بسم الله الرحمن الرحيم
السلام عليكم ورحمة الله وبركاته..
اعزائي اعضاء هذا المنتدى الطيب..
لو سمحتوا يامراقبين الموقع لاتحذفون موضوعي لأني احس اني انسان مظلوم والشكوى لغير الله مذله..ولو تشوفون في موضوعي اي غلط احذفوا الموضوع وانا مب زعلان..
انا واحد من الي انقص عليهم وحجزوا الـ FJ طبعاً هدفي من إنشاء هذا الموضوع اني احصي الحالات الي صار معاها هل شي..
اول شي انا حاجز سيارة FJ اللون ابيض من تاريخ 8/3/2008 في بوظبي والبايع الي حجزت عنده قالي نحن نعطيك فتره طويله ونقولك 3 اشهر لين ماتوصل السياره لين هني وانا صدقته وقالي انها مابتاخذ اكثر عن شهرين وان كثرت كثير شهرين بالضبط المهم بنقول انهم عادلين بالموضوع ولكن للأسف بعد بحث وتعميق وحفر الخ الخ..اول شي قبل ما اقول اي شي بالبركه على اخوي وربيعي وولد عمي وربيع ولد عمي الي حجزوا بعدي السياره بشهر وحصلوها بفترة شهر ونص تقريباً ويعطيهم خيرها ويكفيهم شرها يارب..اخوي ياجماعة الخير فاجأني بإتصاله يقولي حمدان سيارتي وصلت وبروح استلمها قلتلها كيف ياخوي اكيد انا معاك وصلت بس نسوا يتصلوا بي وبالفعل رحت ويا بو نهيان واستلم سيارته وانا تفاجئت يوم اسأل عن حجزي يقولولي والله انته في قائمة الإنتظار وما ندري متى سيارتك توصل شهر شهرين المهم..
الشباب حجزوا سياراتهم وبنفس اللون بس لون واحد يختلف وهو اللون الرصاصي اما الباقي ابيض..
سرت عند المدير الي موجود في الفرع وماراح اذكر اسم الريال الي حجزت عنده والمدير عشان ماتقولون ممنوع وتشويه لسمعتهم بس انا ريال مظلوم دخلت عند الريال مدير المبيعات قبل شهر بالضبط طبعاً اسلوب المدير يدل على انه انسان غير لبق في الكلام مشيناها له هل مره واتعوذنا من ابليس قالي قبل نهاية 5 تعال عندي وفالك طيب..سرت عند الريال اليوم والله ياجماعة الخير و الله على ما اقول شهيد اني من دخلت عنده حتى السلام يرده بدون نفس يمأ يمأ براسه (فقط) ياخوي انا حاجز السياره الفلانيه .. بكل برود اعصاب والله ماعندنا سيارات ومافي اخبار عن استوك ياي لبعد 15 – 30 يوم يعني انتظر لين شهر7 – 8 البائع يقولي ان في دفعه بتوصل في بداية شهر 6 تناقض في الكلام المهم طرشني عند البايع والبايع ردني عليه وقلتله البايع ردني عليك وعطني حل دوختوني انا بشتري ببيزاتي ليه انذل يقولي وش اسويلك يعني انا مالي خص في الحجز ولا اتدخل في المواضيع هذي وروح خذ فلوسك ماشي سياير وبرايك منك للبايع عاد لو شفتوا الأسلوب الي يكلمني به تقول الريال يوزع سيارات من عنده ولا من ماله المهم خذتني الحميه وهزبته هزاب وغسلت شراعه وعلمته الأدب وللأسف يا اخواني في هذا الملتقى الطيب انا ما افتخر اني ارد عليه بهل اسلوب لأننا تعودنا نرد الإساءه بإحسان بس في ناس ماينفع معاها الا الصوت العالي والزعيق بس خذتني الحميه اكثر يوم شفته يعامل واحد من الشباب الي يالسين عنده بهل اسلوب يعني يقوله الريال قدامي اخوي ماخذ لكزس ومعطينه معاها شي المهم من اجزاء الحديد .. وانا ماعطيتوني مثله ليش رد عليه وقاله بنييبلك 2 طن حديد تخيلوا الرد الوقح وازيدكم من الشعر بيت بعد بحث للأسف على قولتهم ناس حاجزين من شهر 2 وللحين ماوصلت السياره ياجماعة الخير انا ابى اعرف هل هي لعبه من الوكيل نفسه بإحتفاظه بالسيارات لبيعها فيما بعد لرفع قيمة السياره اما شو السبب يعني لو قلنا لكزس استيشن بتلقونها متوفره بس يبالها *واو* وامورك مسلكه وماشيه
متى ببيي اليوم الي بينتهي فيه الإحتكار من قبل وكلاء السيارات ونلقى مليون الف وكيل للسيارات
ياجماعة للتنويه فقط السيارات الي خذوها الشباب ما كان حاجزنها حد وماخذها والدفعه الي يت فيها سيارة اخوي كنت انا فيها بس سيارتي (تفبركت)
نقطه نسيت اوضحها وحبيت اضيفها عن طريق التعديل يوم سألتهم عن سبب وصول سيارات الشباب قبلي قالولي والله يمكن حد حاجز السياره وماخذها والمشكله كل واحد منهم يسألهم قبل ما استلم السياره هل كان في حد حاجزنها ورفض ياخذها يقولولهم لا ونفس الشي يوم واجهت البايع والله سيارة ولد عمك وصلت في الدفعه من الباخره طبعاً هم حاجزين عند ريال غير عن الي حاجز عنده ماعطوني سبب ولا حاولوا يقنعوني حتى او يعطوني تبرير
ياجماعة الخير هذي دعوه مني لكل من تعرض لمثل موقفي اننا نقوم بشكوى جماعيه بإتصالنا بحماية المستهلك او وزارة الإقتصاد يوم الأحد لنقوم بتقديم شكوانا للجهه المعنيه بالأمر وإن شاء الله يتخذون الإجراءات المناسبه ضدهم
والسموحه على الإطاله
ياجماعة الخير شو الحل اتقولون قاطعوا الوكيل انزين شو بناخذ اذا الواحد هاوي 4×4 شو الحل..ياخي كل سياره ولها عيوبها بنروح للألماني التجييك الواحد مدري بكم انا ريال مجرب الألماني مرسدس رنج بي ام اودي الخ الخ..اسعار التجييك غاليه بس ماعاد تفرق الحين بين الألماني والياباني خلونا نقول ليش الرنج عندي جيكتها في برستيج بـ مايقارب 1500 كل 10 الالف كيلو الكامري اجيكها بـ مايقارب 500 كل 5 الاف كيلو ويطلعون لك روحك على خدمتهم التعبانه ويبالك بس نص ساعه لين مايبولك السياره من داخل بنيي على اخر تجييك جيكته للكامري 2007 بدلت سفايف السياره وكان تجييك 20 الف طلع علي 2170 درهم تخيلوا والله ليش السفايف بروحهن الأربع بـ 1000 درهم ومع الدسكونت طلع كله بـ 1600 تقريباً والإلماني ويوم بيخترب عليك شي فيه وخلص ضمان السياره بلوه وغير عن جيه سعر السيارات الالمانيه نازل نزول في السوق عكس الياباني المشكله الإحتكار وبس..لو كان شي اكثر عن وكيل بتلقى الأسعار متضاربه والعروض متفاوته والكميات بالهبل ويحبون ايدك ويه وقفا وخذ السياره وارحمهم من وقفتها في الكراجات عندهم بس المشكله الإحتكار والحايه صعبه والطلب على الياباني اكثر من المعروض وهذا سبب الأزمه الحاليه
صارلي نفس الموقف ويا فرع دبي..كنت حاجز FJ ابيض قالولي عقب شهر وانتظرت اكثر من المده..
اجريت اتصالاتي وفي خلال اسبوع طلعتها من فرع الشارجه.
الموضوع كله وااااسطاااات…وانتهى الكلام.
اخوي العيناوي الاول
والله ان كلامك ذهب ،وانا معاك في رايك
اخوي لين الحينه بعدك تفكر انك تاخذ من عندهم
الله المستعان
خذ من البريمي احسنلك..