شخباركم عساكم بخير..
عشان ما اطول عليكم
ابغي اسوي بزنس صغير.. محل ميني سندويتشات وميني كيك.. بس مب اي كلام يعني من الزين ووصفات فرنسيه وبييب شيف
المحل ما بيكون فيه يلسه بيعتمد اغلب شي على الطلبات الخارجيه والتوصيل
انا تقريبا محصله الشيف ومساعده
بس طالبتنكم لا تردوني واللي عنده خبره لا يبخل علي دخيلكم
اسألتي:
أولا: كم بيكون راتب الشيف مع العلم بانه من جنسيه عربيه ومتخرج من جامعه فندقه وسياحه (لاني مابي شغل هنود)
ثانيا: حد عنده فكره عن الاجهزه كم تكلف
وهل احتاج الافران الاتوماتيكيه لانها وااايد غاليه
شو بالضبط اللي بحتاجه؟ عجانه وفرن بس؟؟ (بغظ النظر عن الاجهزه الصغيره)
هل في سستم او شي اسويه عشان كل الطلبيات تتسجل والعاملين ما يسرقوني او ينفذون طلبات من وراي (لاني طبعا ما بقدر ادز بويهي ويا الراييل في المل طول اليوم لوووول 
شاااكره تعاونكم واللي يرد واللي ما بيرد لكم مني دعوات بالخير والرزق الوفير والتيسير اللهم امين
بالتوفيق ان شاء الله
مرحبا اختي
فكرج جدا حلوه وخاصة ان البنات والحريم يحبون هاي النوعيه من المشاريع
انا عندي دراسة جدوى مبدئيه لهاي النوعيه من المشاريع
خذي المفيد منه والافكار اللي تحتاجينها والباقي خليه
لكن مشروعج على كلامج مش صغير لهذا الحد يمكن يكون المحل مساحته صغيره اما الشغل لازم يكون ممتاز
لان انتي بتدخلين منافسه فالسوق لمثل هاي المشاريع
وهاي الدراسه شوفيها وخذي المفيد منها
وبالتوفيق ان شاءالله
مشروع الحلويات والبسكويت
وصف المشروع:
المشروع عبارة عن معمل صغير يقع ضمن المنزل ( مطبخ إضافي) ، ويختص يصناعة البسكويتات ، والكيك ، والبيتي فور ، وجميع أنواع المعجنات الخفيفه.
على أن تتم جميع مراحل التصنيع داخل هذا المعمل من الخطوة الأولى الى نهاية العمليه والتي تنتهي بالتغليف والتعبئه.
ماذا يحتاج المشروع ؟
– فرن كهربائي خاص ( فرن الصامولي) إيطالي وتكلفته 65000 درهم
– عدد 3 طاوله خاصه بالفرن زتحمل عدد 18 صينيه 3*1500=4500 درهم
– عدد 54 صينيه خاصه بالطاولات 54*70= 3780 درهم
– مكينة عجن ( عجانه ) ذات ( قدرين) السعر التقريبي 5000 درهم
– مجموعة صواني وأدوات وقوالب ومضارب السعر التقريب 3000 درهم
– عدد 2طاولات دورين استانلسستيل للتجهيز 2*1500= 3000
– مكينة تغليف ( شرنك) 14000 درهم
– أفلام تغليف 2000 درهم
– علب كرتون مختلفة المقاسات مطبوعه أو ساده حسب الرغبه مثلاً: (17*20*10) (17*20*8) (20*20*8) (20*20*10) (22*22*10) (25*25*10) (25*25*8) (30*30*10) وسعرها التقريبي في حدود 80 هلله للعلبه الواحده كمتوسط سعري وعلى افتراض أننا نحتاج الى 5000 علبه منوعة المقاسات 4000 درهم
– سياره فان صغير بلأقساط الشهريه قيمة كل قسط 1500
– مواد أوليه وخامات 10000 درهم
– دعايه وإعلان 5000 درهم
العنصر البشري
– يعتمد هذا المشروع اساسا على صاحبة المشروع أي أنها عنصر أساسي فيه ، وهي من تقوم بالعمل الرئيسي
– عاملتان ( ممكن الاستعانه بعمالة البيت المنزليه وخاصة من عندها خبره أو يمكن الإعتماد عليها ) راتب شهرين بمعدل 2*1000= 2000 درهم
– سائق راتب شهرين 1200*2=2400 درهم
إجمالي التكاليف التقريبيه للمشروع ( تكاليف ثابته)
120780درهم ( +أو –) 5%
التكاليف المتغيره للمشروع
الرواتب 4400 على إفتراض تأمين راتب شهرين ( وذلك حتى يتحقق الدخل)
كيف سيعمل المشروع
– ستتم عملية التسويق الأولى من خلال الأهل ، الأصدقاء ، الأقارب ، الزميلات
– يتم توزيع بروشور دعائي على منطقة المشروع
– يتم عمل بروشور خاص للفنادق ، شركات ومؤسسات ومتعهدي التغذيه ، المطاعم ، صالات الأفراح والمناسبات ، محلات الكفي شوب وفي مرحلة متقدمه يمكن مخاطبة المدارس ومتعهدي المقاصف المدرسيه .
نسبة الربح المتوقعه 45% حسب الأسعار السائده في السوق ( الحد الأدنى للربح)
طبعا في بعض الاشياء تقدرين تستغنين عنها فالبدايه
بالتوفيق أن شاءالله
وين مكان المحل بيكون ؟؟ اذا في دبي عندي لج المكان المناسب ؟؟
للتواصل : 0507856969
مرحبااا اختي ..
بالنسبة للمشروع فكرته حلوة وجميلة ولطيفة .. ولكنه مب صغير وااايد مثل ما تظنين ..
ويبالج أقل شي تسوين دراسة جدوى .. واذا ما تعرفين لها في ناس متخصصة تفهم .. أو على الأقل جيبي ورقة وقلم وشوفي شو احتياجاتج غير المحل والشيف والمساعد .. لإن مثل ما قال اخوي مدرار .. يبي لج كذا عامل ..
وعقب ما تحسبين اللي اشار عليه الاخ .. شوفي احتياجات المطبخ نفسه .. من أفران ومكائن وعجانات .. ولا تنسين هالمشروع فيه تفاصيل صغيرة لكنها مهمة .. منها أدوات التزيين وادوات الكيك وادوات المعجنات وعدد الصواني وأشكالهم والكراتين بعد…الخ
ولازم تحددين شوو احتياجاتج الاخرى او المواد المستعملة في كل شي سواء كيك او معجنات وتحاولين تلاقين الناس اللي ممكن تورد لج بعض الشغلات بأسعار مناسبة ..
ولازم يكون عندج خيال وذوق في عرض السلعة .. يعني ابتكري اشكال معينة للفطاير والكيك وتكون مثل الثيم أو طابع لج وللمحل، هذا غير دفتر الفواتير والديكور وماكينة الحساب .. وادوات النظافة بعد .. إضافة للشعار الخاص بالمحل والمشروع ..
وممكن تركبين كاميرات في المحل حتى لو وهمية بس عشان العمال ماياخذون راحتهم..
و ع فكره ترى الكيك بروحه مشروع والفطاير بعد .. يعني كل واحد يبي له دراسة جدوى او حساب مختلف عن الثاني لإن حتى المواد المستعملة لكل واحد تفرق عن الثاني سواء في المكونات او التجهيزات او الاعدادات ..
عموما انتي احسبيها صح .. وممكن تراجعين صندوق خليفة او مؤسسة محمد بن راشد لدعم مشاريع الشباب .. وعسى ربي يوفقج يا الغلا ^^
بالتوفيق اختي .. بس طبعا حتى لو بيزنس صغير بيكلف وانا مابا احبطج من االبدايه بس ها الواقع
يعني فكرتي مثلا المحل وين بيكون وكم ايجاره؟
ثانيا الديكور والرخصة واللوحه؟وموافقة البلدية وجهاز ابوظبي للرقابة الغذائية وعقب فتح بطاقة منشأة الجوازات ووزارة العمل.
ثالثا : تقريبا الشيف العربي خبره مابين الـ2500 إلى 4000 راتبه لأنه محل صغير بيكون مب مطعم ولافندق
ومساعده حوالي 2000 إلى 3000 (والله أعلم)
والمكائين حسب عاد اللي انتي انتي تسوينه شو بالضبط ؟ يعني انتي والشيف نفسه تعرفون شو المطلوب
وغير هذا يبالج واحد ع الكاشير يشتغل ويسجل الطلبات ويستقبل التيلفونات وواحد سائق ووياه دراجه او سياره صغيره للتوصيل يعني مب بس شيف ومساعده وبس ^_^
واكيد يبالج سستم او ماكينه حفظ النقود اللي تطلع فواتير يعني هالمكاينه ماتفتح إلا إذا حد سحب منها او يبا يحط فيها فلوس عشان تعرفين كم الداخل وكم الخارج ، ها كل اللي اعرفه حاليا وحضر ببالي ^_^ والله يوفقج ان شاء الله