بسم الله الرحمن الرحيم
السلام عليكم ورحمة الله وبركاته..
اعزائي اعضاء هذا المنتدى الطيب..
لو سمحتوا يامراقبين الموقع لاتحذفون موضوعي لأني احس اني انسان مظلوم والشكوى لغير الله مذله..ولو تشوفون في موضوعي اي غلط احذفوا الموضوع وانا مب زعلان..
انا واحد من الي انقص عليهم وحجزوا الـ FJ طبعاً هدفي من إنشاء هذا الموضوع اني احصي الحالات الي صار معاها هل شي..
اول شي انا حاجز سيارة FJ اللون ابيض من تاريخ 8/3/2008 في بوظبي والبايع الي حجزت عنده قالي نحن نعطيك فتره طويله ونقولك 3 اشهر لين ماتوصل السياره لين هني وانا صدقته وقالي انها مابتاخذ اكثر عن شهرين وان كثرت كثير شهرين بالضبط المهم بنقول انهم عادلين بالموضوع ولكن للأسف بعد بحث وتعميق وحفر الخ الخ..اول شي قبل ما اقول اي شي بالبركه على اخوي وربيعي وولد عمي وربيع ولد عمي الي حجزوا بعدي السياره بشهر وحصلوها بفترة شهر ونص تقريباً ويعطيهم خيرها ويكفيهم شرها يارب..اخوي ياجماعة الخير فاجأني بإتصاله يقولي حمدان سيارتي وصلت وبروح استلمها قلتلها كيف ياخوي اكيد انا معاك وصلت بس نسوا يتصلوا بي وبالفعل رحت ويا بو نهيان واستلم سيارته وانا تفاجئت يوم اسأل عن حجزي يقولولي والله انته في قائمة الإنتظار وما ندري متى سيارتك توصل شهر شهرين المهم..
الشباب حجزوا سياراتهم وبنفس اللون بس لون واحد يختلف وهو اللون الرصاصي اما الباقي ابيض..
سرت عند المدير الي موجود في الفرع وماراح اذكر اسم الريال الي حجزت عنده والمدير عشان ماتقولون ممنوع وتشويه لسمعتهم بس انا ريال مظلوم دخلت عند الريال مدير المبيعات قبل شهر بالضبط طبعاً اسلوب المدير يدل على انه انسان غير لبق في الكلام مشيناها له هل مره واتعوذنا من ابليس قالي قبل نهاية 5 تعال عندي وفالك طيب..سرت عند الريال اليوم والله ياجماعة الخير و الله على ما اقول شهيد اني من دخلت عنده حتى السلام يرده بدون نفس يمأ يمأ براسه (فقط) ياخوي انا حاجز السياره الفلانيه .. بكل برود اعصاب والله ماعندنا سيارات ومافي اخبار عن استوك ياي لبعد 15 – 30 يوم يعني انتظر لين شهر7 – 8 البائع يقولي ان في دفعه بتوصل في بداية شهر 6 تناقض في الكلام المهم طرشني عند البايع والبايع ردني عليه وقلتله البايع ردني عليك وعطني حل دوختوني انا بشتري ببيزاتي ليه انذل يقولي وش اسويلك يعني انا مالي خص في الحجز ولا اتدخل في المواضيع هذي وروح خذ فلوسك ماشي سياير وبرايك منك للبايع عاد لو شفتوا الأسلوب الي يكلمني به تقول الريال يوزع سيارات من عنده ولا من ماله المهم خذتني الحميه وهزبته هزاب وغسلت شراعه وعلمته الأدب وللأسف يا اخواني في هذا الملتقى الطيب انا ما افتخر اني ارد عليه بهل اسلوب لأننا تعودنا نرد الإساءه بإحسان بس في ناس ماينفع معاها الا الصوت العالي والزعيق بس خذتني الحميه اكثر يوم شفته يعامل واحد من الشباب الي يالسين عنده بهل اسلوب يعني يقوله الريال قدامي اخوي ماخذ لكزس ومعطينه معاها شي المهم من اجزاء الحديد .. وانا ماعطيتوني مثله ليش رد عليه وقاله بنييبلك 2 طن حديد تخيلوا الرد الوقح وازيدكم من الشعر بيت بعد بحث للأسف على قولتهم ناس حاجزين من شهر 2 وللحين ماوصلت السياره ياجماعة الخير انا ابى اعرف هل هي لعبه من الوكيل نفسه بإحتفاظه بالسيارات لبيعها فيما بعد لرفع قيمة السياره اما شو السبب يعني لو قلنا لكزس استيشن بتلقونها متوفره بس يبالها *واو* وامورك مسلكه وماشيه
متى ببيي اليوم الي بينتهي فيه الإحتكار من قبل وكلاء السيارات ونلقى مليون الف وكيل للسيارات
ياجماعة للتنويه فقط السيارات الي خذوها الشباب ما كان حاجزنها حد وماخذها والدفعه الي يت فيها سيارة اخوي كنت انا فيها بس سيارتي (تفبركت)
نقطه نسيت اوضحها وحبيت اضيفها عن طريق التعديل يوم سألتهم عن سبب وصول سيارات الشباب قبلي قالولي والله يمكن حد حاجز السياره وماخذها والمشكله كل واحد منهم يسألهم قبل ما استلم السياره هل كان في حد حاجزنها ورفض ياخذها يقولولهم لا ونفس الشي يوم واجهت البايع والله سيارة ولد عمك وصلت في الدفعه من الباخره طبعاً هم حاجزين عند ريال غير عن الي حاجز عنده ماعطوني سبب ولا حاولوا يقنعوني حتى او يعطوني تبرير
ياجماعة الخير هذي دعوه مني لكل من تعرض لمثل موقفي اننا نقوم بشكوى جماعيه بإتصالنا بحماية المستهلك او وزارة الإقتصاد يوم الأحد لنقوم بتقديم شكوانا للجهه المعنيه بالأمر وإن شاء الله يتخذون الإجراءات المناسبه ضدهم
والسموحه على الإطاله
هالكلام الطيب..
أؤيد رأيــــــــــــــــــــــــــك ومشاركتـــــــــــــــــك
السموحة من جميع اخواني بالمنتدى
دوم انه كــــــــــــــــلام من غير فعل
فماشي اي فايدة الاسعار بتزيد والغطرسة بتكبر
نصيحة :
قاطعوه هو وامثاله
انتقل للبديل ( مثل بهوان )
وان شاءالله راح تكون في نتائج
بس اهم شي العــــــــــــــزم
والله انك انته اللي فيهم ,, انا معاك وأأيد كلامك والله كل واحد سار واشترى السياره اللي خاطره اللي يبيها وبأي سعر ,, لازم التجار بيطمعون ,, الصراحه السموحه من اللي يكون محتاي السياره ويباها للحاجه الضروريه انا اقول عن البطران اللي ما يهمه شي ,,
والله يعينا عايشين فبلادنا والكل قام يصرقنا ..
Ad.boss
هلا اخوي
انا حاجز في نفس الوقت تقريبا في نص شهر ثلاثه
و اخر مره سرت لهم
قالو .. شهر 6 او 8
المهم كنسلت سالفه الاف جي … اذا بستلمها شهر 7 و خلال شهرين بتنزل موديل 2009 شو الفايده
حبيت تكون لي سياره… بدون ما ادخل واسطه او ارمس فلان ..
مع انه الواسطات جاهزه
بس الي احب اقوله
وهاي نصيحه للكل
الي عنده واسطه … او يقردن.. مدير المبيعات مني مناك عشان يحصل سيارته في اسرع وقت
ترا هذا المدير بيسحب السياره من شخص ..يايه السياره من حقه و حاط فيها اماله و يمكن اتكون سياره احلامه…. انته بواسطتك سحبت سياره من شخص ماله ذنب …
اتي انته بكل بروده تسحبه عنه… عن طريق الواسطه و تقردين
شو الفايده الواحد بياخذ سياره موب له … بتكون عليه نقمه موب نعمه … على السياره وراعيها
ولا تسال عن بركه السياره اذا انته في الاساس
اذا السياره موب حقك………
الله يحفظكم ان شاء الله من اخطار الطريق…
و الله يبارك في حلالكم ان شاء الله
واسف على المداخله…
تحياتي لكم
يا جماعة الخير، اللي معشم عمره بـ إنتهاء الإحتكار، يغسل إيده.
شوفوا منوه اللي يسن القوانين التجاريه في البلاد، و بتعرفون ليش الإحتكار موجود. آخر القوانين المتعسفه، هو اللي ما يسمح بإستيراد السيارات المستعمله من الخارج إلا بشروط تعجيزيه. عقب هالقرار، الوكلاء قاموا يرقصووووون في مكاتبهم من الفرحه.