفع كل فترة على شكل شيكات و لو ما سددنا المبلغ في الوقت المحدد راح تستوي مشاكل مع المالك و ممكن يطردنا ، و هذا غير السوبرماركت اللي نتعامل وياه طالبنا بمبلغ كبير لأننا ما دفعنا له شيء من شهور طويلة بسبب ظروفنا الصعبة جدا ، و إذا ما سددنا له المبلغ راح يشتكي علينا و يسويلنا مشاكل ، و هذا غير أني طالب و أدرس في الخوارزمي حاليا في أبوظبي و أهلي من سكان أم القيوين ، و حاليا قاعد مع أقاربي و كانت مستورة و لكن للأسف الشديد فنشوا الريال و الحين هم معزمين يسافرون البلاد في نهاية هالشهر و بالتالي راح أواجه مشكلة كبيرة جدا من ناحية السكن لأنهم الوحيدين اللي ممكن أسكن وياهم و ما أعرف حد هني ممكن أسكن وياه ، و عشان جي لازم أدور ع سكن و الايجارات غالية جدا في أبوظبي و مع ظروفنا الصعبة هذه الله أعلم شو ممكن يستوي ، و في هالحالة راح أكون خسرت هالسمستر عقب ما دفعنا له لأني راح أضطر أوقف الدراسة و هالشيء مب في صالحي أبدا لو ما حصلت حل عاجل كدعم مالي مثلا ، مع العلم أني متأخر في الدراسة أكثر عن 3 سنوات تقريبا ، يعني مفروض أكون متخرج من زمان لكن الظروف القاسية هي اللي منعتني
الغرض من تنزيلي للموضوع هالمرة هو المساعدة العاجلة في مشكلة إيجار البيت ، و اللي أشرت عليها باللون الأحمر من خلال الموضوع ، لأن الوقت ضاق جدا جدا و المبلغ عبارة عن شيك علينا و لو ما اندفع في وقته انتوا تعرفون العواقب يا اخواني في الله و هذا مصير عائلة بننطرد و بنتمشكل و هذا ما يرضيكم يا اخواني الغاليين اننا نوصل لمرحلة التشرد و السجون ، و الله يا اخواننا ما عندنا في هالدنيا غير الله و انتم ، بارك الله فيكم و جعل ما تقدمون من عمل الخير سببا في سعادتكم في الدنيا و الآخرة ….
المبلغ العاجل اللي محتاجينه 5000 درهم
الرجـــــــــــــاء المســـــــــــاعد العاجلـــــــــــة
و استغفر الله العظيم
آمين يا رب العالمين
يا جماعة و الله ما أبغي شيء غير واسطة ندخل فيها أوراقنا لأهل الخير من الشيوخ الله يطول بأعمارهم أو رجال الأعمـــال المعروفين الله يخليكم اللي عنده مثل هالواسطة أتمنى يساعدنا في هالموضوع رجـــــاء ، و الله العظيم طول هالفترة اللي مارديت فيها على هالموضوع (تقريبا شهر) و نحن قاعدين نحاول و نحاول مع الهيئات و المؤسسات ما خلينا شيء قنوات إذاعات ما خلينا شيء و كل شيء مسكر بوجوهنا سبحان الله و لا حول و لا قوة إلا بالله ………..
الله يسهل عليكم ويسر اموركم
أخوي .. الله يهديك وييسر أمورك ..
بس اذا انت تمر بأزمة مالية تقدر تسير الجمعيات الخيرية أو اهل الخير أو الشيوخ بدون واسطة ولا في داعي تطلب من حد يوصل كلامك أو رسالتك أو معاناتك لهم .. الحمدلله هم معروفين وكثاااار في البلد واانشد عنهم والكل بيدلك عليهم ..
بعدين بالبداية حطيت مشكلة عويصة وعقب طلبت مبلغ بسيط .. واشوي جالس تكبر في المبلغ لييييييييييييييش؟؟
ومثل ماقال الاخوان .. تعلم تسوي شغلة تنفعك أحسن من انك تطلب من الناس كأنها شحاااته >> اسمحلي ع هالكلمة ..
واللي يبي الرزق والخير بيقدر يوصل يبيع في اليوم حبة بيض ..
أنا اشوف الافضل تدعي .. وتتوكل ع ربك .. ومافي داعي للشعارات والنداءات ومعرف شووو من كلام ثاني ..
و ما زالت المشاكل في تفاقم مستمر و ما شيء حل للحين
نداء لأهل الخير اللي عندهم واسطة عند أهل الخير من الشيوخ الله يطول بأعمارهم أو رجال الأعمال الخيرين
يا جماعة بس نبي واحد يوصل لهم الموضوع و أنا متأكد مليار بالمية أنها بتنحل في يوم و ليلة بإذن الله – تعالى –
ما أعتقد ان الموضوع صعب جدا لهالدرجة يعني سنين طويلة بدون حل الله يخليكم
ما تتصورون إيش قايل راح تكسبون فينا أجر و ثواب بهالمساعدة لأنكم باختصار راح تعطونا فرصة في هالحياة من جديد
و الوضع الحالي اللي نحن فيه حاليا حدث و لا حرج
شكرا للجميع و استغفر الله العظيم
الله يهديك اخويه وييسرلك اموركم
اخويه مب زين السؤال اكثر عن مره خلاص يا خويه موضوعك واضح للجميع
وان شاء الله بتلاقي اللي يساعدك على رسايلك الخاصه
وممكن تروح لاي جمعية خيريه وان شاء الله بتتيسر الامور
وبعدين حطو ايدكم في ايد بعض لو تسووون اشياء بسيطه ادخل عليكم واتسدون ديونكم
مثل بيع اي شيء اكلات ، بهارات ، الاشياء اللي تسويها ربات البيوت
وانته يا خويه ممكن تشوف حد واتخلصله معامله والا تبيعله سياره وبتاخذ المقسوم
لكن ان تميت على السؤال في المنتدى عمر الظروف ما بتنحل
ادعي الله وكثر الاستغفار