بسم الله الرحمن الرحيم
السلام عليكم ورحمة الله وبركاته..

اعزائي اعضاء هذا المنتدى الطيب..

لو سمحتوا يامراقبين الموقع لاتحذفون موضوعي لأني احس اني انسان مظلوم والشكوى لغير الله مذله..ولو تشوفون في موضوعي اي غلط احذفوا الموضوع وانا مب زعلان..

انا واحد من الي انقص عليهم وحجزوا الـ FJ طبعاً هدفي من إنشاء هذا الموضوع اني احصي الحالات الي صار معاها هل شي..
اول شي انا حاجز سيارة FJ اللون ابيض من تاريخ 8/3/2008 في بوظبي والبايع الي حجزت عنده قالي نحن نعطيك فتره طويله ونقولك 3 اشهر لين ماتوصل السياره لين هني وانا صدقته وقالي انها مابتاخذ اكثر عن شهرين وان كثرت كثير شهرين بالضبط المهم بنقول انهم عادلين بالموضوع ولكن للأسف بعد بحث وتعميق وحفر الخ الخ..اول شي قبل ما اقول اي شي بالبركه على اخوي وربيعي وولد عمي وربيع ولد عمي الي حجزوا بعدي السياره بشهر وحصلوها بفترة شهر ونص تقريباً ويعطيهم خيرها ويكفيهم شرها يارب..اخوي ياجماعة الخير فاجأني بإتصاله يقولي حمدان سيارتي وصلت وبروح استلمها قلتلها كيف ياخوي اكيد انا معاك وصلت بس نسوا يتصلوا بي وبالفعل رحت ويا بو نهيان واستلم سيارته وانا تفاجئت يوم اسأل عن حجزي يقولولي والله انته في قائمة الإنتظار وما ندري متى سيارتك توصل شهر شهرين المهم..
الشباب حجزوا سياراتهم وبنفس اللون بس لون واحد يختلف وهو اللون الرصاصي اما الباقي ابيض..
سرت عند المدير الي موجود في الفرع وماراح اذكر اسم الريال الي حجزت عنده والمدير عشان ماتقولون ممنوع وتشويه لسمعتهم بس انا ريال مظلوم دخلت عند الريال مدير المبيعات قبل شهر بالضبط طبعاً اسلوب المدير يدل على انه انسان غير لبق في الكلام مشيناها له هل مره واتعوذنا من ابليس قالي قبل نهاية 5 تعال عندي وفالك طيب..سرت عند الريال اليوم والله ياجماعة الخير و الله على ما اقول شهيد اني من دخلت عنده حتى السلام يرده بدون نفس يمأ يمأ براسه (فقط) ياخوي انا حاجز السياره الفلانيه .. بكل برود اعصاب والله ماعندنا سيارات ومافي اخبار عن استوك ياي لبعد 15 – 30 يوم يعني انتظر لين شهر7 – 8 البائع يقولي ان في دفعه بتوصل في بداية شهر 6 تناقض في الكلام المهم طرشني عند البايع والبايع ردني عليه وقلتله البايع ردني عليك وعطني حل دوختوني انا بشتري ببيزاتي ليه انذل يقولي وش اسويلك يعني انا مالي خص في الحجز ولا اتدخل في المواضيع هذي وروح خذ فلوسك ماشي سياير وبرايك منك للبايع عاد لو شفتوا الأسلوب الي يكلمني به تقول الريال يوزع سيارات من عنده ولا من ماله المهم خذتني الحميه وهزبته هزاب وغسلت شراعه وعلمته الأدب وللأسف يا اخواني في هذا الملتقى الطيب انا ما افتخر اني ارد عليه بهل اسلوب لأننا تعودنا نرد الإساءه بإحسان بس في ناس ماينفع معاها الا الصوت العالي والزعيق بس خذتني الحميه اكثر يوم شفته يعامل واحد من الشباب الي يالسين عنده بهل اسلوب يعني يقوله الريال قدامي اخوي ماخذ لكزس ومعطينه معاها شي المهم من اجزاء الحديد .. وانا ماعطيتوني مثله ليش رد عليه وقاله بنييبلك 2 طن حديد تخيلوا الرد الوقح وازيدكم من الشعر بيت بعد بحث للأسف على قولتهم ناس حاجزين من شهر 2 وللحين ماوصلت السياره ياجماعة الخير انا ابى اعرف هل هي لعبه من الوكيل نفسه بإحتفاظه بالسيارات لبيعها فيما بعد لرفع قيمة السياره اما شو السبب يعني لو قلنا لكزس استيشن بتلقونها متوفره بس يبالها *واو* وامورك مسلكه وماشيه
متى ببيي اليوم الي بينتهي فيه الإحتكار من قبل وكلاء السيارات ونلقى مليون الف وكيل للسيارات
ياجماعة للتنويه فقط السيارات الي خذوها الشباب ما كان حاجزنها حد وماخذها والدفعه الي يت فيها سيارة اخوي كنت انا فيها بس سيارتي (تفبركت)

نقطه نسيت اوضحها وحبيت اضيفها عن طريق التعديل يوم سألتهم عن سبب وصول سيارات الشباب قبلي قالولي والله يمكن حد حاجز السياره وماخذها والمشكله كل واحد منهم يسألهم قبل ما استلم السياره هل كان في حد حاجزنها ورفض ياخذها يقولولهم لا ونفس الشي يوم واجهت البايع والله سيارة ولد عمك وصلت في الدفعه من الباخره طبعاً هم حاجزين عند ريال غير عن الي حاجز عنده ماعطوني سبب ولا حاولوا يقنعوني حتى او يعطوني تبرير

ياجماعة الخير هذي دعوه مني لكل من تعرض لمثل موقفي اننا نقوم بشكوى جماعيه بإتصالنا بحماية المستهلك او وزارة الإقتصاد يوم الأحد لنقوم بتقديم شكوانا للجهه المعنيه بالأمر وإن شاء الله يتخذون الإجراءات المناسبه ضدهم

والسموحه على الإطاله

52 thoughts on “الفطيم وسياسة حجز السيارات

  1. بسم الله الرحمن الرحيم

    أخواني الموضوع شيق جدا ….و التركيز هنا على وكالة الفطيم على ما اعتقد… كل التعليقات في محلها و صحيحة ومنطيقة في الواقع ، ولكن انا مع الاخ الذي اقترح بارسال ايميل للشركة الام في اليابان ..تشرح ما يحصل في سوق التويوتا في الامارات .
    من المعرف أصلا أنه من ضمن استراتيجية ايه شركة سيارات ناجحة ، طلب عدد مقترح لسيارات العام الجديد من مختلف الموديلات و الانواع مثلا الاستيشن و الكامري و غيرها،فكيف نقص العدد ،،، هل لزيادة الطلب ، يمكن و لكن لاتنسون ان البهوان في البريمي يبيع بعد، ليش ما في حجز و تاخير لبعض السيارات في البريمي ..،،،العدد موجود، و عمرها ماصارت في الامارات تروح الوكالة تبى سيارة و ما تلاقيها ,..نادرا جدا ، بالعكس في الماضي كانو ينزلون عروض على سيارات السنة الحالية في اخر ثلاثة اشهر لبيع الكمية المتبقية . و الموضوع مب نقص و اكبر دليل ان اخونا اللي يبا يشتري بكب هايلوكس ..زقالو له بالطلب !!!ياسبحان الله .
    اما بالنسبة لقلة الادب ….أعتقد ان هذا الشيئ خارج عن اطار البيع و الشراء، و مثل ما قال اخونا هزبتة و ادبته ،وما قصر فيه و اعتقد ان القانون كفل حرية الكل في دولتنا الفتية.

    الموضوع صار حديث الساعة الان، ولكن يمكن تفسير ما يحدث يمكن لعدة أمور منها:
    1- زيادة عدد السكان الوافدين للدولة خلال الفترة الاخيرة…لكن مب من المعقول انهم كلهم شرو تويوتا..
    2- زيادة الرواتب ,,,,سبب معقول ولكن هل الكل بيشتري تويوتا !!!!
    3- شراء اصحاب المعارض لكميات كبيرة من السيارات و بيعها في السوق بسعر اكثر من السعر الطبيعي للبيع و الربح، مع عدم وجود رد فعل من الوكالة لهذا الشيئ …مش غريب هذا التصرف .

    على العموم التويوتا مو اخر نوع من السيارات في العالم و اعتقد المخازن معبايه ,,,حد بس يشوف العدد المخزون و بيعرف ليش يقولون ما في سيارات !!!لرفع الاسعار …مثل البيض …تم بيع كيس البيض ب 50 درهم في اسواق دولة مجاورة من انتاج الامارات و احنا قاعدين ندور بيضة فى الجمعية ما نلاقي …

    و اخيرا و ليس اخرا ,,,لا تنسون طرشوا رسالة الكترونية للشركة الام في اليابان و شوفو الوضع كيف بيتغير …
    اسئل الله العلي القدير بان يحمينا من كل محتال و كفور…

    و بارك الله فيكم جميعا

  2. حتى بهوان ساير على خطاهم
    بدء يزيد الاسعار
    ويقول لك انتظر اذا مب نفس المدة بتكون المدة اقل بكم يوم
    وهذا حتى المعاملة مب نفس قبل

  3. معقولة اسير الوكالة ويقولون مافي سيارات وانتظر من 3 الى 6 شهور
    وخذ لك مجلة السيارات الموجودة في محطات البترول وبتتفاجىء ان كثير من المعارض الموجودة عندهم اعداد كبيره من السيارات ولا بعد بعدة ألوان السالفة ومافيها ان فيه مافيا من التجار يلعبون بالسوق بدون رقيب ولا حسيب!!!!!!!!!!!!!!!
    والسيارات امرها هين في اشياء اهم من السيارات!!!

  4. شباب عليكم بالعربية للسيارات أو المسعود..

    هذيلا ما عندهم واسطه و ما واسطه ..

    اسال مجرب.. ^_*

Comments are closed.